Connect with us

KPT+

អូបាម៉ា បណ្ដើរភរិយាស្រស់ស្រូប​អាហារបង្អួតភាពផ្អែមល្ហែម បញ្ចប់​ភាព​​សង្ស័យ​បែកបាក់​គ្នា​

បានផុស

នៅ

អតីត​ប្រធានាធិបតី​អាមេរិក លោក បារ៉ាក់ អូបាម៉ា និង​ភរិយា មីឆែល ​ត្រូវ​បាន​គេ​ប្រទះ​ឃើញ​កំពុង​ទទួល​ទានអាហារ​ពេល​ល្ងាច​ជាមួយ​គ្នាយ៉ាង​ផ្អែមល្ហែម​​ស្និទ្ធស្នាល​​មិនធ្លាប់​បាន​ឃើញ​ជាសាធារណៈ​។ កន្លង​មក ​អ្នក​ទាំង​ពីរ​ធ្លាប់មាន​ពាក្យ​ចចាម​អារ៉ាម​ថា​ ​លែង​លះ​គ្នាស្ងាត់ៗ ​ព្រោះ​តែ​កម្រឃើញបណ្ដើរគ្នាអស់ជាច្រើន​ខែមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពី ថ្ងៃទី ២១ ខែមេសា គណនី TikTok មួយ បានចែករំលែកវីដេអូដែលថតពីទិដ្ឋភាពរបស់អតីត​ប្រធានាធិបតី​អាមេរិក និងអតីតជំទាវទីមួយ កំពុងទទួលទានអាហារពេលល្ងាចជាមួយគ្នាយ៉ាងផ្អែមល្ហែម។

នៅក្នុងវីដេអូ បុរសវ័យ៦៣ឆ្នាំ និងភរិយាដើរចុះតាមជណ្តើរ បន្ទាប់ពីទទួលទានអាហារនៅក្នុងបន្ទប់ឯកជនមួយ នៅឯភោជនីយដ្ឋានអ៊ីតាលី Osteria Mozza ក្នុងទីក្រុង Washington, DC ។ ភ្លាមៗនោះដែរ សូម្បីតែភ្ញៀវដែលមក​ញ៉ាំ​អាហារ​ ក៏បាន​សាទរ​ពេល​ឃើញ​វត្តមានអតីត​ប្រធានាធិបតី​អាមេរិកនៅចំពោះមុខ។ គូស្នេហ៍បុគ្គលល្បីក៏បាន​គ្រវី​ដៃ​ស្វាគមន៍​យ៉ាង​រាក់ទាក់​ដល់​អ្នក​រាល់​គ្នា​ និងចាប់ដៃជាមួយបុគ្គលិកមួយចំនួន ព្រមទាំងជជែកជាមួយភ្ញៀវមុនពេលចាកចេញពីភោជនីយដ្ឋាន។

ទោះបីជាយ៉ាងណាក៏ដោយ នេះជាលើកទីមួយហើយ ដែលលោក បារ៉ាក់ អូបាម៉ា និង​លោកស្រី មីឆែល បង្ហាញមុខជាសាធារណៈជាមួយគ្នា ចាប់តាំងពីខែធ្នូ ឆ្នាំ ២០២៤។ ពីមុនមក លោកត្រូវបានគេឃើញបរិភោគអាហារតែម្នាក់ឯងនៅភោជនីយដ្ឋានលំដាប់ខ្ពស់នេះ កាលពីពាក់កណ្តាលខែមករា ដែលនោះនាំឲ្យគេដាក់ការសន្ធិដ្ធានថា ទំនងជាបែកគ្នាហើយ។

ការ​បែក​គ្នា​របស់​គូស្នេហ៍​បុគ្គលល្បីអស់ពេលជា​ច្រើន​ខែ​ បាន​ធ្វើ​ឲ្យមានការ​សង្ស័យ​ពី​បញ្ហា​អាពាហ៍ពិពាហ៍ ​រហូត​ឈាន​ដល់​ការ​លែងលះ ។ ពាក្យចចាមអារ៉ាមនេះកាន់តែធ្ងន់ធ្ងរ នៅពេលដែលលោកស្រីមីឆែល មិនបានចូលរួមជាមួយស្វាមីក្នុងព្រឹត្តិការណ៍សំខាន់ៗដូចជា ពិធីបើកសម្ពោធលោកប្រធានាធិបតី ដូណាល់ ត្រាំ និងពិធីបុណ្យសពអតីតប្រធានាធិបតី Jimmy Carter។

ថ្វីដ្បិតតែយ៉ាងនេះក្ដី លោក អូបាម៉ា មិនបានពន្យល់អ្វីច្រើននោះទេ ប៉ុន្តែលោកបានចាត់វិធានការដើម្បីបដិសេធពាក្យចចាមអារ៉ាមអំពីការលែងលះ ដោយបង្ហោះរូបថតអបអរសាទរខួបលើកទី ៦១ របស់ភរិយាក្នុងខែមករា និងជូនពរឲ្យនាងរីករាយថ្ងៃបុណ្យនៃសេចក្តីស្រឡាញ់ក្នុងខែកុម្ភៈ។ ប៉ុន្តែសកម្មភាពទាំងនោះ មិនបានធ្វើឲ្យមហាជនជឿជាក់ឡើយ ហើយដំណឹងនៃការបែកគ្នា ក៏កាន់តែល្បីសុះសាយជាងមុនថែមទៀត៕

អត្ថបទ៖ សាង ស្រីល័ក្ខ

ចុចអាន៖តើជីវិតគូរបស់​​​អូបាម៉ានិងភរិយា​ពិត​ជា​បែកបាក់មែនឬ ខណៈ​អូបាម៉ា​ថ្លែង​រឿង​ពិបាកផ្សះផ្សា?

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម