កុមារឥណ្ឌូណេស៊ីជាង ១ពាន់នាក់ធ្លាក់ខ្លួនឈឺដោយសារហូបអាហារសាលាផ្ដល់ឲ្យ

កុមារជាង ១ពាន់ នាក់នៅខេត្ត West Java ប្រទេសឥណ្ឌូណេស៊ី បានធ្លាក់ខ្លួនឈឺក្នុងសប្តាហ៍នេះ បន្ទាប់ពីទទួលទានអាហារពេលសាលាដោយឥតគិតថ្លៃ ដែលជាការផ្ទុះឡើងនៃការពុលអាហារដ៍ធំចុងក្រោយបង្អស់ពីកម្មវិធីអាហារឥតគិតថ្លៃរបស់ប្រធានាធិបតី Prabowo Subianto។

នៅភាគខាងលិចទីក្រុង Bandung ក្នុងខេត្ត​West Java សិស្សជាង ៤៧០ នាក់បានពុលកាលពីថ្ងៃចន្ទ បន្ទាប់មកមានការផ្ទុះឡើងចំនួន៣ ទៀតនៅថ្ងៃពុធនៅ West Bandung និងទីក្រុង Sukabumi ដែលប៉ះពាល់ដល់កុមារយ៉ាងហោចណាស់ ៥៨០ នាក់ទៀត។ ដោយសារមន្ទីរពេទ្យ​មាន​សភាព​តូចចង្អៀត សិស្ស​មួយ​ចំនួន​ត្រូវ​ទទួល​ការ​ព្យាបាល​នៅ​​កីឡាដ្ឋាន និង​នៅ​ក្រៅ​អគារ​មន្ទីរពេទ្យ។ ពេលនេះនៅ West Bandung បានប្រកាសអាសន្នផ្នែកសុខភាព ដើម្បីគ្រប់គ្រងវិបត្តិ ខណៈកន្លែងចម្អិនអាហារដែលជាប់ទាក់ទងនឹងការពុលត្រូវបានផ្អាកបណ្ដោះអាសន្ន។

បើតាមអភិបាលខេត្ត បាននិយាយថា បញ្ហាកើតចេញពីការរៀបចំម្ហូបអាហារមិនល្អ ផ្ទះបាយនៅឆ្ងាយពីសាលារៀន អាហារឆាប់ចម្អិនពេក (ជួនកាលនៅយប់មុន) ហើយម្ហូបត្រូវបានបិទជិតខណៈពេលក្តៅ ដែលបណ្តាលឱ្យអាហារខូចគុណភាព។

គួរបញ្ជាក់ថាកម្មវិធីផ្ដល់អាហារនេះចំណាយថវិកាយ៉ាងច្រើនចំនួន ១០.២ ពាន់លានដុល្លារ ហើយមានបំណងផ្តល់អាហារដល់ប្រជាជនឥណ្ឌូណេស៊ីចំនួន ៨៣ លាននាក់នៅចុងឆ្នាំនេះ ប៉ុន្តែអង្គការក្រៅរដ្ឋាភិបាលកំពុងអំពាវនាវឱ្យផ្អាកដោយសារតែការព្រួយបារម្ភអំពីសុវត្ថិភាព។ ចាប់​តាំង​ពី​កម្មវិធី​នេះ​ដំណើរការតាំងពី​​ខែ​មករាមក កុមារ​ជាង ៦០០០ នាក់​នៅ​ទូទាំង​ប្រទេស​បាន​ធ្លាក់​ខ្លួន​ឈឺ៕

អត្ថបទ៖ ប៊ុន សុភាព