អ្នកវិទ្យាសាស្ត្រនូវែលសេឡង់ រកឃើញឱសថជួយឲ្យមនុស្សរស់បានយូរ និងមានសុខភាពល្អ

អ្នកស្រាវជ្រាវបានរកឃើញថា មនុស្សអាយុចាប់ពី ៥០ ឆ្នាំឡើងទៅដែលលេបថ្នាំមហារីកមួយប្រភេទ អាចជួយបង្កើនអាយុបាន ១០ ភាគរយឯណោះ ។

ការរកឃើញនេះបានកើតឡើង បន្ទាប់ពីអ្នកស្រាវជ្រាវឆ្លងកាត់ការពិសោធន៍ទៅលើសត្វកណ្ដុរ ។ អ្នកស្រាវជ្រាវបានផ្ដល់ថ្នាំ Alpelisib ដល់សត្វកណ្ដុរ ដែលជាថ្នាំកំណត់គោលដៅអង់ស៊ីម PI 3-kinase ហើយទទួលលទ្ធផលគួរឲ្យភ្ញាក់ផ្អើល ។ សត្វកណ្ដុរដែលទទួលថ្នាំនោះហើយបានបង្ហាញសញ្ញាសុខភាពល្អក្នុងវ័យចាស់ ស្រួលខ្លួន ហើយមានកម្លាំងប្រសើរជាងមុនផងដែរ ។

លោកវេជ្ជបណ្ឌិត Chris Hedges មកពីសាកលវិទ្យាល័យ Auckland ក្នុងប្រទេសនូវែលសេឡង់ បាននិយាយថា “យើងសប្បាយចិត្តដែលថ្នាំនេះមិនត្រឹមតែបង្កើនអាយុរបស់សត្វកណ្ដុរប៉ុណ្ណោះទេ ថែមទាំងជួយឲ្យមានសុខភាពល្អទៀតផង ហើយយើងក៏កំពុងសិក្សាស្វែងយល់ពីរបៀបដែលវាធ្វើការផងដែរ” ។

សូម្បីសាស្រ្តាចារ្យ Peter Shepherd ក៏និយាយដែរថា “យើងបានព្យាយាមបង្កើតថ្នាំកំណត់គោលដៅ PI 3-kinase អស់រយៈពេលជាង ២០ ឆ្នាំមកហើយ ដោយសារព័ស្តុតាងបង្ហាញថា មានប្រយោជន៍ក្នុងការព្យាបាលជំងឺមហារីក ។ ដូច្នេះ វាជាការប្រសើរណាស់ដែលថ្នាំនេះអាចប្រើក្នុងផ្នែកផ្សេងៗទៀត ជាពិសេសបង្ហាញយន្តការថ្មីដែលរួមចំណែកដល់ជំងឺទាក់ទងនឹងអាយុ ។ មិនតែប៉ុណ្ណោះ វាក៏បង្ហាញពីតម្លៃនៃការវិនិយោគរយៈពេលវែងក្នុងការស្រាវជ្រាវលើវិស័យបែបនេះផងដែរ” ៕

ប្រែសម្រួល​៖ វារី
ប្រភព៖ dailystar

ចុចអាន៖ អ្នកវិទ្យាសាស្ត្ររកឃើញវិធី ធ្វើឲ្យមនុស្សមានអាយុវែង