ព័ត៌មានជាតិ

ពលរដ្ឋស្នើអាជ្ញាធរជួសជុលកំណាត់ផ្លូវ ២៧១ កែង ៣៧១ ចំណុចស្តុបបឹងទំពុន ដែលរងការខូចខាតយូរឆ្នាំ

បានផុស

៤ ខែ មុន

នៅ

ថ្ងៃសុក្រ ១៣ មីនា ២០២៦

ដោយ

អ៊ិន ពិសី

ប្រជាពលរដ្ឋ បានស្នើដល់អាជ្ញាធរ ជួសជុលកំណាត់ផ្លូវ ២៧១ កែង ៣៧១ ដែលរងការខូចខាតជាយូរឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវរងការខូចខាតនេះនៅត្រង់ចំណុចស្តុបបឹងទំពុន តាមបណ្ដោយផ្លូវ ២៧១ កែងផ្លូវ ៣៧១ សង្កាត់បឹងទំពុនទី ២ ខណ្ឌមានជ័យ រាជធានីភ្នំពេញ។

លោក ចំរ៉ុង ជាអ្នកដំណើរឆ្លងកាត់ បានលើកឡើងថា ផ្លូវនេះគាត់ធ្វើដំណើរជាប្រចាំ។ ដំបូង ផ្លូវមានជង្ហុកតូចៗ ជាច្រើនកន្លែង ប៉ុន្តែដោយមានរថយន្ត ម៉ូតូ ឆ្លងកាត់ផ្លូវយូរៗ ទៅ ក៏កើតទៅជាជង្ហុកធំតែម្ដង។

លោកបន្តថា មកដល់ខែមីនា នេះ អាកាសធាតុចាប់ផ្ដើមមានភ្លៀងកក់ខែហើយ ធ្វើឲ្យជង្ហុកដក់ទឹក កាន់តែពិបាកដល់អ្នកដំណើរមើលមិនឃើញ។ ជាពិសេសបើមានម៉ូតូឆ្លងកាត់យប់ឡើង មិនចាប់អារម្មណ៍ នឹងធ្លាក់ជង្ហុកជាក់ជាពុំខាន។

ដោយឡែក អ្នកស្រី ចាន់ សុលី ជាប្រជាពលរដ្ឋរស់នៅតំបន់ក្បែរនោះ លើកឡើងដែរថា បើសិនជាអាជ្ញាធរពាក់ព័ន្ធមិនជួសជុលឲ្យទាន់ពេលវេលានោះទេ ផ្លូវមួយនេះអាចនឹងខូចខ្លាំង ហើយក៏បង្កគ្រោះថ្នាក់ដល់អ្នកធ្វើដំណើរច្រើនផងដែរ។

អ្នកស្រី បានស្នើដល់អាជ្ញាធរពាក់ព័ន្ធទាំងអស់ សូមមេត្តាជួយចុះមកពិនិត្យ និងធ្វើការជួសជុលឲ្យបានស្អាតឡើងវិញផង ដើម្បីងាយស្រួលក្នុងការធ្វើដំណើរ និងបញ្ចៀសគ្រោះថ្នាក់កើតឡើង។

ពាក់ព័ន្ធបញ្ហានេះ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានប្រាប់ឲ្យកម្ពុជាថ្មីដឹងថា លោកបានប្រាប់ទៅមន្ទីរសាធារណការ និងដឹកជញ្ជូនរាជធានីភ្នំពេញ ឲ្យពិនិត្យមើលករណីនេះរួចហើយ៕

អត្ថបទ ៖ រដ្ឋា

វីដេអូ ៖ កំណាត់ផ្លូវ ២៧១ កែង ៣៧១ ចំណុចស្តុបបឹងទំពុន ដែលរងការខូចខាតយូរឆ្នាំ