ជំងឺឆ្លងខ្លាំងមួយប្រភេទទៀត ផ្ទុះឡើងនៅទីក្រុង Wuhan (មានវីដេអូ)

ទីកន្លែងដែលផ្ទុះជំងឺកូវីដ១៩ដំបូងបង្អស់ ពេលនេះបានផ្ទុះឡើងនូវជំងឺមួយទៀតហើយ។

ករណីជំងឺអាសន្នរោគ ត្រូវបានបញ្ជាក់កាលពីថ្ងៃចន្ទទី១១ខែកក្កដា នៅទីក្រុង Wuhan ប្រទេសចិន ខណៈវិធានការដើម្បីទប់ស្កាត់ការរីករាលដាល ត្រូវបានអនុវត្តនាពេលនេះ។

យោងតាមការជូនដំណឹងពីមន្ទីរសុខាភិបាលស្រុក ដែលត្រូវបានចេញផ្សាយនៅលើគណនី WeChat របស់ Dacheng Wuchang, សាកលវិទ្យាល័យ Wuhan បានរាយការណ៍ករណី ក្អួត និងរាគ រួមជាមួយគ្រុនក្តៅស្រាល កាលពីល្ងាចថ្ងៃសៅរ៍។ ការធ្វើតេស្តសរីរវិទ្យា ដោយមជ្ឈមណ្ឌលគ្រប់គ្រងជំងឺខេត្ត និងក្រុង បានបញ្ជាក់ថា នោះគឺជាជំងឺអាសន្នរោគ។

នាយកដ្ឋានបាននិយាយថា “បន្ទាប់ពីការធ្វើរោគវិនិច្ឆ័យ និងការព្យាបាលប្រកបដោយប្រសិទ្ធភាព ស្ថានភាពអ្នកជំងឺត្រូវបានគ្រប់គ្រង ហើយរោគសញ្ញាបានបាត់ទៅវិញ”។

នាយកដ្ឋានបានសង្កត់ធ្ងន់ថា រាល់វិធានការដើម្បីទប់ស្កាត់ការផ្ទុះឡើងនៃជំងឺនេះ ត្រូវបានអនុវត្តភ្លាមៗ រួមទាំងការតាមដានទំនាក់ទំនង ការប្រមូលសំណាក និងការបិទកន្លែងមួយចំនួនដើម្បីបាញ់ថ្នាំសម្លាប់មេរោគផងដែរ។

មកទល់ពេលនេះ មិន​មាន​ករណី​ថ្មី​ត្រូវ​បាន​រក​ឃើញ​នោះទេ។

គួរបញ្ជាក់ថា ជំងឺអាសន្នរោគត្រូវបានចាត់ថ្នាក់ជាជំងឺឆ្លងប្រភេទ A នៅក្នុងប្រទេសចិន រួមជាមួយនឹងជំងឺប៉េស្ត។

ករណី​ដែល​ត្រូវ​បាន​រក​ឃើញ​នៅ​សាកលវិទ្យាល័យ Wuhan គឺ​ជា​ការ​ឆ្លង​ទី​ពីរ​ដែល​ត្រូវ​បាន​បញ្ជាក់​ក្នុង​ឆ្នាំ​នេះ បន្ទាប់​ពី​​ករណី​មួយ​ត្រូវ​បាន​រក​ឃើញ​កាលពី​ខែ​មីនា។

អ្នកជំងឺចំនួន៥នាក់បានធ្វើតេស្តវិជ្ជមាន ជំងឺអាសន្នរោគក្នុងឆ្នាំ ២០២១ ប៉ុន្តែមិនមានអ្នកស្លាប់ទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អ្នកវិទ្យាសាស្រ្តនៅ Wuhan ប្រាប់ថា មេរោគបំប្លែងខ្លួនថ្មីៗ នឹងលេចចេញមកទៀត