មកដឹងលម្អិតពីកម្មវិធី Met Gala ឆ្នាំ ២០២៣ ខាងមុននេះ

កម្មវិធី Met Gala ព្រឹត្តិការណ៍ជួបជុំតារាល្បីៗតែងខ្លួនជាមួយសម្លៀកបំពាក់ប្លែកៗទាន់សម័យឆ្នាំមុនពិតជាមិនអានបំភ្លេចបានទេ ។ ចាំមើលទាំងអស់គ្នាថាឆ្នាំនេះមានអ្វីថ្មីសម្រាប់ Met Gala ហើយខាងក្រោមនេះជាអ្វីដែលអ្នកតាមដានគួរដឹងពីកម្មវិធីឆ្នាំនេះ ៖

១. ថ្ងៃធ្វើកម្មវិធី

Met Gala នឹងធ្វើឡើងវេលាថ្ងៃច័ន្ទ ទី១ ខែឧសភា នៅទីក្រុងញូវយ៉ក ។ ចាប់តាំងពីឆ្នាំ ២០០៥ មក គេធ្វើវារៀងរាល់ថ្ងៃច័ន្ទដំបូងក្នុងខែឧសភា រហូតក្លាយជាទម្លាប់លើកលែងតែឆ្នាំ ២០២០ ដែលត្រូវរំសាយ និងឆ្នាំ ២០២១ ដែលត្រូវលើកទៅខែកញ្ញាវិញដោយសារការរាតត្បាតសកល ។

២. ប្រធានបទ

ប្រធានបទសម្រាប់ឆ្នាំ ២០២៣ គឺ “Karl Lagerfeld : A Line of Beauty” ដើម្បីគោរពវិញ្ញាណក្ខន្ធអ្នករចនាម៉ូដដ៏ល្បីល្បាញម្នាក់គឺ Karl Lagerfeld ដែលបានទទួលមរណភាពក្នុងឆ្នាំ ២០១៩ ។  ចំណែកឯកូដសម្លៀកបំពាក់វិញគឺ “In honour of Karl” ។

៣. ម្ចាស់ផ្ទះ

កាលពីថ្ងៃទី១៨ ខែមករា ទស្សនាវដ្ដី Vogue បានប្រកាសថា Met Gala ២០២៣ មានម្ចាស់ផ្ទះដូចជា Penélope Cruz, Michaela Coel, Roger Federer, Dua Lipa និង Anna Wintour ។ 

៤. ការផ្សាយផ្ទាល់

អ្នកតាមដានអាចទស្សនាសកម្មភាពក្នុងកម្មវិធីនៅលើការផ្សាយផ្ទាល់ពី Vogue.com ដដែល ។

៥. គោលបំណងកម្មវិធី

គេចាត់ទុកថាវាជាកម្មវិធីរៃអង្គាសប្រាក់សម្រាប់វិទ្យាស្ថានសំលៀកបំពាក់របស់សារមន្ទីរសិល្បៈ Metropolitan ។ គិតមកដល់បច្ចុប្បន្ន ចំនួនទឹកប្រាក់ឡើងដល់ទៅ ៨ខ្ទង់ឯណោះ ។

បើចង់ដឹងថាឆ្នាំនេះមានព្រឹត្តិការណ៍អ្វីថ្មីហើយប្លែកមានតែវិធីតែមួយគត់គឺរង់ចាំទស្សនា និងតាមដានហាមអាក់ខានឲ្យសោះទើបអាចដឹងច្បាស់ ៕

ប្រែសម្រួលដោយ ៖ វារី

ចុចអាន ៖ កម្រាលព្រំក្រហម Met Gala ឆ្នាំ ២០២១ មិនត្រឹមតែការស្លៀកពាក់ប្លែក សូម្បីម៉ូដសក់​ ក៏ប្រសិទ្ធិនាមថា ” សាហាវ “