KPT+

ដោះស្រាយបញ្ហាស្បែកស្រអាប់មិនភ្លឺថា្ល ជាមួយ រូបមន្តម៉ាសឆៃថាវក្រហម

បានផុស

២ សប្តាហ៍ មុន

នៅ

ថ្ងៃអង្គារ ២១ កុម្ភៈ ២០២៣

ដោយ

បើគ្នាយើងហត់នឿយនឹងបញ្ហាស្បែកស្រអាប់មិនភ្លឺថ្លា ទោះជាប្រើផលិតផលអ្វីក៏នៅតែមិនបាត់នោះ អាចសាកល្បងប្រើម៉ាសបន្លែទាំង៣រូបមន្ត ដែលណែនាំដោយគ្រូពេទ្យជំនាញខាងសើស្បែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែង ឆៃថាវក្រហមផ្ទុកទៅដោយសារធាតុចិញ្ចឹម ដែលមានគុណប្រយោជន៍ដ៏អស្ចារ្យចំពោះស្បែក។ បន្លែមួយប្រភេទនេះ អាចជួយរក្សាភាពយឺតនៃស្បែក និងពន្យារភាពចាស់។ អ៊ីចឹងហើយ ដើម្បីបានស្បែកភ្លឺថ្លា ទន់ម៉ត់រលោងពីខាងក្នុង គ្នាយើងអាចសាកល្បងប្រើរូបមន្តម៉ាសឆៃថាវក្រហមទាំងនេះ។

១. ម៉ាសឆៃថាវក្រហម និងការ៉ុត

ម៉ាសមួយនេះ អាចជួយឲ្យស្បែកភ្លឺថ្លាក្នុងរយៈពេល២ ទៅ៣សប្តាហ៍។

វិធីធ្វើ៖

លាយទឹកឆៃថាវក្រហម និងការ៉ុតក្នុងបរិមាណដូចគ្នា រួចចាក់ចូលទៅក្នុងប្រដាប់ដាក់ទឹកឲ្យកកក្នុងទូរទឹកកក។
ត្រដុសដុំឆៃថាវក្រហម និងការ៉ុតជារៀងរាល់ព្រឹកនៅលើស្បែក រួចទុកចោលរយៈពេល១០ ទៅ១៥នាទី ទើបលាងជម្រះចេញជាមួយនឹងទឹកក្តៅឧណ្ហៗ។ បន្ទាប់មក លាបក្រែមផ្តល់សំណើមដល់ស្បែកជាការស្រេច។

២. ម៉ាសឆៃថាវក្រហម និងទឹកដោះគោជូរ

ចំណែកម៉ាសប្រភេទនេះវិញ មានតួនាទីជួយឲ្យស្បែកទន់រលោង និងក្មេងជាងវ័យ។

វិធីធ្វើ៖

លាយទឹកឆៃថាវក្រហមចំនួន៤ស្លាបព្រាបាយ និងទឹកដោះគោជូរចំនួន៣ស្លាបព្រាបាយ
លាបនៅលើមុខ និងក ដោយទុកចោលរយៈពេល១៥នាទី
លាងជម្រះចេញជាមួយនឹងទឹកក្តៅឧណ្ហៗ។

៣. ម៉ាសឆៃថាវក្រហម និងសំបកក្រូច

ដើម្បីជួយឲ្យស្បែកភ្លឺរលោងបែបធម្មជាតិ គ្នាយើងមិនគួររំលងម៉ាសមួយប្រភេទនេះឡើយ។

វិធីធ្វើ៖

ចិតសម្បកក្រូច រួចលាងទឹកឲ្យស្អាត សឹមយកទៅហាលថ្ងៃឲ្យស្ងួត រួចកិនជាម្សៅ
កិនម្សៅសម្បកក្រូចចំនួន២ស្លាបព្រាបាយ និងទឹកឆៃថាវក្រហមចំនួន១ស្លាបព្រាបាយ
លាបនៅលើផ្ទៃមុខ និងក រួចទុកចោលរហូតដល់ស្ងួត
លាងជម្រះជាមួយនឹងទឹកត្រជាក់ជាការស្រេច។ គ្នាយើងអនុវត្តន៍វិធីសាស្ត្រនេះ ជារៀងរាល់២ថ្ងៃម្តង។

ជាទូទៅ ឆៃថាវក្រហមមិនបង្កផលប៉ះពាល់ដល់ស្បែកឡើយ។ ប៉ុន្តែ មុនពេលអនុវត្តរូបមន្តធម្មជាតិទាំងនេះ យើងគួរលាបសាកល្បងនៅលើដៃជាមុនសិន។ ជាមួយគ្នានេះដែរ សម្រាប់អ្នកដែលបញ្ហាស្បែករ៉ាំរ៉ៃ គួរតែពិគ្រោះយោបល់ជាមួយនឹងគ្រូពេទ្យជំនាញខាងសើស្បែកជាមុនសិន ទើបជាការប្រសើរ៕