កិច្ចប្រជុំជាមួយប្រតិភូមជ្ឈមណ្ឌលអន្តរជាតិដំណោះស្រាយភាពស៊ាំនឹងឱសថប្រឆាំងមេរោគ

សាស្រ្តាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល និងជាប្រធានគណ:កម្មការប្រឹក្សាយោបល់លើគម្រោង “កំណត់ទំហំ និងផែនទី នៃកត្តាជំរុញ និងកត្តាប្រឈមដល់ការអនុវត្តគោលការណ៍ណែនាំជាតិស្តីពី ការគ្រប់គ្រងការប្រើប្រាស់ឱសថប្រឆាំងមេរោគក្នុងប្រព័ន្ធសុខាភិបាលនៅកម្ពុជា” បានជួបពិភាក្សាការងារជាមួយប្រតិភូ មជ្ឈមណ្ឌលអន្តរជាតិសម្រាប់ដំណោះស្រាយភាពស៊ាំនឹងឱសថប្រឆាំងមេរោគ International Center for Antimicrobial Resistant Solution (ICARS)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាស្រ្តាចារ្យ រដ្ឋលេខាធិការ និងជាប្រធានកិច្ចប្រជុំនេះបានសង្ខេបអំពីវឌ្ឍនភាព នៃការប្រយុទ្ធប្រឆាំងនឹងភាពស៊ាំនឹងឱសថប្រឆាំងមេរោគនៅកម្ពុជា ដោយមានការគាំទ្រពីអង្គការសុខភាពពិភពលោក ក្រសួងសុខាភិបាលសម្រេចបាននូវ៖ ១. គោលការណ៍ណែនាំជាតិស្តីពី ការគ្រប់គ្រងការប្រើប្រាស់ឱសថប្រឆាំងមេរោគក្នុងមូលដ្ឋានសុខាភិបាល ឆ្នាំ២០១៩ និង ២. គោលនយោបាយជាតិស្តីពី ការគ្រប់គ្រងការប្រើប្រាស់ឱសថប្រឆាំងមេរោគក្នុងមូលដ្ឋានសុខាភិបាល ឆ្នាំ២០២៣ និងគោលការណ៍ណែនាំស្តីពី ការតាមដានបរិមាណឱសថប្រឆាំងមេរោគក្នុងមូលដ្ឋានសុខាភិបាល ឆ្នាំ២០២៣។

ប្រតិភូមជ្ឈមណ្ឌលអន្តរជាតិសម្រាប់ដំណោះស្រាយភាពស៊ាំនឹងឱសថប្រឆាំងមេរោគ (ICARS) បានជម្រាបជូនក្រសួងសុខាភិបាលអំពីគោលបំណង៖

– គម្រោងគាំទ្រដោយ ICARS ជាគម្រោងស្រាវជ្រាវតាមបែបអនុវត្ត គឺមានប្រទេសចំនួន២១ ចូលរួម ដែលក្នុងនោះមានកម្ពុជាផងដែរ ក្រោមគម្រោងមេ “សុខភាពតែមួយ” ដែលគ្របដណ្តប់ទៅលើសុខភាពមនុស្ស និងសត្វ និងធ្វើការស្រាវជ្រាវមានទិន្នន័យវិទ្យាសាស្រ្ត ដើម្បីកាត់បន្ថយការប្រើប្រាស់ឱសថប្រឆាំងមេរោគមិនសមស្របឱ្យបានត្រឹម ឬក្រោម ២០%

– ដោយមានការគាំទ្រពីក្រសួងសុខាភិបាល គម្រោងស្រាវជ្រាវរបស់ ICARS នេះ បានឆ្លងពីរដំណាក់កាលរួចមកហើយ។ បច្ចុប្បន្នចូលដល់ដំណាក់កាលទី៣ គឺត្រូវរៀបចំគម្រោងលម្អិតបន្ថែមទៀត និងចុះអនុសារណ: នៃការយោគយល់រវាងក្រសួងសុខាភិបាល និង ICARS ដើម្បី ”អនុវត្ត”បន្តរយ:ពេល ៣ ឆ្នាំទៀត

– គម្រោងនឹងគាំទ្រដល់ការរៀបចំ ”និយាមនីតិវិធីប្រតិបត្តិ” ស្តីពី ការគ្រប់គ្រងការប្រើប្រាស់ឱសថប្រឆាំងមេរោគ សម្រាប់អនុវត្តថ្នាក់ជាតិនៅតាមមន្ទីរពេទ្យប្រកបដោយប្រសិទ្ធភាព។

គួរបញ្ជាក់ថា កិច្ចប្រជុំនេះធ្វើឡើងនៅទីស្តីការក្រសួងសុខាភិបាល នារសៀលថ្ងៃទី១៥ ខែសីហា ឆ្នាំ២០២៤ ដោយ មានការអញ្ជើញចូលរួមពី លោក ហេង សុទ្ធី អនុរដ្ឋលេខាធិការ អ្នកស្រីសាស្រ្តាចារ្យជំនួយ ស៊ុយ សុវណ្ណធីតា អគ្គនាយករងបច្ចេកទេសសុខាភិបាល សាស្រ្តាចារ្យ កឹម សាវួន អនុប្រធាននាយកដ្ឋានមន្ទីរពេទ្យ អ្នកស្រីវេជ្ជបណ្ឌិត ក្រង ស៊ីដន អនុប្រធាននាយកដ្ឋានប្រយុទ្ធនឹងជំងឺឆ្លង សាស្រ្តាចារ្យ អ៊ា ប៉ នាយករងវិទ្យាស្ថានជាតិសុខភាពសាធារណៈ អ្នកស្រីវេជ្ជបណ្ឌិត Kristina Osbjer តំណាង ICARS តំណាងអង្គការ KHANA សរុប ចំនួន ១២នាក់៕