អាថ៌កំបាំង​ធ្វើ​ឲ្យមុខ​ស្ដើង​ ដោយ​មិន​ចាំ​បាច់​ប្រើ​កាំបិត

មែនទែនទៅការធ្វើឲ្យទម្រង់មុខតូចស្លីមមិនមែនជារឿងពិបាកនោះទេ អ្វីដែលសំខាន់នោះគឺជាការអនុវត្តតាមវិធីរបស់អ្នកជំនាញឲ្យបានត្រឹមត្រូវតែប៉ុណ្ណោះ។ ជាពិសេស​ ការ​មាន​ទម្រង់​មុខ​ស្ដើង​មិន​អាច​ទៅ​រួច​ទេ ប្រសិន​បើ​អ្នក​រក្សា​អាថ៌កំបាំង​ពិសេស ៨ យ៉ាងខាងក្រោមនេះឲ្យក្លាយជាទម្លាប់។

១ ផឹកទឹកឲ្យបានគ្រប់គ្រាន់

នៅពេលដែលខ្ជិលផឹកទឹក រាងកាយនឹងជំរុញការរក្សាទឹកឲ្យកើនឡើង ដើម្បីរក្សាមុខងារនៃសរីរាង្គ។ នេះដោយអចេតនាធ្វើឲ្យស្ត្រីស្រស់ស្អាត ធ្លាក់ចូលទៅក្នុងស្ថានភាពមួយចំនួនដូចជាការហើមមុខ។ ម្យ៉ាងវិញទៀត ទឹកមិនត្រឹមតែរួមចំណែកក្នុងការជួយការពារជំងឺទាំងនេះប៉ុណ្ណោះទេ វាថែមទាំងនាំមកនូវការប្រើប្រាស់ជាច្រើនទៀតដូចជា បន្សាបជាតិពុល បន្សុទ្ធរាងកាយ និងរក្សាស្បែកសរលោង។ បរិមាណទឹកដែលគួរផ្គត់ផ្គង់ដល់រាងកាយជារៀងរាល់ថ្ងៃ គួរតែមានពី ២ ទៅ ២.៥លីត្រ។

២ កំណត់ការទទួលទានអាហារប្រៃដែលមានអំបិលច្រើន

នៅពេលដែលអ្នកផ្ទុកអំបិលច្រើនចូលទៅក្នុងខ្លួនរបស់អ្នក លើសពីកម្រិតកំណត់ វានឹងបង្កើនការប្រមូលផ្តុំនៅក្នុងឈាម។ នៅពេលនោះ ទឹកនឹងកកកុញក្នុងរាងកាយ ធ្វើឲ្យមុខហើម យារធ្លាក់ និងប្រែជារាងមូលបន្តិច។ យោងតាមអនុសាសន៍របស់អ្នកជំនាញ អ្នកគួរតែទទួលទានអំបិលតិចជាង៥ក្រាមក្នុងមួយថ្ងៃ។

៣ បន្ថែមអាហារសម្បូរជាតិសរសៃ និងកាល់ស្យូមទៅក្នុងរបបអាហារ​

របប​អាហារ​ក៏​មាន​តួនាទី​សំខាន់​ក្នុង​ការ​ជួយស្ត្រី​ស្អាត​​ រក្សា​ទម្រង់​មុខ​រាង​ស្លីម។ អាហារសម្បូរជាតិកាល់ស្យូម ឬជាតិសរសៃ នឹងជួយការពារការឡើងទម្ងន់ និងកាត់បន្ថយជាតិខ្លាញ់លើសនៅលើចង្កា និងថ្ពាល់។ ដូច្នេះហើយ អ្នកគួរតែបន្ថែមបន្លែបៃតង ផ្លែឈើឲ្យបានច្រើនទៅក្នុងមុខម្ហូបប្រចាំថ្ងៃរបស់អ្នក។

