ព័ត៌មានជាតិ

២ ថ្ងៃនេះ រដ្ឋបាលរាជធានី ទទួលបានគ្រឿងឧបភោគ បរិភោគ សម្ភារៈ ថវិកាជាង ២១២ លាន រៀល និងជាង ៥ ម៉ឺនដុល្លារ ដើម្បីផ្ដល់ជូនវីរកងទ័ពជួរមុខ និងជនភៀសសឹក

បានផុស

៧ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

អំណោយជាថវិកា គ្រឿងឧបភោគ បរិភោគ និងសម្ភារៈប្រើប្រាស់ចាំបាច់មួយចំនួនធំ ត្រូវបានសប្បុរសជន នាំយកមកប្រគល់ជូនរដ្ឋបាលរាជធានីភ្នំពេញ ដើម្បីបន្តយកទៅប្រគល់ជូនវីរកងទ័ព ដែលកំពុងឈរជើងប្រយុទ្ធនៅសមរភូមិមុខ និងប្រជាពលរដ្ឋជាជនភៀសសឹក ខណៈក្រុមទាហានថៃវាយប្រហារឈ្លានពានចូលបូរណភាពទឹកដីកម្ពុជា ធ្វើឱ្យមានការផ្ទុះសង្គ្រាមជាថ្មី ដោយគិតត្រឹម ម៉ោង ១៨:០០ នាទី ថ្ងៃទី ១០ ខែធ្នូ ឆ្នាំ ២០២៥ រដ្ឋបាលរាជធានីភ្នំពេញ បានទទួលថវិកាសរុបចំនួន ២១២.៥៥៤.៤០២ រៀល និងចំនួន ៥៦.២៨៧ ដុល្លារអាមេរិក ជាមួយនឹងសម្ភារៈ គ្រឿងឧបភោគ បរិភោគ ថ្នាំពេទ្យ សម្ភារៈ ផ្សេងៗ ជាច្រើនមុខទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីប្រគល់ និងទទួលនេះបានធ្វើឡើងនាព្រឹក និងរសៀលថ្ងៃទី ១០ ធ្នូ នេះ ក្រោមវត្តមានអភិបាលរងជាច្រើនរូបតំណាងលោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ។

អំណោយនាំមកប្រគល់ជូននេះ ជាអំណោយបានមកពីសប្បុរសជននានាៗ ដូចជា សាលាអន្តរជាតិប៊ែលធី សហគ្រាសសំណល់រឹងរាជធានីភ្នំពេញ មន្ទីរទេសចរណ៍រាជធានីភ្នំពេញ គណៈកម្មការផ្សារអូរឫស្សី គណៈកម្មការផ្សារជម្ពូវ័ន និងគណៈកម្មការផ្សារកាប់គោ ដែលអំណោយទាំងនេះរួមមាន ៖ ថវិកា មីខ្លាឃ្មុំ ទឹកបរិសុទ្ធ អង្ក មួក កន្ទេល នំក្រៀម មី ត្រីងៀត ជ្រក់ស្ពៃជូរ សៀងផ្អែម ក្បាលត្រីឆ្ដោក្រៀម ត្រីប្រាសំយ៉ុង ពងមាន់ ត្រីប្រឡាក់ អំបុក ភួយ ទឹកផ្លែឈើ ទឹកក្រូច ក្រមា អាវជជុះ និង ថ្នាំពេទ្យជាដើម។

លោកស្រី ដោ សម្ផស្ស នាយិការងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងកាលពីល្ងាចថ្ងៃទី ១០ ធ្នូ ថា គិតត្រឹមម៉ោង ១៨:០០ នាទី ថ្ងៃទី ១០ ខែធ្នូ ឆ្នាំ ២០២៥ រដ្ឋបាលរាជធានីភ្នំពេញ បាននិងកំពុងបន្តទទួលនូវការបរិច្ចាគសរុបចំនួន ២១២.៥៥៤.៤០២ រៀល និងចំនួន ៥៦.២៨៧ ដុល្លារអាមេរិក ជាមួយនឹងសម្ភារៈ គ្រឿងឧបភោគ បរិភោគ ថ្នាំពេទ្យ សម្ភារៈ ផ្សេងៗ ជាច្រើនមុខទៀត។

លោក ហួត ហៃ អភិបាលរងរាជធានីភ្នំពេញ បានគោរពថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់ប្រជាពលរដ្ឋនៅរាជធានីភ្នំពេញ ក្នុងស្មារតីខ្មែរជួយជាតិខ្មែរ។