អាជ្ញាធរខណ្ឌជ្រោយចង្វារ ដឹកនាំមន្ត្រីជំនាញ ចុះពិនិត្យវឌ្ឍនភាព​ការស្ថាបនាផ្លូវបេតុងឆ្អឹងដែក ក្រោមស្ពានព្រែកព្នៅ

អាជ្ញាធរខណ្ឌជ្រោយចង្វារ ដឹកនាំដោយលោក លីម សុភា អភិបាលនៃគណៈអភិបាលខណ្ឌជ្រោយចង្វារ បានដឹកនាំក្រុមការងារខណ្ឌ និងអាជ្ញាធរសង្កាត់ព្រែកតាសេក ចុះពិនិត្យវឌ្ឍនភាពការអនុវត្តគម្រោងស្ថាបនាផ្លូវបេតុងឆ្អឹងដែក ក្រោមស្ពានព្រែកព្នៅ។

ជាក់ស្តែងនៅថ្ងៃទី១៩ ខែវិច្ឆិកា ឆ្នាំ២០២៥ អាជ្ញាធរខណ្ឌជ្រោយចង្វារ បានដឹកនាំក្រុមការងារខណ្ឌ ចុះពិនិត្យវឌ្ឍនភាពគម្រោងស្ថាបនាផ្លូវបេតុងឆ្អឹងដែក ក្រោមស្ពានព្រែកព្នៅ ដែលស្ថិតនៅភូមិព្រែករាំង និងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ។

ការចុះពិនិត្យគម្រោងនេះដើម្បីត្រួតពិនិត្យការអនុវត្តតាមបច្ចេកទេស ស្តង់ដារសំណង់ និងដំណើរការងារ ដើម្បីធានាឲ្យការអភិវឌ្ឍប្រព័ន្ធហេដ្ឋារចនាសម្ព័ន្ធសាធារណៈ ត្រូវបានធ្វើឲ្យមានប្រសិទ្ធភាព ប្រកបដោយសុវត្ថិភាព និងឆ្លើយតបតាមតម្រូវការរបស់ប្រជាពលរដ្ឋក្នុងតំបន់។ ហើយក្រុមហ៊ុនម៉ៅការ នឹងធ្វើការតាមស្តង់ដារបច្ចេកទេស ដើម្បីបញ្ជៀសផលប៉ះពាល់ មិនឲ្យមានការប៉ះពាល់ទៅដល់ប្រជាពលរដ្ឋនោះទេ។

លោក លីម សុភា អភិបាលខណ្ឌជ្រោយចង្វារ បានឲ្យកម្ពុជាថ្មី្មដឹងថា ការចុះពិនិត្យវឌ្ឍនភាពគម្រោងស្ថាបនាផ្លូវបេតុងឆ្អឹងដែក ក្រោមស្ពានព្រែកព្នៅ (ប្រវែង ៣៤២ម៉ែត្រ ទទឹង ១០ម៉ែត្រ កម្រាស់ ២តឹក) នេះ ដើម្បីធានាឲ្យការងារអនុវត្តតាមបច្ចេកទេស៕

ដោយ ៖ ម៉េង