KPT+

មន្តស្នេហ៍ ៥ យ៉ាង ជួយរក្សាទំនាក់ទំនងជីវិតគូ ឲ្យដល់ចាស់កោងខ្នង

បានផុស

២ years មុន

នៅ

ថ្ងៃពុធ ៣ សីហា ២០២២

ដោយ

គ្មានមន្តស្នេហ៍ឬគ្រូស្នេហ៍ឯណា មកទាក់ចិត្តជីវិតគូឲ្យនៅយូរអង្វែងទេ ប្រសិនបើយើងមិនបានយល់ពីអ្វី ដែលហៅថាសេចក្ដីស្រលាញ់ពិតប្រាដក។ ជាពិសេសចង់រក្សាទំនាក់ទំនងមួយឲ្យនៅគង់វង្ស ចូលដល់ចំណងអាពាហ៍ពិពាហ៍នោះ ក៏មិនមែនងាយស្រួលដែរ បើយើងជាមនុស្សរឹងត្អឹង មានៈយកតែអារម្មណ៍ខ្លួនជាធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជីវិតគូ ទាមទារឲ្យសិក្សាស្វែងយល់ពីគ្នាឥតលក្ខខ័ណ្ឌ ចេះអភ័យទោស យោគយល់ពីគ្នា ដឹងថាដៃគូស្រលាញ់ឬស្អប់អ្វីជាងគេ ចេះលើកដំកើងគ្នា គោរពសិទ្ធគ្នាទៅមក។ នោះទើបជាមន្តស្នេហ៍ពិត ដែលអាចជួយរក្សាអ្នកទាំងពីរឲ្យនៅតែស្រលាញ់គ្នាជានិរន្តរ៍។

១ ទុកចិត្តគ្នាទៅវិញទៅមក នៅក្នុងទំនាក់ទំនង ការជឿទុកចិត្តគឺជាទិដ្ឋភាពសំខាន់បំផុត។ នៅពេលអ្នកសម្រេចចិត្តក្នុងទំនាក់ទំនង មានន័យថាអ្នកជឿជាក់លើដៃគូហើយ ពីព្រោះការទុកចិត្ត គួរតែរីកចម្រើនក្នុងទំនាក់ទំនងជានិច្ច។ លោក Randy Skilton ដែលជាអ្នកអប់រំអំពីទំនាក់ទំនងបាននិយាយថា ការជឿទុកចិត្តក៏ជាគន្លឹះក្នុងការបង្កើតទំនាក់ទំនងយូរអង្វែងផងដែរ។ ហេតុដូច្នេះហើយ ធ្វើឲ្យការជឿទុកចិត្តនេះ ជាអប្បបរមាដែលត្រូវធ្វើក្នុងទំនាក់ទំនងជានិច្ច។

២ ការគោរព និងការអភ័យទោសគ្នាទៅវិញទៅមក គួរតែគោរពដៃគូរបស់អ្នក នៅពេលអ្នកមានទំនាក់ទំនងស្នេហា។ មួយក្នុងចំណោមពួកគេ គឺដោយការមិនជ្រៀតជ្រែកក្នុងភាពឯកជនរបស់ប្តី-ប្រពន្ធ។ លើសពីនេះទៀត អ្នកក៏ត្រូវតែមានអាកប្បកិរិយានៃការអភ័យទោស នៅក្នុងទំនាក់ទំនងដែលកំពុងត្រូវបានអនុវត្ត។ កុំខ្លាចក្នុងការសុំទោស នៅពេលអ្នកធ្វើខុស ហើយកុំខ្លាចក្នុងការអភ័យទោសដល់ដៃគូរបស់អ្នកដូចគ្នា។

