កម្ពុជានឹងសាងសង់ស្ថានីយសម្រាប់ថែទាំ នឹងជួសជុលយន្តហោះកម្រិតអន្តរជាតិ

ដើម្បីឆ្លើយតបទៅនឹងតម្រូវការក្នុងស្រុក បន្ទាប់ពីការបើកដំណើរការអាកាសយានដ្ឋានអន្តរជាតិតេជោ កម្រិត 4F ក្រុមហ៊ុនដែលវិនិយោគលើការដឹកជញ្ជូនតាមផ្លូវអាកាស បានសហការជាមួយក្រុមហ៊ុនបរទេសសាងសង់ស្ថានីយថែទាំយន្តហោះនៅកម្ពុជា។

នៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវ អាកាសយានដ្ឋានអន្តរជាតិតេជោ ថ្ងៃទី ២០ ខែតុលា ឆ្នាំ ២០២៥ លោកអ្នកឧកញ៉ាបណ្ឌិត ពុង ឃាវសែ ​ប្រធានក្រុមប្រឹក្សាភិបាល​ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានបង្ហើបឱ្យដឹងថា ក្រុមហ៊ុន CAIC ក៏បានសហការជាមួយក្រុមហ៊ុន SIA Engineering Company ពីក្រុមហ៊ុនអាកាសចរណ៍សិង្ហបុរី (Singapore Airline) បង្កើតក្រុមហ៊ុនឈ្មោះ TIA Engineering service company limited ដើម្បីផ្តល់សេវាថែទាំដល់ក្រុមហ៊ុនអាកាសចរណ៍នៅ TIA ។

គម្រោងសាងសង់ស្ថានីយជួសជុលយន្តហោះជាប្រវត្តិសាស្រ្តនេះ ដើម្បីប្រែក្លាយអាកាសយានដ្ឋានអន្តរជាតិតេជោ មិនត្រឹមតែដឹកជញ្ជូនអ្នកដំណើរប៉ុណ្ណោះទេ គឺអភិវឌ្ឍទៅជាមជ្ឈមណ្ឌលដ៏មានសក្តានុពលនៅក្នុងតំបន់។ លោកបញ្ជាក់ថា៖« ផែនការនាពេលអនាគត គឺយើងនឹងសាងសង់ស្ថានីយសម្រាប់សេវាកម្មថែទាំ និងជួសជុលយន្តហោះនៅ TIA ដោយ​សារតែរាជធានីភ្នំពេញ ជាទីតាំងកណ្តាលដែលមានសក្តានុពលផ្តល់សេវាកម្មនេះ នៅក្នុងតំបន់អាស៊ាន និងអាស៊ី»។

បើតាមលោក ពុង ឈាវសែ ក្រុមហ៊ុនក៏មានផែនការសាងសង់ផ្លូវទឹកដឹកជញ្ជូនថ្មីប្រវែង ១០គីឡូម៉ែត្រ ដែលគ្រោងចំណាយទុនវិនិយោគចំនួនសរុប ១០០ លានដុល្លារ អាមេរិក សម្រាប់ធ្វើការតភ្ជាប់ពីបឹងជើងលោងដែលនៅបែកខាង​ត្បូងរបស់ TIA ទៅជាប់នឹងទន្លេបាសាក់ និងព្រែកជីកហ្វូណនតេជោ រហូតដល់ក្រុងកែប ដែលជាច្រកសមុទ្ររបស់ប្រទេសកម្ពុជា ដើម្បីឱ្យតំបន់ TIA ក្លាយទៅជាមណ្ឌលដឹកជញ្ជូនផ្លូវអាកាស គោក និងផ្លូវទឹក។ ក្រុមហ៊ុន OCIC ក៏ចាប់ផ្តើមអភិវឌ្ឍទីក្រុងរណបអាកាសយាន្តដ្ឋានរួមមានការសាងសង់លំនៅដ្ឋានតម្លៃសមរម្យសម្រាប់បុគ្គលិកនៅ TIA និងមជ្ឈមណ្ឌលពាណិជ្ជកម្មនៅក្នុងទីក្រុងរណបអាកាសយានដ្ឋាននេះ។

គួរជម្រាបថា អាកាសយានដ្ឋានអន្តរជាតិតេជោ ដែលជាស្នាដៃដ៏ធំ និងជាមោទនភាពថ្មីមួយរបស់កម្ពុជា គឺបានប្រកាសបើកដំណើរការ នៅថ្ងៃទី៩ ខែកញ្ញា ហើយត្រូវបានសម្ពោធផ្លូវការនៅថ្ងៃទី២០ ខែតុលា ឆ្នាំ២០២៥ ក្រោមអធិបតីដ៏ខ្ពង់ខ្ពស់របស់នាយករដ្ឋមន្រ្តី សម្តេចធិបតី ហ៊ុន ម៉ាណែត។ ការបើកដំណើរការនេះ គឺជាការបោះជំហានដ៏សំខាន់មួយសម្រាប់វិស័យអាកាសចរណ៍ និងសេដ្ឋកិច្ចកម្ពុជា ព្រមទាំងបានចូលខ្លួនមកជំនួសតួនាទីអាកាសយានដ្ឋានអន្តរជាតិភ្នំពេញ ដើម្បីក្លាយជាមជ្ឈមណ្ឌលអាកាសចរណ៍ដ៏សំខាន់សម្រាប់កម្ពុជា។

អាកាសយានដ្ឋានអន្តរជាតិតេជោ ត្រូវបានសាងសង់ឡើងក្រោមទុនវិនិយោគ ២ ៣០០ លានដុល្លារ លើផ្ទៃដីដ៏ធំទូលាយប្រមាណ ២,៦០០ ហិកតា ស្ថិតនៅស្រុកកណ្ដាលស្ទឹង ខេត្តកណ្ដាល និងផ្នែកខ្លះនៃស្រុកបាទី ខេត្តតាកែវ ។ អាកាសយានដ្ឋានថ្មីនេះ មានទីតាំងយុទ្ធសាស្ត្រនៅភាគខាងត្បូងនៃរាជធានីភ្នំពេញ ដែលមានចម្ងាយប្រមាណ ២០ គីឡូម៉ែត្រពីកណ្ដាលក្រុង។

លក្ខណៈសម្គាល់ដ៏សំខាន់មួយរបស់អាកាសយានដ្ឋាននេះ គឺវាត្រូវបានចាត់ថ្នាក់ជាអាកាសយានដ្ឋានលំដាប់ 4F ដែលជាកម្រិតខ្ពស់បំផុតនៅក្នុងវិស័យអាកាសចរណ៍អន្តរជាតិ។ ជាមួយនឹងចំណាត់ថ្នាក់នេះ អាកាសយានដ្ឋានអាចទទួលយន្តហោះគ្រប់ប្រភេទ រួមទាំងយន្តហោះខ្នាតយក្សដូចជា Airbus A380 និង Boeing 747 ផងដែរ៕