KPT+

ចង់បានទំនាក់ទំនងដល់ចាស់ មិនមែនស្នេហាភ្លើងចំបើង អានគន្លឹះ ៤ នេះ

បានផុស

៤ years មុន

នៅ

ថ្ងៃព្រហស្បតិ៍ ២០ តុលា ២០២២

ដោយ

សម័យនេះទំនើបណាស់ សូម្បីតែក្ដីស្រលាញ់ក៏ត្រូវដើរឲ្យទំនើបតាមគ្នា ខណៈគូស្នេហ៍មួយចំនួនតែងបង្ហាញថា ស្រលាញ់គ្នាខ្លាំងបាត់មុខមិនបាន ប៉ុន្តែផ្ទុយវិញ ស្រាប់តែប្រកាសបែកគ្នារកលេសត្រូវរៀងៗខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្បិតថាមានគូស្នេហ៍ខ្លះមិនសមប្រកបក្ដី តែក៏មានគូស្នេហ៍មួយចំនួនស្រលាញ់គ្នាបានយូរ រហូតដល់ចាស់ៗរៀងខ្លួនក៏មាន។ តើអ្វីដែលសំខាន់បំផុត សម្រាប់គូស្នេហ៍បច្ចុប្បន្ន ដែលចង់រក្សាទំនាក់ទំនងមួយនេះបានយូរ មិនមែនជាស្នេហាភ្លើងចំបើង។ ខាងក្រោមនេះ ជាអាថ៌កំបាំងពីគូស្នេហ៍ដែលធ្លាប់មានបទពិសោធន៍ និងបានរក្សាជីវិតស្នេហាដ៏យូរអង្វែងដល់គ្នា ជាពិសេសគឺការរស់ចុះសម្រុងគ្នាតែម្ដង។

១ រក្សាគម្លាត ឬចម្ងាយពីគ្នាឲ្យត្រឹមត្រូវ (មិនឆ្ងាយពេកឬមិនជិតពេក)

គូស្នេហ៍ដែលមានទំនាក់ទំនងរយៈពេលយូរ មានទំនោររក្សាកម្រិតចម្ងាយសមរម្យពីគ្នា។ នៅពេលដែលយើងស្រឡាញ់គ្នា តែងចង់នៅក្បែរគ្នាគ្រប់ពេលវេលាមិនខាន។ ប៉ុន្តែការចំណាយពេលជាមួយគ្នាច្រើនពេកឬធ្វើអ្វីឲ្យដៃគូម្ខាងទៀតមិនពេញចិត្ត មិននិយាយអ្វីចូលត្រចៀកគ្នានោះអាចនឹងធ្វើឲ្យដៃគូខឹងឬតូចចិត្តនឹងពាក្យសម្ដីតូចតាច ។ ម៉្យាងទៀត វាក៏បង្កឲ្យមានជម្លោះកាន់តែញឹកញាប់ ប្រសិនបើយើងមិនរក្សាចម្ងាយត្រឹមត្រូវ ដៃគូម្ខាងទៀតនឹងគិតថា យើងជាមនុស្សរំខាន។ ការរក្សាចម្ងាយឲ្យបានត្រឹមត្រូវពីគ្នា គឺជារឿងចាំបាច់សម្រាប់ជីវិតគូស្នេហ៍ ដើម្បីមានពេលវេលាផ្ទាល់ខ្លួន និងពេលវេលាជាមួយគ្នា។ អ្នកមិនចាំបាច់តាមដានគ្នាគ្រប់ពេលនោះទេ ព្រោះគូស្នេហ៍មិនមែនជនជាប់ចោទ ដែលអ្នកត្រូវចោទសួរនោះទេ!

២ អ្វីក៏ដោយដែលអ្នកគិត សូមនិយាយវាឲ្យម្ខាងទៀតបានផង

នៅពេលដែលមានការមិនពេញចិត្ត មនុស្សជាច្រើនមានអារម្មណ៍ថាមិនចង់និយាយចេញ ព្រោះមិនចង់ប្រយុទ្ធឬទាស់សំដីតូចធំដាក់គ្នា។ ប៉ុន្តែវាសំខាន់ជាង បើយើងព្រមនិយាយប្រាប់គ្នា បើយើងមិនពេញចិត្តនឹងសង្សារយើង ហើយបន្តទ្រាំនឹងវាទៀតនោះ យើងនឹងក្លាយជាមនុស្សពូកែមួម៉ៅ ច្របូកច្របល់ក្នុងចិត្ត ហើយរង់ចាំថ្ងៃផ្ទុះឡើង រហូតដល់ពិបាកនឹងជួសជុលឡើងវិញ។ ផ្ទុយទៅវិញ បើយើងមិនពេញចិត្តនឹងអ្វីមួយ និង និយាយភ្លាម មិនចាំបាច់មានទម្រង់លាកពុតជាតួឯកទេ។ មនុស្សស្រលាញ់គ្នា នឹងអាចយល់ឬទទួលស្គាល់ ហើយប្រឹងស្រាយបញ្ហាភ្លាមៗដោយមិនបង្អង់យូរ។

