ប្រវត្តិរបស់ Chompoo តារាស្រីថៃទទួលបានការគោរពស្រឡាញ់ច្រើនបំផុត

Chompoo Araya ជាតារាសម្តែង តារាម៉ូដែល និងជាតារាទូរទស្សន៍ដ៏មានប្រជាប្រិយភាព របស់ប្រទេសថៃ។ បច្ចុប្បន្ន នាងបានក្លាយជាទៅជាតារារៀមច្បង ដែលមានអ្នកគោរពស្រឡាញ់ សឹងពាសពេញប្រទេស និងក្លាយទៅជាតារាស្រីដែលរកចំណូលបានច្រើនបំផុតពីការបង្ហោះរូបលើបណ្ដាញ Instagram។

ទោះបីពេលនេះ Chompoo មិនសូវលេចមុខក្នុងវិស័យសិល្បៈច្រើនដូចពីមុនក៏ដោយ ប៉ុន្តែកេរ្តិ៍ឈ្មោះរបស់នាងនៅតែល្បីល្បាញ និងវាយលុកទីផ្សារសិល្បៈ មិនថមថយបន្តិចឡើយ។

ខាងក្រោមជារឿងរ៉ាវផ្សេងទៀតរបស់ Chompoo Araya ៖

ជីវិតដំបូង

Chompoo Araya មានឈ្មោះដើមថា Araya Alberta Hargate កើតថ្ងៃទី ២៨ ខែមិថុនា ឆ្នាំ ១៩៨១ ដែលនាងជាកូនកាត់ ៣សាសន៍គឺ ​ថៃ ឡាវ និង​អង់គ្លេស។ មហាជនជាច្រើនបានស្គាល់និងហៅនាងថា Chompoo ដែលពាក្យនេះមកពីពាក្យ Chomphu មានន័យថា ផ្លែជម្ពូ។

នាងកើតនិងរស់នៅក្នុងប្រទេសថៃតាំងពីតូច ទោះបីមានឪពុកជាជាជនជាតិអង់គ្លេសក៏ដោយ ហើយនាងជានិស្សិតបញ្ចប់ការសិក្សាថ្នាក់បរិញ្ញាបត្រសិល្បៈ មកពីសាកលវិទ្យាល័យ Rangsit ។

អាជីព

Chompoo ​លេចមុខក្នុងសិល្បៈដំបូង កាលពី​ឆ្នាំ ១៩៩៨ បន្ទាប់​ពី​បាន​ឈ្នះ​ការ​ប្រកួត​បវរកញ្ញា ​“Miss Motor Show Contest” ។ ក្នុងឆ្នាំដដែលនោះ ក្រោយពីឈ្នះកម្មវិធីប្រកួតបវរកញ្ញា ក្នុងវ័យ ១៧ឆ្នាំ នាងបានចូលរួមសម្ដែងល្ខោនដំបូងបំផុត ក្នុងរឿង Pleng Prai ដែលផលិតដោយប៉ុស្តិ៍លេខ7 ។

ក្រោយៗមកទៀត Chompoo កាន់តែលេចធ្លោក្នុងតំណែងជាតួឯកនៅ​ប៉ុស្តិ៍​លេខ​7 ថៃ ហើយនាងក៏មាន​ឈ្មោះល្បីល្បាញទ្វេដង នៅ​ក្នុង​ប្រទេស។

ក្រៅ​ពី​ការងារ​សម្ដែង Chompoo ក៏ជា​តារា​ម៉ូដែលដ៏មានប្រជាប្រិយផងដែរ។ នាងបានទទួលពានរង្វាន់តារាសម្តែងសិចស៊ីបំផុតរបស់ FHM នៅប្រទេសថៃ ៤ឆ្នាំជាប់គ្នា គឺចន្លោះឆ្នាំ ២០០៧-២០១០។ នាងក៏ជារាជិនីនៃពិភពម៉ូដលំដាប់ជួរមុខនៃប្រទេស ព្រមទាំងជាតារាស្រីថៃដែលបង្ហាញវត្តមានលើឆាកអន្តរជាតិច្រើនជាងគេ។

