ពិព័រណ៍ជំនាញ និងការងារផ្នែកធនាគារ នឹងរៀបចំនៅចុងខែនេះ

កម្មវិធីពិព័រណ៍ជំនាញ និងការងារ ក្នុងវិស័យធនាគារ នឹងរៀបចំឡើងនៅថ្ងៃទី២៩ ទី៣០ ខែកញ្ញា ឆ្នាំ២០២៣ នៅសាកលវិទ្យាល័យជាតិគ្រប់គ្រង។ កម្មវិធីនេះ រៀបចំជាលើកដំបូងដោយវិទ្យាស្ថានធនាគារ និងហិរញ្ញវត្ថុ ដោយមានការសហការជាមួយសមាគមធនាគារនៅកម្ពុជា (ABC) សាកលវិទ្យាល័យជាតិគ្រប់គ្រង និងមជ្ឈមណ្ឌលការងារនៃសាកលវិទ្យាល័យជាតិគ្រប់គ្រង។

ពិព័រណ៍ការងារក្នុងវិស័យធនាគារនេះ ធ្វើឡើង ដើម្បីឆ្លើយតបនឹងធនធានមនុស្សដែលមានការកើនឡើងខ្លាំងក្នុងវិស័យធនាគារ ផ្តល់វេទិកាដល់គ្រឹះស្ថានធនាគារ និងហិរញ្ញវត្ថុ ក្នុងការបង្ហាញឱកាសការងារ និងពង្រឹងជំនាញ ការអភិវឌ្ឍខ្លួនដល់សិស្សនិស្សិត និងសាធារណជនទូទៅ។ ផ្តល់ឱកាសដល់សិស្សនិស្សិតបានជួបពិគ្រោះយោបល់ជាមួយគ្រឹះស្ថានធនាគារ លើជំនាញរបស់ពួកគេ ដើម្បីឱ្យទទួលបានចំណេះដឹងបន្ថែមលើជំនាញក្នុងវិស័យធនាគារ។ ក្រៅពីនេះ ក៏ផ្តល់ជាវគ្គបណ្តុះបណ្តាលខ្លីៗដល់អ្នកចូលរួម ពាក់ព័ន្ធទៅនឹងការអភិវឌ្ឍខ្លួន ភាពជាអ្នកដឹកនាំ ការធ្វើការងារជាក្រុម ជំនាញឌីជីថល និងជំនាញផ្សេងៗទៀត សម្រាប់ឱ្យពួកគេមានការអភិវឌ្ឍលើជំនាញរៀងៗខ្លួន។

នៅក្នុងពិព័រណ៍នេះ មានគ្រឹះស្ថានធនាគារ និងហិរញ្ញវត្ថុចំនួន ១៧ ចូលរួម ព្រមជាមួយនឹងកម្មវិធីជាច្រើនទៀតដូចជាបទបង្ហាញពីឱកាសការងារ វគ្គបណ្តុះបណ្តាលខ្លីៗ  និងមានជាការសម្ភាស និងជ្រើសរើសបុគ្គលិកដែលមានសមត្ថភាពអាចបម្រើការងារបាននៅក្នុងកម្មវិធីនេះផងដែរ៕