តើកត្តាអ្វីខ្លះដែលបណ្តាលឱ្យកើតមានជំងឺដាច់សរសៃឈាមខួរក្បាល? មានរោគសញ្ញាបែបណាខ្លះ?

កាលពីថ្ងៃទី២០ ខែតុលា ឆ្នាំ២០២៤ ផលិតករល្បីឈ្មោះនៅកម្ពុជា លោក កៅ សីហា បានទទួលមរណភាពដោយសារតែដាច់សរសៃឈាមខួរក្បាល។ ដំណឹងមរណភាពរបស់លោកបានធ្វើឱ្យអ្នកសិល្បៈ និងមហាជនមានការសោកស្តាយយ៉ាងខ្លាំងចំពោះការបាត់បង់ធនធានមនុស្សដូចជា លោក កៅ សីហា។ ទន្ទឹមនេះ តើកត្តាអ្វីខ្លះដែលនាំឱ្យកើតជំងឺដាច់សរសៃឈាមខួរក្បាលនេះ? តើមានវិធីសាស្ត្រព្យាបាលបែបណាខ្លះ?

តាមប្រភពពីវេបសាយរបស់មន្ទីរពេទ្យកាល់ម៉ែត បង្ហាញថា ជំងឺដាច់សរសៃឈាមខួរក្បាលនេះ គឺសំដៅដល់ការដាច់សរសៃឈាមខួរក្បាលដោយឯកឯង បណ្តាលមកពីសម្ពាធឈាមឡើងខ្ពស់ភ្លាមៗគ្រប់គ្រងមិនល្អ នាំឱ្យមានឈាមកកក្នុងខួរក្បាល។ ជាទូទៅជំងឺនេះពិបាកក្នុងការជួយសង្គ្រោះណាស់ ប្រសិនជាអ្នកជំងឺអាចរួចជីវិតពីជំងឺនេះបាន ក៏មិនប្រាកដថាវិលត្រឡប់មកកាន់សភាដើមបានដែរ ពោលគឺ អ្នកជំងឺអាចមានពិការភាពដោយសារខ្វះឈាមទៅចិញ្ចឹមខួរក្បាលនៅជុំវិញតំបន់នោះ និងដោយការសង្កត់នៃដុំឈាម។

មន្ទីរពេទ្យកាល់ម៉ែត បានឱ្យដឹងទៀតថា រោគសញ្ញានៃជំងឺនេះ គឺការឈឺក្បាលខ្លាំងភ្លាមៗ, មានសភាពខ្សោយនៃការកម្រើកសាច់ដុំ (ទន់មួយចំហៀងខ្លួន ដៃ ជើង ឬមុខ) និងវង្វេងស្មារតីជាដើម។ ចំពោះមូលហេតុវិញ ៦០% ទៅ៧០% បណ្តាលមកពីជំងឺលើសឈាម គួបផ្សំនឹងកត្តាមួយចំនួនទៀតដូចជា ជំងឺទឹកនោមផ្អែម ឬ ការពិសាស្រា និងបារីច្រើន។

ដើម្បីបញ្ជាក់ឱ្យដឹងថា តើលោកអ្នកមានជំងឺដាច់សរសៃឈាមក្នុងខួរក្បាលឬទេ? គ្រូពេទ្យនៅមន្ទីរពេទ្យកាល់ម៉ែត តម្រូវឱ្យធ្វើ CT Scan ខួរក្បាល ដើម្បីអាចបញ្ជាក់ពីទីតាំង និងទំហំនៃដុំឈាមកក ក្នុងការងាយស្រួលឱ្យគ្រូពេទ្យជ្រើសរើសវិធីសាស្ត្រព្យាបាល។

បើនិយាយពីវិធីព្យាបាលវិញ ប្រភពខាងលើបានបញ្ជាក់ថា​មានវិធីព្យាបាលចំនួន២។ ទី១ គឺការព្យាបាលដោយប្រើថ្នាំ (មិនវះកាត់) គឺគ្រប់គ្រងសម្ពាធឈាមឱ្យបានត្រឹមត្រូវ និងតាមដានជាប់លាប់ជាប្រចាំ។ ការប្រើប្រាស់ថ្នាំបន្ថយការឈឺចាប់។ ការសម្រាក និងដាក់ក្បាលកម្ពស់ ៣០ដឺក្រេ។ រីឯ វិធីព្យាបាលទី២ គឺព្យាបាលដោយការវះកាត់ ចំពោះគោលបំណងវះកាត់ ដើម្បីវះកាត់យកឈាមចេញ ជាការបន្ថយសម្ពាធតឹងណែនក្នុងក្បាល ដើម្បីជួយជីវិតអ្នកជំងឺ។ វះកាត់ទំហំនៃដុំឈាមកក (លើសពី​៣៥សង់ទីម៉ែត្រគីប), អ្នកជំងឺស្ថិតក្នុងស្ថានភាពសន្លប់ (GCS ៨-១២), ដុំឈាមនៅរាក់ប្រហែល ១សង់ទីម៉ែត្រពីឆ្អឹង៕