ជំងឺរលាកថ្លើមដ៏អាថ៌កំបាំង មកដល់អាស៊ីអាគ្នេយ៍ មានកុមារ ៣នាក់ហើយ បានស្លាប់

កុមារបីនាក់នៅក្នុងប្រទេសឥណ្ឌូណេស៊ី បានស្លាប់ដោយសារជំងឺរលាកថ្លើមដ៏អាថ៌កំបាំង ដែលធ្វើឲ្យចំនួនកុមារស្លាប់ទូទាំងពិភពលោកដោយសារជំងឺនេះ កើនឡើងដល់៤នាក់។

ក្រសួងសុខាភិបាលឥណ្ឌូណេស៊ីនិយាយថា ជនរងគ្រោះបានស្លាប់ដោយសារ ជំងឺរលាកថ្លើមធ្ងន់ធ្ងរកាលពីខែមុន ហើយកុមារទាំងអស់នោះ គឺជាអ្នកក្រុងហ្សាកាតា។

រោគសញ្ញានៃជំងឺរលាកថ្លើមដ៏អាថ៌កំបាំងនេះរួមមាន ចង្អោរ ក្អួត រាគខ្លាំង គ្រុនក្តៅ ស្បែកនិងភ្នែកឡើងពណ៌លឿង ប្រកាច់ និងបាត់បង់ស្មារតី។

ទោះបីជាយ៉ាងណាក៏ដោយ ការធ្វើតេស្តកំពុងដំណើរការ ដើម្បីបញ្ជាក់ឲ្យកាន់តែច្បាស់អំពីមូលហេតុនៃការស្លាប់របស់កុមារទាំងនោះ។

អាយុរបស់កុមារក៏មិនត្រូវបានបង្ហាញដែរ ហើយគេមិនច្បាស់ទេថាតើ ពួកគេមានសុខភាពរ៉ាំរ៉ៃឬក៏អត់។

គ្មានករណីណាមួយត្រូវបានធ្វើតេស្តវិជ្ជមានចំពោះមេរោគដែលបង្កឲ្យមានជំងឺរលាកថ្លើមធម្មតាទេ ដែលជាហេតុធ្វើឲ្យក្រុមអ្នកវិទ្យាសាស្ត្រមានការងឿងឆ្ងល់អំពីប្រភពដើមនៃជំងឺនេះ។

ស្របពេលជាមួយគ្នានោះដែរ ក្រសួងសុខាភិបាលឥណ្ឌូណេស៊ី បានជំរុញឲ្យឪពុកម្តាយប្រុងប្រយ័ត្នចំពោះរោគសញ្ញានៃជំងឺ ។ ក្រសួងបានណែនាំប្រជាជន ឲ្យទៅជួបគ្រូពេទ្យ ប្រសិនបើកូនរបស់ពួកគេមានរោគសញ្ញាដូចខាងលើ និងជំរុញប្រជាជនរបស់ខ្លួនឲ្យរក្សាអនាម័យ ធានាថាអាហារមានអនាម័យ និងចម្អិនបានល្អ ហើយចៀសវាងការប៉ះពាល់ជាមួយអ្នកឈឺ។

គួរបញ្ជាក់ថា ករណីជំងឺរលាកថ្លើមលើកុមារជាង ២០០ នាក់ដែលគេមិនស្គាល់ប្រភព ត្រូវបានបញ្ជាក់ទូទាំងពិភពលោក ក្នុងការផ្ទុះឡើងយ៉ាងអាថ៌កំបាំង ខណៈករណីភាគច្រើនត្រូវបានរកឃើញនៅក្នុងចក្រភពអង់គ្លេស និងសហរដ្ឋអាមេរិក។

យ៉ាងណាក្តី អង្គការ​សុខភាព​ពិភពលោក ទើបតែ​បាន​បញ្ជាក់​ថា​មាន​អ្នក​ស្លាប់​ម្នាក់ប៉ុណ្ណោះដោយសារជំងឺរលាកថ្លើមដ៏អាថ៌កំបាំងនេះ ថ្វីបើ​មិន​បាន​បង្ហាញ​​ទីតាំង​ក៏ដោយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ជំងឺរលាកថ្លើមកុមារដ៏អាថ៌កំបាំង កំពុងវាយលុកពិភពលោក ពេលនេះរាលដាលមកដល់អាស៊ីហើយ (មានវីដេអូ)