ផលិតផលក្នុងស្រុក​ (GDP) ពលរដ្ឋ​ខេត្តស្ទឹងត្រែង​កើន​ដល់​ ១ ៧៩០ ដុល្លារ​សម្រាប់​មនុស្សម្នាក់

ខេត្ត​ស្ទឹងត្រែង​ដែល​ស្ថិត​នៅ​ភូមិភាគ​ឦសានមាន​ការ​អភិវឌ្ឍ​ន៍ ​ខណៈ​កម្រិត​ជីវភាព​របស់​ពលរដ្ឋ​ក៏​មាន​ភាព​ប្រសើរ​ឡើង។

ផលិតផល​ក្នុង​ស្រុក​សរុប​សម្រាប់​ប្រជាជន​ម្នាក់ (GDP) ​បាន​​ប្រមាណ ១ ៧៩០ ដុល្លារ និងអត្រាភាពក្រី​មាន​ជាង ១៨%។ នេះ​បើ​តាម​របាយការណ៍​បូក​សរុប​លទ្ធផល​ការងារ​របស់​រដ្ឋបាល​ខេត្ត​ស្ទឹងត្រែង​ក្នុង​ឆ្នាំ ២០២៥​។

ទំហំសេដ្ឋកិច្ចខេត្តមានប្រមាណ ១.១៥៧.៨៨៤ លានរៀល គិតជាដុល្លារប្រហែល ២៨៦​ លាន​ដុល្លារ​មេរិក ដែល​មានអត្រាកំណើន ៥,១% ក្នុងនោះវិស័យកសិកម្មមានកំណើន ៤,៩% ឧស្សាហកម្ម​មាន​កំណើន ៦,៥% និង​សេវាកម្ម​មាន​កំណើន ៥,៤%។

ខេត្តស្ទឹងត្រែង​មានប្រជាជនរស់នៅ​សរុប​ ១៩១ ០៧១ នាក់ ស្មើនឹង ៤៦ ០៨៣ គ្រួសារ។ ប្រជាពលរដ្ឋ​អាយុ ១៨ ឆ្នាំឡើង​មាន​ចំនួន ១១៨ ៦៤២ នាក់ ជាមួយ​ដង់ស៊ីតេប្រជាជន ១៦ នាក់ក្នុង ១ គីឡូម៉ែត្រការ៉េ។

ខេត្តស្ទឹងត្រែង​មាន​​ភូមិសាស្ត្រ​​ជាប់ជាមួយ​​ប្រទេស​ឡាវ មាន​ដង​ទន្លេ​ចំនួន ៤ ហូរកាត់។ ខេត្ត​តំបន់​ឦសាន​នេះ​មាន​សក្ដានុពលខ្ពស់ចំពោះវិស័យទេសចរណ៍ ពិសេសសត្វ​ផ្សោតមេគង្គ​ដែល​ជា​ប្រភេទ​ថនិកសត្វដ៏កម្រនៅក្នុងពិភពលោក ដែលបានទាក់ទាញការ​ចាប់អារម្មណ៍​ពីសំណាក់​ភ្ញៀវ​ជាតិ និងអន្តរជាតិ​ទៅ​កម្សាន្ត។

លោក អ៊ន់ ប៉ោសឿន ​ប្រធាន​មន្ទីរទេសចរណ៍ខេត្តស្ទឹងត្រែងបាន​ឲ្យ​ដឹង​ថា ផលិតផល​ទេសចរណ៍​ខេត្តស្ទឹងត្រែងភាគច្រើន​ពឹងផ្អែកលើ​វប្បធម៌-ធម្មជាតិ និង​កសិ​ទេសចរណ៍។ ចំពោះតំបន់​ទាក់ទាញ​ទេសចរណ៍​​ក្នុង​ខេត្ត​នៅមានតិចនិងស្ថិតនៅឆ្ងាយៗពីគ្នា។ យ៉ាងណាមិញ ភាពស្រស់ត្រកាលនិង​ភាពសំបូរបែប​នៃធនធានធម្មជាតិ បានទាក់ទាញភ្ញៀវទេសចរ​ចង់ដឹងចង់ស្គាល់​តំបន់​ដែល​មានទេសភាពល្អស្អាតនៅក្នុងខេត្តភូមិភាគ​ឦសានមួយ​នេះ៕