៣ កុំគ្រប់គ្រងដៃគូ ទោះបីជាអ្នកកំពុងមានទំនាក់ទំនងស្នេហាក៏ដោយ អ្នកត្រូវតែដឹងថាដៃគូមានជីវិតផ្ទាល់ខ្លួនរបស់គាត់។ ដូច្នេះហើយ កុំព្យាយាមគ្រប់គ្រងជីវិតដៃគូ ហើយត្រូវប្រាកដថា ការសម្រេចចិត្ត និងច្បាប់ទាំងអស់ត្រូវបានពិភាក្សាជាមុន។ នេះគឺដោយសារតែទំនាក់ទំនងរវាងភាគីទាំងពីរ និងបញ្ហាទាំងអស់នៅក្នុងទំនាក់ទំនង ត្រូវតែត្រូវបានពិភាក្សាដោយភាគីទាំងពីរផងដែរ។

៤ ការទទួលយក និងការអត់ឱនឲ្យគ្នា កាលណាយើងមានទំនាក់ទំនងយូរអង្វែង នោះយើងនឹងដឹងអំពីដៃគូរបស់យើងកាន់តែខ្វះខាត។ ដូច្នេះ វាជារឿងសំខាន់ក្នុងការអត់ធ្មត់ និងទទួលយកដៃគូថាពួកគេជានរណា។ ការអត់ឱន និងការទទួលយកការខ្វះខាតរបស់គ្នាទៅវិញទៅមក នឹងធ្វើឲ្យទំនាក់ទំនងមានរយៈពេលយូរ។ ដូច្នេះហើយ គ្មានអ្វីខុសទេ ក្នុងការអធ្យាស្រ័យគ្នាទៅវិញទៅមក ចំពោះអ្វីដែលជាកម្មសិទ្ធិរបស់ដៃគូ ព្រោះជាមូលដ្ឋាន យើងមិនមានលទ្ធភាពផ្លាស់ប្តូរដៃគូទៅជាអ្វីដែលយើងចង់បាននោះទេ។

៥ ការប្តេជ្ញាចិត្ត ការប្តេជ្ញាចិត្តគឺជាអប្បបរមាជាមូលដ្ឋានបំផុតនៅក្នុងទំនាក់ទំនង។ ប្រសិនបើគ្មានការតាំងចិត្តទេ នោះគ្មានទំនាក់ទំនងទេ ព្រោះការចាប់ផ្ដើមនៃការបង្កើតទំនាក់ទំនង គឺជាការប្តេជ្ញាចិត្តពីភាគីទាំងពីរ។ ប្រសិនបើអ្នកចង់ឲ្យទំនាក់ទំនងរបស់អ្នកស្ថិតស្ថេរយូរអង្វែង ចូរប្រាកដថា អ្នកតែងតែបណ្ដុះការប្តេជ្ញាចិត្តក្នុងទំនាក់ទំនង ជាពិសេសប្រសិនបើអ្នកចង់ឲ្យទំនាក់ទំនងនេះ ស្ថិតស្ថេររហូតដល់ជីវិតអាពាហ៍ពិពាហ៍។

ជារួម ដូចនិយាយខាងលើ ជីវិតគូទាមទារឲ្យសិក្សាពីគ្នាណាស់ ទម្រាំអ្នកទាំងពីរចូលដល់ផ្លូវមង្គលរួមគ្នា។ មិនមែនឲ្យតែមានក្ដីស្រលាញ់ គឺគ្រប់គ្រាន់នោះទេ។ អ្នកទាំងពីរត្រូវធ្វើអ្វីៗរួមគ្នា ទាំងទុក្ខលំបាកនិងភាពសប្បាយរីករាយ ទើបដឹងថាថ្ងៃដែលឈឺចាប់ ថ្ងៃដែលយើងដួល យើងមានមនុស្សម្នាក់នៅពីក្រោយចាំផ្ដល់កម្លាំងចិត្តជានិច្ច។ នេះគឺជាមោទកភាពសម្រាប់ជីវិតដៃគូស្នេហារបស់អ្នក៕

ប្រែសម្រួល៖ សាង ស្រីល័ក្ខ

ចុចអាន៖ទម្លាប់សាមញ្ញ ៤ យ៉ាង ធ្វើឲ្យជីវិតគូកាន់តែមានសុភមង្គល

ចុចអាន៖រឿង ៨ យ៉ាង គួរដឹង មុនពេលអ្នកចាប់ផ្តើមស្រលាញ់នរណាម្នាក់