សមត្ថកិច្ចខេត្តមណ្ឌលគិរី ឃាត់ជនសង្ស័យ៩នាក់ ដកហូតវត្ថុតាងពាក់ព័ន្ធរក្សាទុកគ្រឿងញៀន

រយៈពេល២ថ្ងៃ គឺថ្ងៃទី២៤ ដល់២៥ ខែវិច្ឆិកា ឆ្នាំ២០២៥ កម្លាំងនគរបាលខេត្តមណ្ឌលគិរី បានធ្វើប្រតិបត្តិការបង្ក្រាបករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀនចំនួន ៤ ទីតាំង នៅក្នុងភូមិសាស្ត្រ ឃុំស្រែខ្ទុម ស្រុកកែវសីមា ដោយបានឃាត់ជនសង្ស័យចំនួន៩នាក់ និងបានដកហូតវត្ថុតាង ឧបករណ៍មួយចំនួនទៀត។

ប្រតិបត្តិការនេះធ្វើឡើងដោយមានការចង្អុលបង្ហាញពីលោក ឡោ សុខា ស្នងការនគរបាលខេត្តមណ្ឌលគិរី និងមានការសម្របសម្រួលនីតិវិធីពី លោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្ត និងអធិការនគបាលស្រុកកែវសីមា បានឈានដល់ការបង្រ្កាបទាំងនោះ។

យោងតាមរបាយការណ៍សមត្ថកិច្ចសរុបលទ្ធផល និងវត្ថុតាងដកហូតបាន ក្នុងកិច្ចប្រតិបត្តិការបង្ក្រាបចំនួន ៤ ទីតាំង កម្លាំងសមត្ថកិច្ចជំនាញបានឃាត់ខ្លួនជនសង្ស័យសរុប ០៩ នាក់ (ភេទប្រុស)។ វត្ថុតាងដកហូតបានរួមមាន សារ​ធាតុ​ញៀនប្រភេទមេតំហ្វេតាមីន (ម៉ាទឹកកក)សរុប ១៨ កញ្ចប់ (៦ កញ្ចប់ធំល្មម, ១២ កញ្ចប់តូច) មានទម្ងន់សរុប ៧១.១០ ក្រាម (ថ្លឹងទាំងសំបក)អាវុធកែច្នៃ ០៧ ដើម ម៉ូតូ០៣ គ្រឿង ទូរសព្ទ០៧ គ្រឿង ជញ្ជីងសម្រាប់ថ្លឹងគ្រឿងញៀន០១ គ្រឿង កន្ត្រៃ០៣ កាបូបស្ពាយពណ៌ខ្មៅ០១។

បច្ចុប្បន្ន ជនសង្ស័យ និងវត្ថុតាងទាំងអស់កំពុងត្រូវបានកម្លាំងជំនាញកសាងសំណុំរឿងតាមនីតិវិធី ដើម្បីចាត់ការបន្តតាមផ្លូវច្បាប់៕

ដោយ៖ រៀម សុខហេង