ព័ត៌មានជាតិ

ក្រសួងអភិវឌ្ឍន៍ជនបទ ចុះពិនិត្យវឌ្ឍនភាពកម្មវិធីអភិវឌ្ឍន៍ និងធ្វើឲ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទ នៅឃុំតាគង់

បានផុស

៦ ខែ មុន

នៅ

ថ្ងៃព្រហស្បតិ៍ ២២ មករា ២០២៦

ដោយ

ក្រសួងអភិវឌ្ឍន៍ជនបទ បានចុះពិនិត្យវឌ្ឍនភាពកម្មវិធីអភិវឌ្ឍន៍ និងធ្វើឲ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទ នៅឃុំតាគង់ ស្រុកម៉ាឡៃ ខេត្តបន្ទាយមានជ័យ កាលពីថ្ងៃទី ២១ ខែមករា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា យុទ្ឋារុណ ប្រធានមន្ទីរអភិវឌ្ឍន៍ជនបទ លើកឡើងថា កម្មវិធីអភិវឌ្ឍន៍ និងធ្វើឲ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទ ប្រកបដោយនិរន្តរភាព នៅឃុំតាគង់ ក្រសួងអភិវឌ្ឍន៍ជនបទ បានផ្តល់ជូនប្រជាពលរដ្ឋក្នុងឃុំតាគង់ រួមមាន ៖ ស្តារស្រះសហគមន៍ អណ្តូងខួងបំពាក់ស្នប់ ពាងត្រងទឹកភ្លៀង ធុងជ័រត្រងទឹកភ្លៀងសម្រាប់សាលារៀន និងមណ្ឌលសុខភាព បង្គន់អនាម័យតាមសាលារៀន បង្គន់អនាម័យគ្រួសារ។ ជាក់ស្ដែង ក្រសួងអភិវឌ្ឍន៍ជនបទ បានចុះពិនិត្យការស្តារស្រះសហគមន៍ចំនួន ៦ និង ពាងត្រងទឹកភ្លៀងចំណុះ ១ ០០០ លីត្រ ចំនួន ៣៦២៥ ពាង។

ទន្ទឹមនោះ លោក ទិត្យ សុផា អគ្គាធិការរង និងជានាយកកម្មវិធី បានណែនាំដល់ក្រុមការងារបច្ចេកទេសទាំងអស់ និងក្រុមហ៊ុនសាងសង់ ឲ្យខិតខំជំរុញការងារសាងសង់ទៅតាមជំនាញស្របតាមស្តង់ដារ និងមានគុណភាពខ្ពស់ ប្រើប្រាស់បានយូរអង្វែង ហើយឲ្យសម្រេចរួចរាល់តាមផែនការដែលបានកំណត់។

ជាមួយគ្នានោះ លោក ទិត្យ សុផា ក៏បានសំណូមពរដល់ប្រជាពលរដ្ឋទាំងអស់ សូមចូលរួមថែរក្សាសមិទ្ធផលដែលទទួលបានថ្មីនេះ តាមរយៈការសម្អាតបរិស្ថាន និងថែទាំឲ្យបានគង់វង្សយូរអង្វែង។ ពិសេសសូមចូលរួមផ្តល់ការសហការ និងជំរុញកម្មវិធីអភិវឌ្ឍន៍ និងធ្វើឲ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទ ប្រកបដោយនិរន្តរភាព បន្តទៀត៕

អត្ថបទ ៖ អ ពៅ