៣ កុំមានអារម្មណ៍ពេក ឬរំពឹងទុកថាគូស្នេហ៍នឹងធ្វើនេះធ្វើនោះដើម្បីតែយើង

នេះជាវិធីមួយ ដើម្បីធ្វើឲ្យទំនាក់ទំនងកាន់តែយូរ។ នៅពេលដែលយើងនៅក្នុងទំនាក់ទំនង ជាការពិតណាស់ យើងនឹងមានការរំពឹងទុកពីគូស្នេហ៍។ ប្រសិនបើភាគីម្ខាងទៀតមិនប្រព្រឹត្តដូចការរំពឹងទុក យើងនឹងមានអារម្មណ៍តូចចិត្ត ខឹងសម្បា ហើយឈានទៅប្រើពាក្យគំរោះគំរើយភ្លាមៗ។ បើអ្នកមានអារម្មណ៍មិនពេញចិត្ត ចូរប្រយ័ត្នកុំប្រើអារម្មណ៍របស់អ្នកខ្លាំងពេក។ ព្យាយាមមានហេតុផលត្រឹមត្រូវ និងប្រយ័ត្នប្រយែងជាមួយនឹងពាក្យសម្ដី និងសកម្មភាពរបស់អ្នកចំពោះគូស្នេហ៍។

៤ កុំពឹងផ្អែកលើគ្នាទៅវិញទៅមកច្រើនពេក (រៀនធ្វើអ្វីដោយខ្លួនឯង)

វាជាការពិត ដែលទំនាក់ទំនងត្រូវតែពឹងផ្អែកលើគ្នាទៅវិញទៅមក ដើម្បីឲ្យកាន់តែស៊ីសង្វាក់គ្នា។ ប៉ុន្តែចំណុចសំខាន់មួយនៃគូស្នេហ៍ដែលមានទំនាក់ទំនងវែង គឺមិនសូវពឹងពាក់គ្នាខ្លាំងពេកទេ។ បើយើងតែងទម្លាប់ពឹងលើដៃគូ ដោយមិនព្រមធ្វើរឿងនោះដោយខ្លួនឯងសោះ ថ្ងៃណាមួយយើងនឹងស្ដាយក្រោយ។ ដូចពេលកំពុងញ៉ាំអាហារជាមួយគ្នា អ្នកសួរដៃគូថាចង់ញ៉ាំអី តែបែរជាឆ្លើយអ្វីទាំងអស់ដែលដៃគូចង់បាន។ ទោះបីជាយើងចង់ផ្គាប់ចិត្តគាត់ ឬញ៉ាំអ្វីគ្រប់យ៉ាងក៏ដោយ ប៉ុន្តែយូរៗទៅគាត់នឹងមានអារម្មណ៍ថា មានបន្ទុកខ្លាំងក្នុងការជ្រើសរើសភាពជាខ្លួនឯងរាល់ពេល។ ជំនួសឲ្យការពឹងផ្អែកលើគាត់ច្រើនពេក យើងគួរធ្វើវាដោយខ្លួនឯង ឬទុកជាយោបល់ខ្លះឲ្យម្ខាងទៀត។

សរុបមក ស្នេហាមួយដែលគង់វង្សនិងស្រលាញ់គ្នាបានយូរ មិនមែនពឹងផ្នែកលើសម្រស់ ភាពមានបានរបស់ម្ខាងៗ តែម៉្យាងនោះទេ។ ស្នេហាប្រៀបបាននឹងសម្លផ្សំគ្រឿងដូច្នោះដែរ បើអ្នកផ្សំត្រូវ អ្នកនឹងហូបឆ្ងាញ់មាត់ តែបើខុស អ្នកនឹងខកចិត្ត អស់ក្ដីរំពឹងលើរឿងដែលខ្លួនឯងចង់បាន។ លើលោកនេះ គ្មានគូស្នេហ៍ឯណាមិនចេះឈ្លោះគ្នានោះទេ! ប៉ុន្តែជម្លោះតែងនាំមកនូវដំណោះស្រាយ មិនមែនទុកចោលហើយមិនអើពើរៀងៗខ្លួនទេ។ យូរៗទៅអ្នកទាំងពីរនឹងបែកចិត្តឯង មិនចាំបាច់មានអ្នកណាមកបំបែកឡើយ៕

អត្ថបទ៖ សាង ស្រីល័ក្ខ

ចុចអាន៖៥ យ៉ាង ធ្វើឲ្យអតីតសង្សារអ្នកស្ដាយក្រោយខ្លាំង បន្ទាប់ពីបែកគ្នា

ចុចអាន៖គូស្នេហ៍ ៤ ប្រភេទ មនុស្សប្រុស-ស្រីតែងប្រថ្នាចង់ជួបទៅថ្ងៃអនាគត