បន្ថែមពីលើរការដើរម៉ូដ តារាស្រីវ័យ ៤០ឆ្នាំរូបនេះ គឺជាឯកអគ្គរដ្ឋទូតប្រេនគ្រឿងសម្អាង L’Oréal Paris និងជាភ្ញៀវរបស់កម្មវិធី International Fashion Weeks និងមហោស្រពភាពយន្ត Cannes ជារៀងរាល់ឆ្នាំទៀតផង។ ហើយក្រោយមកនាងបានក្លាយជាឯកអគ្គរដ្ឋទូតទស្សនាវដ្តីម៉ូដ L’Officiel Thailand នៅមហោស្រពភាពយន្តអន្តរជាតិ ទីក្រុងសៀងហៃ។

ដោយសារបង្ហាញខ្លួនជាអ្នកផ្សាយពាណិជ្ជកម្មហូរហែរ ទើប Chompoo ជាប់ឈ្មោះជាតារាមានឈ្មោះរន្ទឺខាងផ្នែកផ្សាយពាណិជ្ជកម្មឱ្យផលិតផលល្បីៗ ក៏​ដូ​ច​ជា​ទូតសុឆន្ទៈឱ្យម៉ាកល្បីៗនៅលើពិភពលោក។ ជាពិសេសនាងមានឈ្មោះលើតារាង Queen ពាណិជ្ជកម្មឱ្យផលិតផលល្បីៗ ២ឆ្នាំជាប់ៗគ្នា គឺនៅឆ្នាំ ២០២០ និងឆ្នាំ២០២១។

សម្រស់

ដោយឡែក ផ្នែករូបសម្រស់វិញ Chompoo ជាតារាស្រីនិយមតែងខ្លួនបែបយ៉េយ៉េ និងទទួលបានការចម្លងស្ទីលតាម ព្រមទាំងមានកោតការសរសើរពីមហាជនយ៉ាងច្រើនសន្ធឹកសន្ធាប់។ មិនតែប៉ុណ្ណោះនាងត្រូវសាធារណជនបោះឆ្នោតឱ្យជាប់ជាស្រីស្អាត ដែលគ្មានការកែកុន ឬវះកាត់កែសម្ផស្សឡើយ។ នាងជាតារាស្រីថៃ ​មាន​ទ​ម្រ​ង់​មុខ​មាត់​ស្រស់ស្អាតបែបធម្មជាតិ និងមានលក្ខណៈស្ដង់ដាដោយគ្មានប្រវត្តិឆ្លង​កា​ត់​មុខ​កាំបិទសូម្បីម្ដង។

ជីវិតគ្រួសារ និងទ្រព្យសម្បត្តិ

ក្រោយពីរៀបការជាមួយអ្នកជំនួញធំនៅក្នុងប្រទេស កាលពីឆ្នាំ២០១៥ សព្វថ្ងៃ តារាស្រីរូបនេះមានកូនប្រុសភ្លោះពីរនាក់ និងកូនស្រីម្នាក់ ជាចំណងដៃនៃគ្រួសារ។ ថ្វីត្បិតនាងបានក្លាយជាភរិយានៃមហាសេដ្ឋីលំដាប់ប្រទេសពិតមែន ប៉ុន្តែនាងនៅតែឆ្លៀតធ្វើការផ្នែកសិល្បៈជារឿយៗ ខណៈឆ្នាំ២០២២នេះ Chompoo  ជាម្ចាស់ទ្រព្យសម្បត្តិប្រមាណ ១៧-៤០លានដុល្លារអាមេរិក ដែលជាទ្រព្យរកបានដោយដៃខ្លួនឯង៕

ប្រែសម្រួល៖ សន្យា

ចុចអាន៖ ការពិត ១០យ៉ាង ពី Mai Davika តារាស្រីជាប់ឈ្មោះជា Queen ផ្ទួនៗ ប្រចាំប្រទេសថៃ

ចុចអាន៖ ទម្លាយការពិតអំពី Aum Pachayapa តារាស្រីថៃឈ្នះពានរង្វាន់ច្រើនជាងគេ