បន្ទាប់ពីអាយុ ៦ខែឡើងទៅ កូនក្មេងចាប់ផ្ដើមគេងលក់ស្រួលពេញលេញពេលយប់ហើយ យ៉ាងណាក្ដីការភ្ញាក់យប់ឡើងនៅតែអាចរើឡើងរហូតដល់អាយុចូលរៀន ។ ជាដំបូងអ្នកត្រូវដឹងច្បាស់សិនពីមូលហេតុដែលនាំឲ្យកូនតូចងើបពេលយប់ យោងទៅតាមសមាគមន៍គ្រូពេទ្យកុមារអ៊ីតាលីបានប្រាប់ពីគន្លឹះ ១០ ដើម្បីឲ្យកូនក្មេងមានទម្លាប់គេងល្អ និងគេងលក់ស្រួលរួមមាន៖

១. គេងឲ្យទៀងម៉ោង

កូនក្មេងគួរគេងចន្លោះម៉ោង ៨-៩យប់ ជារៀងរាល់ថ្ងៃ ។ ជៀសវាងគេងឆ្លាស់ម៉ោងនាំឲ្យទម្លាប់គេងរញ៉េរញ៉ៃធ្វើឲ្យពិបាកគេងលក់ និងគេងមិនគ្រប់គ្រាន់ ។

២. គេងនៅកន្លែងដដែល

ការពារកូនកុំឲ្យគេងលក់នៅលើសាឡុង ឬគ្រែប៉ាម៉ាក់ឲ្យសោះ និយាយរួមឲ្យតែខុសពីកន្លែងគេងរបស់កូន ។ ទង្វើដាក់ឲ្យកូនគេងឆ្លាស់កន្លែងនាំឲ្យកូនមានទម្លាប់គេងមិនល្អ និងមិនទៀងទាត់ ។

៣. ញែកឲ្យដាច់រវាងការញ៉ាំអាហារ និងការគេង

ជាក់ស្តែង វាមិនអាចអនុវត្តចំពោះកូនក្មេងប៉ុន្មានខែដំបូងឡើយ ។ ប៉ុន្តែពេលធំបន្តិចអ្នកគួរធ្វើការសង្កេតពីការងងុយរបស់ក្មេងនិងបញ្ឈប់ការបញ្ចុកទឹកដោះគោបណ្ដើរ ដាក់ឲ្យគេងបណ្ដើរ ។

៤. ដាក់កាលវិភាគអាហារប្រចាំថ្ងៃ និងអាហារសម្រន់ឲ្យច្បាស់លាស់

ទម្លាប់គេងទទួលការជះឥទ្ធិពលពីទម្លាប់ពេលថ្ងៃដូចគ្នា ដូច្នេះការគេង និងការញ៉ាំអាហារ សុទ្ធតែសំខាន់សម្រាប់ទម្លាប់រស់នៅ ។

៥. មិនឲ្យកូនប្រើគ្រឿងអេឡិចត្រូនិចបន្ទាប់ពីអាហារពេលល្ងាច

គ្រឿងអេឡិចត្រូនិចផ្ដល់ផលប៉ះពាល់អវិជ្ជមានដល់ការគេង និងការភ្ញាក់របស់មនុស្ស មិនថាជាកុមារ ឬមនុស្សពេញវ័យឡើយ ។ បើមិនអាចអត់សោះ ហោចណាស់ឈប់ប្រើមុនគេង ១ម៉ោងក៏ល្អដែរ ។

៦. កុំឲ្យកូនញ៉ាំច្រើនពេក ឬផឹកទឹកច្រើនពេកមុនចូលគេង

បន្ទាប់ពីយើងញ៉ាំឆ្អែតហើយទៅគេង វាមិនស្ងប់ទេដោយសារតែ ការចាល់អាស៉ីត និងការរំលាយអាហារ ។ 

៧. គ្រប់គ្រងពន្លឺ

វិធីល្អបំផុតគឺដាក់ឲ្យកូនគេងក្នុងបន្ទប់ងងឹត ប៉ុន្តែពេលព្រឹកត្រូវបើកវាំងនន ឬភ្លើងឲ្យភ្លឺខុសផ្ទុយដាច់ស្រឡះពីពេលយប់ ។ 

៨. ចៀសវាងជាតិកាហ្វេអ៉ីនបន្ទាប់ពីម៉ោង ៤ល្ងាច

ហាមទទួលទានសូកូឡា ឬភេសជ្ជៈដែលផ្ទុកជាតិកាហ្វេអ៉ីនដូចជា តែ និងទឹកក្រូចកំប៉ុងជាដើម ។

៩. ជំរុញរបបអាហារឲ្យមានតុល្យភាព

ដរាបណារបបអាហារមានតុល្យមាន ទម្លាប់គេង និងទម្លាប់រស់នៅផ្សេងៗទៀតក៏ល្អទៅតាមអាហារដែរ ។  

១០. កុំឲ្យគេងជាមួយ 

អាយុចាប់ពី ៨ខែឡើងទៅ ប៉ាម៉ាក់គួរបំបែកបន្ទប់គេងរបស់កូនឲ្យនៅដាច់ដោយឡែក ។ បើកូនទាមទារវត្តមានរបស់ឪពុកម្ដាយកណ្ដាលយប់ អ្នកត្រូវលួងលោមឲ្យកូនគេងនៅគ្រែរបស់គាត់វិញដដែល ៕

ប្រែសម្រួលដោយ ៖ វារី

ចុចអាន ៖ គួរដឹងអំពី SIDS ឬ​ អាការ ធ្វើឲ្យទារក បាត់បង់ជីវិតភ្លាមៗដោយគ្មានមូលហេតុ

ចុចអាន ៖ គ្រូពេទ្យហាមមិនឲ្យប្រើម្សៅហ៊ុយលើទារកដាច់ខាត ព្រោះអាចបង្កគ្រោះថ្នាក់