ព័ត៌មានជាតិ

អាជ្ញាធរអប្សរាសម្រេចទល់ទ្រប្រាសាទបក្សីចាំក្រុងបន្ទាន់ក្រោយការប្រកាសហានិភ័យខ្ពស់ចំពោះប្រាសាទ

បានផុស

៨ ខែ មុន

នៅ

ថ្ងៃសៅរ៍ ៨ វិច្ឆិកា ២០២៥

ដោយ

អាជ្ញាធរជាតិអប្សរាបានសម្រេចចិត្តបន្ទាន់មួយក្នុងការទល់ទ្រប្រាសាទបក្សីចាំក្រុងភ្លាមៗក្រោយរកឃើញថាផ្នែកដំបូល និងជញ្ជាំងនៃប្រាសាទមានការទ្រុឌទ្រោមខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់អាជ្ញាធរជាតិអប្សរានៅថ្ងៃទី៧ ខែវិច្ឆិកា ពលករជាច្រើនត្រូវបានបញ្ជូនទៅដើម្បីជញ្ជូនសម្ភារៈ និងសង់រន្ទារៀបចំទល់ទ្រ ទប់លំនឹងកំពូលប្រាសាទដែលមានអាយុកាលជាង១០០០ឆ្នាំនេះ បន្ទាប់ពីក្រុមការងារបានពិនិត្យឃើញពីហានិភ័យដែលប្រឈមខ្ពស់រួចមក។

ប្រធានគម្រោងអភិរក្សប្រាសាទបក្សីចាំក្រុងលោក ពុទ្ធ សុទ្ធ បានលើកឡើងថា៖ «វាជាការសម្រេចចិត្តដ៏ល្អបំផុត និងទាន់ពេលវេលា ដើម្បីបង្ការហានិភ័យខ្ពស់ជាងនេះ ដែលតម្រូវឱ្យមានផែនការជួសជុល សម្រាប់ថ្ងៃអនាគតផងដែរ»។

បើតាមលោក ពុទ្ធ សុទ្ធ កន្លែងហានិភ័យខ្លាំងនៅក្នុងប្រាសាទនេះគឺនៅផ្នែកដំបូល និងផ្នែកខ្លះនៃជញ្ជាំង។

ប្រាសាទបក្សីចាំក្រុង ស្ថិតនៅកណ្តាលព្រៃស្រោងខាងឆេ្វងផ្លូវ និងខាងជើងភ្នំបាខែង ប្រហែល១៥០ម៉ែត្រ មានកាំជណ្តើរស្ថាបនាដោយថ្មបាយកៀ្រម និងឥដ្ឋពណ៌ក្រហម។ ប្រាសាទនេះមានរាងជាសាជី៥ថ្នាក់ គិតទាំងជាន់នៅក្រោមប្រាង្គប្រាសាទ ដែលធ្វើពីឥដ្ឋបែរមុខទៅទិសខាងកើត សាងសង់នៅឆ្នាំ៩២១ ក្រោមរាជ្យព្រះបាទហស៌វរ្ម័នទី១ ឬហស៌វម៌្មទី១ (៩១០-៩២២)។ ប្រាសាទនេះមានសិលាចារឹកដ៏សំខាន់មួយទាក់ទងនឹងការផ្សារភ្ជាប់រវាងរាជវង្សសោមវង្ស (រាជវង្សនៅនគរភ្នំ) ជាមួយរាជវង្សសូរ្យវង្ស (រាជវង្សនៅនគរចេនឡា) ព្រមទាំងដើមកំណើតនៃឈ្មោះប្រទេសកម្ពុជាផងដែរ៕

អត្ថបទដោយ ហ៊ុន សិរីវឌ្ឍន៍