សូម្បីបុរសនិងស្រ្តីឆ្លងកូវីដ ក៏ចេញរោគសញ្ញាខុសគ្នាដែរ

ការស្រាវជ្រាវបានអះអាងថា បុរសនិងស្ត្រី បញ្ចេញរោគសញ្ញាជំងឺកូវីដ-១៩ ខុសគ្នា។

ក្រុមអ្នកស្រាវជ្រាវនៅសាកលវិទ្យាល័យ King’s College ទីក្រុងឡុងដ៍ បានពិនិត្យមើលទិន្នន័យ ពីមនុស្សពេញវ័យដែលឆ្លងកូវីដ ចំនួន ៣៨,០០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពួកគេបានរកឃើញថា បុរសមានអាការពិបាកដកដង្ហើម អស់កម្លាំង ស្រៀវស្រាញនិងក្តៅខ្លួន។

ទន្ទឹមនឹងនេះ ការបាត់បង់ក្លិន ឈឺទ្រូងនិងក្អកជាប់ បានកើតឡើងជាទូទៅក្នុងចំណោមស្ត្រី។

តាមធម្មតា រោគសញ្ញាសំខាន់ចំនួនបីនៃជំងឺកូវីដ-១៩ ត្រូវបានគេកត់សម្គាល់ថា មានដូចជា គ្រុនក្តៅ ក្អកជាប់រហូតនិងបាត់បង់ក្លិន។

ប៉ុន្តែអ្នកសិក្សាបានរកឃើញថា គ្រុនក្តៅមិនមែនជាអាការដំបូងនៃជំងឺនេះ នៅគ្រប់ក្រុមអាយុនោះទេ បើទោះបីជាវាជារោគសញ្ញាដែលមនុស្សគ្រប់គ្នាតែងតែលើកឡើងក៏ដោយ។

លោកស្រី Claire Steves អ្នកនិពន្ធឈានមុខមកពីសាកលវិទ្យាល័យ King’s College បាននិយាយថា “វាជារឿងសំខាន់ ដែលមនុស្សត្រូវដឹងអំពីរោគសញ្ញាដំបូងបំផុត ហើយអាចមើលឃើញពីភាពខុសគ្នាចំពោះសមាជិកគ្រួសារនីមួយៗ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពិនិត្យឲ្យមែនទែន! អ្នកឆ្លងកូវីដ ចេញរោគសញ្ញាដំបូងខុសៗគ្នា តាមអាយុ