៤ ​ចូលគេងទាន់ពេល

ការ​គេង​មិន​បាន​គ្រប់គ្រាន់ និង​ទាន់​ពេល​មួយ​ផ្នែក​ធ្វើ​ឲ្យស្ត្រី​ឡើង​ទម្ងន់ និង​មាន​ចង្កា​ពីរ។ នៅពេលនោះ អ័រម៉ូនក្នុងរាងកាយនឹងផ្លាស់ប្តូរ ដែលនាំឲ្យមានបញ្ហា។ ការចូលគេងយឺតក៏បង្កើនចំណង់អាហារផងដែរ។​ នេះជួនកាលបណ្តាលឲ្យស្ត្រីជារឿយៗញ៉ាំនៅពេលយប់​ ហើយការញ៉ាំនៅពេលយប់គឺជាមូលហេតុនៃការលើសទម្ងន់និងធ្វើឲ្យមុខរបស់ពួកគេមានរាងមូល។

៥ នៅឲ្យឆ្ងាយពីគ្រឿងស្រវឹង​

ការផឹកស្រាជាប្រចាំ នឹងជាមូលហេតុចម្បងដែលនាំឲ្យរាងកាយប្រឈមនឹងកត្តាដែលបង្កគ្រោះថ្នាក់ដល់សុខភាព។ មិនត្រឹមតែប៉ុណ្ណោះ វាថែមទាំងធ្វើឲ្យមុខរបស់អ្នកប្រឈមនឹងការរក្សាជាតិទឹក និងហើម ដែលនាំឲ្យមើលទៅមុខមិនស្អាត។

៦ ឧស្សាហ៍ធ្វើលំហាត់លើកមុខ

បន្ថែមពីលើផលប៉ះពាល់ខាងក្នុង ភាពស្រស់ស្អាតក៏ត្រូវតែមានផលប៉ះពាល់ខាងក្រៅផងដែរ ដើម្បីជួយឲ្យមុខរបស់ពួកគេកាន់តែស្តើងតាមរយៈការធ្វើលំហាត់ប្រាណលើកមុខដោយឧស្សាហ៍ព្យាយាម។ លំ​ហាត់ប្រាណ​ទាំងនេះ​ជួយ​ជំរុញ​ចរាចរ​ឈាម ធ្វើឲ្យផ្ទៃមុខ​ទន់​រលោង និង​មាន​តុល្យភាព​ជាង​មុន​។ អ្នកគួរតែរក្សាលំហាត់ប្រាណ ១៥ ទៅ ២០ នាទីជារៀងរាល់ថ្ងៃ។

៧ ទំពារស្ករកៅស៊ូ

ការទំពារស្ករកៅស៊ូជាប្រចាំ នឹងធ្វើឲ្យថ្គាមដំណើរការជាបន្តបន្ទាប់ កាត់បន្ថយហានិភ័យនៃការកកកុញច្រើននៅតំបន់ថ្ពាល់ និងចង្កា ជួយឲ្យផ្ទៃមុខកាន់តែស្តើង។

៨ លាបទឹកកក​

ទឹកកក​ត្រជាក់​មាន​សមត្ថភាព​បង្រួម​រន្ធ​ញើស ប៉ះពាល់​យ៉ាង​ខ្លាំង​ដល់​សាច់ដុំ​មុខ និង​កម្ចាត់​ការ​ប្រមូលផ្តុំ​ជាតិ​ខ្លាញ់​លើស​នៅលើ​ចង្កា។ ជារៀងរាល់ថ្ងៃ អ្នកគ្រាន់តែម៉ាស្សាទឹកកកលើមុខពីរដង ១០ នាទីម្តង ដើម្បីទទួលបានមុខស្ដើងយ៉ាងឆាប់រហ័ស៕

អត្ថបទ៖ សាង ស្រីល័ក្ខ

ចុចអាន៖អាហារកំពូលទាំង ៥ ស្រីៗញ៉ាំជាប្រចាំ បានទាំងរាងស្អាត និងរឹងមាំពីខាងក្នុង