ព័ត៌មានជាតិ

ក្នុងឆ្នាំ ២០២៥ អាជ្ញាធរសង្កាត់ចោមចៅទី ៣ ស្ថាបនាផ្លូវបេតុងឆ្អឹងដែក ៩ ខ្សែ សម្រាប់ពលរដ្ឋធ្វើដំណើរ

បានផុស

៩ ខែ មុន

នៅ

ថ្ងៃពុធ ២៩ តុលា ២០២៥

ដោយ

ផ្លូវលំដែលតែងតែទ្រុឌទ្រោមជង្ហុកតូច-ធំ ប៉ះពាល់ដល់ការធ្វើដំណើរ និងប្រកបរបរចិញ្ចឹមជីវិតប្រចាំថ្ងៃរបស់ប្រជាពលរដ្ឋ ពេលនេះអាជ្ញាធរសង្កាត់ចោមចៅទី ៣ បានប្រែក្លាយស្ថាបនាជាផ្លូវបេតុងឆ្អឹងដែកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងក្នុងឆ្នាំ ២០២៥ នេះ អាជ្ញាធរសង្កាត់ចោមចៅទី ៣ ខណ្ឌពោធិ៍សែនជ័យ បានស្ថាបនាផ្លូវបេតុងឆ្អឹងដែកចំនួន ៩ ខ្សែ ក្នុងមូលដ្ឋាន ដើម្បីទុកឲ្យប្រជាពលរដ្ឋធ្វើដំណើរ និងប្រកបរបរចិញ្ចឹមជីវិតប្រចាំថ្ងៃ។

លោក វ៉ា សាវឿន ចៅសង្កាត់ចោមចៅទី ៣ បានឲ្យដឹងថា ការស្ថាបនាផ្លូវបេតុងឆ្អឹងដែកខាងលើនេះ មានចំនួន ៥ ភូមិ សរុបប្រវែង ១៥០០ ម៉ែត្រ ទទឹង ៥ ម៉ែត្រ ជាមូលនិធិអភិវឌ្ឍន៍សង្កាត់ក្នុងឆ្នាំ ២០២៥។

លោក វ៉ា សាវឿន បានបន្តថា ភូមិដែលស្ថាបនាផ្លូវបេតុងឆ្អឹងដែកនេះ រួមមាន ៖ ភូមិអូរដឹម ភូមិជម្ពូវ័ន ១ ភូមិជម្ពូវ័ន ២ ភូមិព្រៃទា និងភូមិព្រៃព្រីងជើង ២។ ផ្លូវនេះ ស្ថាបនារួចរាល់ហើយ និងដាក់ឲ្យប្រជាពលរដ្ឋធ្វើដំណើរសម្រាប់ប្រកបរបរផ្សេងៗ។ ចំពោះផ្លូវដែលសេសសល់មិនទាន់ស្ថាបនា លោកនឹងបន្តជួសជុលបន្តទៀតនៅពេលក្រោយ។

ក្នុងនាមអាជ្ញាធរ លោក បានអំពាវនាវដល់ប្រជាពលរដ្ឋទាំងអស់ សូមជួយថែរក្សាផ្លូវខាងលើនេះឲ្យបានគង់វង្សយូរអង្វែង ជាពិសេសហាមរថយន្តធុនធំដឹកធ្ងន់បើកបរឆ្លងកាត់ដែលអាចនឹងឆាប់ខូចខាត។

លោក ស្រីចាន់ ថេន អ្នកលក់ដូរនៅផ្លូវបេតុង ភូមិអរដឹម សង្កាត់ចោមចៅទី ៣ ក៏បានសម្ដែងភាពត្រេកអរ សប្បាយចិត្ត ដែលបានអាជ្ញាធរយកចិត្តទុកដាក់បែបនេះ ព្រោះកន្លងមកប្រជាពលរដ្ឋពិបាកក្នុងការរស់នៅ ខណៈខែវស្សាផ្លូវរអិលទឹកដក់ ពិបាកធ្វើដំណើរ តែបើខែប្រាំងវិញ ដីហុយចូលផ្ទះ ម្ហូបអាហារ តែពេលនេះលែងព្រួយបារម្ភទៀតហើយ៕

អត្ថបទ ៖ សុខា