ព័ត៌មានជាតិ

អភិបាលខេត្តកំពង់ចាម ប្រគល់អំណោយជូនដល់វីរកងទ័ពជួរមុខ ដែលកំពុងការពារទឹកដីពីការឈ្លានពានរបស់ថៃ

បានផុស

៧ ខែ មុន

នៅ

ថ្ងៃសុក្រ ១២ ធ្នូ ២០២៥

ដោយ

លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម នាព្រឹកថ្ងៃទី១២ ខែធ្នូ ឆ្នាំ២០២៥ បានរៀបចំពិធីប្រគល់អំណោយជាជំហានដំបូងរបស់រដ្ឋបាលខេត្ត ដើម្បីបញ្ជូនទៅឧបត្ថម្ភនាយទាហាន ពលទាហាន យោធភូមិភាគទី២ ប្រចាំការពារព្រំដែនកម្ពុជា-ថៃ ដើម្បីត្រៀមប្រយុទ្ធការពារបូរណភាពទឹកដី ពីការឈ្លានពានរបស់យោធាថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះត្រូវបានធ្វើឡើងនៅសាលាខេត្តកំពង់ចាម ពោរពេញដោយស្មារតីជាតិនិយម និងការគាំទ្រដល់កងទ័ព ក្នុងគោលបំណងបង្ហាញនូវការដឹងគុណយ៉ាងជ្រាលជ្រៅចំពោះការលះបង់ដ៏ធំធេងរបស់វីរកងទ័ពកម្ពុជា។

លោក អ៊ុន ចាន់ដា បានថ្លែងការកោតសរសើរចំពោះស្មារតីវីរភាពកងទ័ពដែលបានបង្ហាញនូវភាពក្លាហាន និងការលះបង់ខ្ពស់បំផុត ក្នុងការការពារទឹកដីដែលជាកេរដំណែលដូនតា។

លោកបានគូសបញ្ជាក់ថា ការប្រយុទ្ធរបស់កងទ័ព គឺជាការបំពេញភារកិច្ចដ៏ថ្លៃថ្លាបំផុត ក្នុងនាមជាកូនខ្មែរ ហើយរដ្ឋបាលខេត្តកំពង់ចាមតែងតែនៅជាមួយ និងគាំទ្រកងទ័ពជានិច្ច។

លោកអភិបាលខេត្ត បានជំរុញឱ្យកងទ័ពបន្តរក្សា សាមគ្គីភាព វិន័យ និងប្រុងប្រយ័ត្នខ្ពស់ ដើម្បីទប់ទល់នឹងសត្រូវ និងការពារបាននូវទឹកដីគ្រប់ចំណុច និងវាយតម្លៃខ្ពស់ចំពោះការលះបង់របស់វីរកងទ័ពគ្រប់រូប ដែលបានខិតខំប្រឹងប្រែងការពារបូរណភាពទឹកដី។

អំណោយដែលបានប្រគល់ជូនតំណាងកងទ័ពរួមមាន ៖ អំបុកស្រូវថ្មីខ្មែរចំនួន ១.៥០០ កញ្ចប់ , ឆៃប៉ូវចំនួន ១០០ គីឡូក្រាម, តាសក់ចាវចំនួន ១២០ គីឡូក្រាម, ត្រីខកំប៉ុង, ខ្ទឹមស, ត្រីប្រឡាក់, ប្រេងឆា, ស្ករស, អំបិល, ប៊ីចេង ,អង្ករចំនួន ១០ តោន, មី ៣០០កេស,បន្លែ ផ្លែឈើ និងសាច់ស្រស់មួយចំនួនធំ, និងអំពូលសូឡាចំនួន ៥០ ឈុត, ថវិកាសរុបចំនួន ៤០លានរៀល៕

អត្ថបទ និងរូបភាព ៖ ឡេក ចាន់ពេជ្រ