ព័ត៌មានជាតិ

រោងចក្រឧស្សាហកម្មធំៗបន្តបន្ទាប់ កំពុងមានវត្តមានបោះទុនវិនិយោគក្នុងខេត្តពោធិសាត់

បានផុស

៥ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

ខេត្តពោធិ៍សាត់ បានទាក់ទាញក្រុមហ៊ុនវិនិយោគធំៗដែលមានមុខសញ្ញាវិនិយោគរោងចក្រផលិតសម្លៀកបំពាក់ រោងចក្រផលិតសម្ភារអគ្គិសនី និងរោងចក្រដំឡើងរថយន្តជាដើម។

ក្រុមហ៊ុន Ford របស់អាមេរិកមានរោងចក្រដំឡើងរថយន្តនៅក្នុងខេត្តពោធិ៍សាត់ រួមទាំងក្រុមហ៊ុនផលិតគ្រឿងអេឡិចត្រូនិកដ៏ធំរបស់ជប៉ុន Minebea ក៏កំពុងវិនិយោគនៅក្នុងតំបន់សេដ្ឋកិច្ចពិសេសក្នុងខេត្តពោធិ៍សាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីឆ្នាំ ២០២៤ រោងចក្រដំឡើងរថយន្តអគ្គិសនីដំបូង ក៏ចាប់ផ្តើមសាងសង់នៅខេត្តពោធិ៍សាត់។ ក្រៅពីនេះ ក្នុងខេត្តក៏មានរោងចក្រកាត់ដេរចំនួន ៥ ដែលបង្កើតឱកាសការងារជាង ៦ ពាន់កន្លែងសម្រាប់ពលរដ្ឋក្នុងស្រុក។

នៅក្នុងពិធីបើកការដ្ឋានសាងសង់រោងចក្រដំឡើងរថយន្តអគ្គិសនីរបស់ក្រុមហ៊ុនហ្សូម៉ូធ័រ ខេមបូឌា នៅស្រុកក្រគរ ខេត្តពោធិ៍សាត់ លោក កែវ រតនៈ រដ្ឋមន្រ្តី ក្រសួងរ៉ែ និងថាមពល បានឲ្យដឹងថា ខេត្តពោធិ៍សាត់ គឺជាទីតាំងដ៏មានសក្តានុពលសម្រាប់បង្កើតតំបន់អភិវឌ្ឍន៍ថ្មី ដោយសារខេត្តនេះមានហេដ្ឋារចនាសម្ព័ន្ធល្អ ទាំងផ្លូវថ្នល និងផ្លូវដែក រួមទាំងមានប្រភពថាមពលអគ្គិសនីស្អាត។

លោកថា រាជរដ្ឋាភិបាលកម្ពុជា បានដាក់ចេញគោលដៅអភិវឌ្ឍខេត្តពោធិ៍សាត់ឱ្យក្លាយជាមជ្ឈមណ្ឌលឧស្សាហកម្ម និងកសិឧស្សាហកម្ម។

បើតាមលោករដ្ឋមន្រ្តី វត្តមានរោងចក្រនៅលើទឹកដីខេត្តពោធិ៍សាត់ បានជួយជំរុញដល់ដំណើរការសេដ្ឋកិច្ចក្នុងខេត្ត និងលើកកម្ពស់ជីវភាពប្រជាពលរដ្ឋឲ្យល្អប្រសើរថែមទៀត។

លោក យ៉ូស៊ីហ៊ីសា កៃនូម៉ា អគ្គនាយក្រុមហ៊ុនមីនេបៀបានថ្លែងថា បន្ទាប់ពីដំណើរការរោងចក្រនៅតំបន់សេដ្ឋកិច្ចពិសេសរាជធានីភ្នំពេញ ក្រុមហ៊ុនបានចាប់ផ្តើមដំណើរការរោងចក្រទី២ សាខានៅក្នុងខេត្តពោធិ៍សាត់ដែលមានផលិតគ្រឿងបន្លាស់ម៉ាស៊ីនលម្អិតតូចៗ សម្រាប់ផ្គត់ផ្គង់រថយន្តជាច្រើនប្រភេទ ផលិតម៉ូទ័រខ្នាតកង្ហារ ឧបករណ៍អ៊ុបទិកសម្រាប់ទូរស័ព្ទ ហ្គាមកុំព្យូទ័រ ក្រាហ្វិកអេឡិចត្រូនិក អំពូលភ្លើងឆ្លាតវៃសម្រាប់ទីសាធារណ: ឧបករណ៍វាស់ឈាម និងឧបករណ៍ប្រើប្រាស់សម្រាប់ផ្ទះបាយ។

លោកអគ្គនាយកបញ្ជាក់ថា រោងចក្រមីនេបៀនៅខេត្តពោធិ៍សាត់នេះ នឹងក្លាយជាមូលដ្ឋានខ្សែសង្វាក់ផលិតកម្មខ្នាតធំសម្រាប់នាំចេញទៅកាន់ពិភពលោក។

លោក ខូយ រីដា អភិបាលខេត្តពោធិ៍សាត់បានឱ្យដឹងថា តាមរយៈវត្តមានរោងចក្រសហគ្រាសនៅក្នុងខេត្តបានបង្កើតឱកាសការងារដល់ពលរដ្ឋក្នុងស្រុក និងបានជួយជំរុញដល់ការអភិវឌ្ឍសេដ្ឋកិច្ចក្នុងខេត្តឲ្យរីកចម្រើនបន្ថែមទៀត៕