ខេត្តរតនគិរី អាចប្រឈមនឹងស្ថានភាពខ្វះទឹក និងគ្រោះរាំងស្ងួតដោយសារបាតុភូត El Niño

ខេត្តរតនគិរី ស្ថិននៅភូមិភាគឦសាន អាចប្រឈមនឹងស្ថានភាពខ្វះទឹក និងគ្រោះរាំងស្ងួត ពីកម្រិតស្រាលទៅមធ្យម ដែលបណ្តាលមកពីការវិវត្តន៍នៃបាតុភូត El Niño ដែលនាំមកអាកាសធាតុដ៏ក្តៅបំផុត។ នេះបើយោងតាមការតាមដាន និងវិភាគស្ថានភាពអាកាសធាតុ ព្រមទាំងទិន្នន័យឧតុនិយមបច្ចុប្បន្ន និងមន្ទីរធនធានទឹកនិងឧតុនិយមខេត្តរតនគិរី។

មន្ទីរធនធានទឹកខេត្តនេះ បានឱ្យដឹងថា ចាប់ពីថ្ងៃទី ២០ ខែ កក្កដា រហូតដល់ ថ្ងៃទី ១០ ខែ សីហា ឆ្នាំ២០២៦ ការវិវត្តន៍នៃបាតុភូត El Niño បានធ្វើឱ្យខ្យល់មូសុងនិរតីថយចុះ លក្ខណៈបែបនេះធ្វើឱ្យបរិមាណទឹកភ្លៀងនៅក្នុងខេត្តរតនគិរី ថមថយ មានកម្រិតទាបជាងកម្រិតមធ្យមច្រើនឆ្នាំ។ ស្ថានភាពបែបនេះ ខេត្តរតនគិរីអាចប្រឈមនឹងស្ថានភាពខ្វះទឹក និងគ្រោះរាំងស្ងួត ពីកម្រិតស្រាលទៅមធ្យម។

ជាវិធានការ ដើម្បីកាត់បន្ថយផលប៉ះពាល់ មន្ទីរធនធានទឹក និងឧតុនិយមខេត្តរតនគិរី អំពាវនាវដល់អាជ្ញាធរមូលដ្ឋានត្រៀមផែនការគ្រប់គ្រងនិងបែងចែកទឹកឱ្យមានប្រសិទ្ធភាព។ ចំណែក បងប្អូនប្រជាកសិករគួររៀបចំផែនការប្រើប្រាស់ទឹកដោយសន្សំសំចៃជ្រើសរើសពូជដំណាំ ដែលមានតម្រូវការទឹកតិចឬពន្យារពេលដាំដុះនៅតំបន់ដែលមិនទាន់មានប្រភពទឹកគ្រប់គ្រាន់។

សាធារណជនទូទៅគួរប្រើប្រាស់ទឹកប្រចាំថ្ងៃដោយសន្សំសំចៃនិងតាមដាននូវសេចក្តីជូនដំណឹង ជាបន្តបន្ទាប់ពីមន្ទីរធនធានទឹក និងឧតុនិយមខេត្តរតនគិរី។ មន្ទីរធនធានទឹករតនគិរី នឹងបន្តតាមដានយ៉ាងជាប់លាប់នូវការវិវត្តន៍នៃស្ថានភាពអាកាសធាតុនិងធ្វើបច្ចុប្បន្នភាពព័ត៌មានជាបន្តបន្ទាប់ ប្រសិនបើមានការប្រែប្រួលគួរឱ្យកត់សម្គាល់។

តាមរយៈសារាចរមួយ កាលពីថ្ងៃទី ២៥ ខែមិថុនា ឆ្នាំ ២០២៦ នាយករដ្ឋមន្រ្តី​ សម្តេចធិបតី ហ៊ុន ម៉ាណែត បានណែនាំឱ្យស្ថាប័នពាក់ព័ន្ធត្រូវយកចិត្តទុកដាក់ចាត់វិធានការរក្សាទឹកឱ្យបានច្រើននៅពាក់កណ្តាលនិងចុងរដូវវស្សានេះ ដើម្បីត្រៀមបង្ការការខ្វះខាតទឹក និងការកើនឡើងកម្ដៅនៅរដូវប្រាំងដោយសារបាតុភូតអែលនីញ៉ូ (El Niño) បណ្តាលឱ្យរដូវប្រាំងឆ្នាំ២០២៧ ខាងមុខអាចនឹងអូសបន្លាយរយៈពេលយូរ។

អង្គការ​សហប្រជាជាតិ (UN) ព្រមានថា ពិភពលោក​ត្រូវតែ​ត្រៀម​ខ្លួន​សម្រាប់​ការវិលត្រឡប់​មកវិញ​នៃបាតុភូត El Niño ដែល​នាំ​មក​នូវ​អាកាសធាតុ​ដ៏អាក្រក់បំផុត​ ដោយ​មាន​​ទាំង​ភ្លៀង​ធ្លាក់ខ្លាំង​បណ្តាល​​ឲ្យ​ទឹកជំនន់​​ និង​គ្រោះ​រាំង​ស្ងួត​​​ដ៏​អាក្រក់​៕

ដោយ៖ ខៀវ ចាប