ឈ្វេងយល់ពីការប្រើងារ Dr. និង Ph.D. ខណៈមានការចំអកការដាក់ងារ “Dr. Hun Manet”

ដោយសារឃើញ ការបង្ហោះ Facebook សើចចំអកការដាក់ងារ “Dr. Hun Manet” ចំពោះការប្រើងារ “បណ្ឌិត” របស់ ឯកឧត្តមបណ្ឌិត ហ៊ុន ម៉ាណែត, សាស្ត្រាចារ្យបណ្ឌិត ឥន សុផល បានលើកឡើងនៅថ្ងៃនេះដោយបញ្ជាក់ថា ការប្រើងារ “Dr. Hun Manet” ពិតជាត្រឹមត្រូវទៅតាមក្បួនខ្នាត បណ្ឌិត្យសភា Academy គឺមិនខុសនោះទេ ដោយអាចប្រើបានទាំងពីរប្រសិនបើលោករៀន Ph.D. គឺ Dr. Hun Manet ឬ Hun Manet, Ph.D. ។

សាស្ត្រាចារ្យបណ្ឌិត ឥន សុផល ជំនាញវិទ្យាសាស្ត្រនយោបាយ និងទំនាក់ទំនងអន្តរជាតិរយៈពេល ១៥ឆ្នាំ រូបនេះ បញ្ជាក់ការប្រើងារបណ្ឌិតថា៖

+ Doctor of Philosophy (Ph.D.) សរសេរនៅក្រោយឈ្មោះ។ ឧទាហរណ៍ៈ IN Sophal, Ph.D.

អ្នករៀន Ph.D. អាចប្រើពាក្យ Dr. នៅពីមុខឈ្មោះក៏បានដែរ ដោយយោងទៅលើពាក្យ Doctor ពីអតីត មានន័យថា Doctor of Philosophy។ ប៉ុន្តែអ្នករៀន Doctor of Philosophy ភាគច្រើនចូលចិត្តប្រើងារ Ph.D. ជាងងារ Dr. ព្រោះមានក្រេឌីតខ្ពស់ជាង។

+ Professional Doctorate (Dr.) សរសេរងារបានតែនៅពីមុខឈ្មោះ ឧទាហរណ៍ៈ Dr. Chan Dara ។ ប៉ុន្តែអ្នករៀន Professional Doctorate មិនអាចប្រើងារ Ph.D. ដាក់នៅពីក្រោយឈ្មោះបានទេ ប្រើបានតែ Dr. ប៉ុណ្ណោះ។

ចំណែក វេជ្ជបណ្ឌិត ក៏ប្រើពាក្យ (Dr.) បានដែរ ដោយសារវេជ្ជបណ្ឌិតស្ថិតនៅក្នុងជំនាញ Professional Doctorate (Dr.)។ ប៉ុន្តែមិនអាចប្រើ (Ph.D.) ដាក់នៅពីក្រោយឈ្មោះបានទេ។

សាស្ត្រាចារ្យបណ្ឌិត ឥន សុផល បញ្ជាក់ថា ប្រសិនចង់ដឹងកាន់តែច្បាស់ សូមរង់ចាំអានសៀវភៅពិធីការការទូត និងពិធីការអាស៊ាន។ សៀវភៅនេះមានប្រយោជន៍សម្រាប់មន្ត្រីរាជការ និងវិស័យឯកជន ដើម្បីយល់ដឹងពីពិធីការ និងរបៀបរស់នៅ, ធ្វើការនៅក្នុងសង្គមស៊ីវីល័យ និងទំនាក់ទំនងអន្តរជាតិ៕

អត្ថបទ​៖ ច័ន្ទ វីរៈ