ព័ត៌មានជាតិ

អ្នកជំនាញសុខភាពភ្នែក លើកទឹកចិត្តពលរដ្ឋផ្តល់ទំនុកចិត្តលើគ្រូពេទ្យក្នុងស្រុក ជាជាងចេញទៅព្យាបាលនៅក្រៅប្រទេស

បានផុស

៦ ខែ មុន

នៅ

ថ្ងៃអាទិត្យ ១១ មករា ២០២៦

ដោយ

អ្នកជំនាញសុខភាពភ្នែក បានជំរុញលើកទឹកចិត្តដល់ប្រជាពលរដ្ឋ ត្រូវមានការជឿជាក់ និងផ្តល់ទំនុកចិត្តទៅលើក្រុមគ្រូពេទ្យក្នុងស្រុក ជាជាងចេញទៅព្យាបាលនៅក្រៅប្រទេស ដែលធ្វើឱ្យខាតបង់ពេលវេលា និងចំណាយថវិកាច្រើន ព្រោះថាការព្យាបាលនៅក្នុងស្រុកក៏មានគុណភាពប្រដំប្រសងគ្នាដូចនៅក្រៅប្រទេសដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសអញ្ជើញចូលរួមកម្មវិធីចុះពិនិត្យសុខភាពភ្នែក និងចែកវែនតាដោយឥតគិតថ្លៃជូនប្រជាពលរដ្ឋប្រមាណ ៥០០ នាក់ រស់នៅសង្កាត់ក្រាំងធ្នង់ កាលពីថ្ងៃទី ១០ មករា លោក បាក់ តូក្យូ នាយកប្រចាំប្រទេស នៃអង្គការហ្រេ្វដហូឡូ បានមានប្រសាសន៍ថា គុណភាពការពិនិត្យព្យាបាលភ្នែកនៅកម្ពុជាមានលក្ខណៈល្អប្រសើរខ្លាំងណាស់បើប្រៀបធៀបទៅនឹងបណ្តាប្រទេសមួយចំនួន។ ជាក់ស្តែងនៅឆ្នាំ ២០២០ អង្គការហ្វ្រេដហូឡូ បានអញ្ជើញអ្នកជំនាញមកពីអង់គ្លេស និងស្កុតឡែន មកវាយតម្លៃនៅកម្ពុជាពីការផ្តល់សេវាភ្នែកនៅកម្ពុជា។ ជាលទ្ធផលក្រុមអ្នកជំនាញបានពិនិត្យឃើញថា កម្ពុជាមានគ្រូពេទ្យភ្នែកមានជំនាញប្រសើរណាស់ បើធៀបទៅនឹងប្រទេសនានា។

លោកបានបន្តថា «អីចឹងទេ សូមបងប្អូនយើងទុកចិត្តទៅលើគ្រូពេទ្យយើង និងលើកទឹកចិត្តទទួលសេវានៅកម្ពុជាដោយមិនចាំបាច់ទៅក្រៅប្រទេស ព្រោះថាគ្រូពេទ្យធ្លាប់រៀននៅប្រទេសជិតខាងខ្លះត្រឡប់មកវិញមិនល្អប្រសើរដូចគ្រូពេទ្យធ្វើការនៅស្រុកខ្មែរយើងទេ»។

លើសពីនេះទៀត យោងតាមការអង្កេតថ្នាក់ជាតិស្តីពីពិការភាពភ្នែកដែលអាចចៀសវាងបាននៅកម្ពុជារៀបចំឡើងដោយក្រសួងសុខាភិបាល ក្នុងចំណោមប្រជាពលរដ្ឋ ១០០ នាក់ មានបញ្ហាភ្នែក មាន ៩២ នាក់ អាចចៀសវាងបានបើសិនគាត់ទៅពិនិត្យ និងព្យាបាលទៀងទាត់ និងទាន់ពេល។

លោក បាក់ តូក្យូ បានអំពាវនាវដល់ប្រជាពលរដ្ឋថា នៅពេលដែលពលរដ្ឋជួបគ្រូពេទ្យរកឃើញថាមានបញ្ហាកន្ទុយថ្លែន ឬបញ្ហាបាយភ្នែក ឬបញ្ហាផ្សេងទៀតដែលទាមទារឱ្យបកបាយ ឬវះកាត់តូចណាមួយនៅមន្ទីរពេទ្យ សូមទៅចូលរួមតាមការណែនាំរបស់គ្រូពេទ្យ ព្រោះថាអ្វីដែលគ្រូពេទ្យណែនាំត្រឹមត្រូវជួយធ្វើឱ្យសុខភាពភ្នែកបានល្អប្រសើរ បើមិនធ្វើតាមទេ អាចនឹងមានបញ្ហាប្រឈមទៅថ្ងៃក្រោយដូចជាធ្វើឱ្យពិការភ្នែកជាដើម។

លោក ប៉ាង ពៅ នាយកអភិវឌ្ឍន៍កម្មវិធីចិរភាពកម្ពុជា បានមានប្រសាសន៍ថា ក្នុងការការពារសុខភាពភ្នែកឱ្យបានល្អប្រសើរ វាទាមទារឱ្យប្រជាពលរដ្ឋចេះថែរក្សាភ្នែក និងទៅពិនិត្យភ្នែកឱ្យបានត្រឹមត្រូវផងដែរ ពិសេសពាក់វ៉ែនតាការពារភ្នែក។

លោកបានណែនាំថា «ជាធម្មតាវ៉ែនតាគ្រាន់តែជួយកែតម្រូវគំហើញមួយទេ ប៉ុន្តែមិនមានន័យថាជួយយើងបានគ្រប់កាលៈទេសៈនោះទេ។ អីចឹងបើយើងប្រើបានត្រឹមត្រូវនឹងជួយយើង តែបើប្រើមិនបានត្រឹមត្រូវ វាក៏អត់បានជួយយើងដែរ វានឹងទៅជាបញ្ហាផ្សេងមួយទៀត ហើយមួយទៀត ការវាស់ភ្នែកពេលនេះវាគ្រាន់តែជាការវាស់ភ្នែកមួយពេល មិនអាចយូរអង្វែងទេ ដើម្បីឱ្យភ្នែកបានសុខភាពល្អ ទាមទារឱ្យបងប្អូនត្រូវឆែកភ្នែកឱ្យបានទៀងទាត់ ហើយទៅរកសេវាថែទាំភ្នែកដែលមានអាជ្ញាបណ្ណត្រឹមត្រូវ ពិសេសទៅមន្ទីរពេទ្យព្រះអង្គឌួង»៕

អត្ថបទ ៖ សំអឿន

Related Topics:សុខភាពភ្នែក