ព័ត៌មានជាតិ

ក្រោយភ្លៀងមួយមេ អាជ្ញាធរចុះបាញ់ទឹកលាងសម្អាតផ្លូវ ក្នុងមូលដ្ឋានសង្កាត់ចោមចៅទី ៣

បានផុស

៤ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

កាលពីថ្ងៃទី ១៥ ខែមីនា ឆ្នាំ ២០២៦ រដ្ឋបាលសង្កាត់ចោមចៅទី ៣ ដឹកនាំដោយ លោក វ៉ា សាវឿន ចៅសង្កាត់ និង លោក សុទ្ធ សុជាតិ ចៅសង្កាត់រងទី ១ បានដឹកនាំក្រុមការងារ សហការជាមួយមន្ត្រីសាលារាជធានីភ្នំពេញ ចុះបាញ់ទឹកលាងសម្អាតនៅលើដងផ្លូវមហាវិថី ស៊ីជិនពីង ក្នុងមូលដ្ឋានសង្កាត់ចោមចៅទី ៣ ខណ្ឌពោធិ៍សែនជ័យ បន្ទាប់ពីមេឃបង្អុរភ្លៀងមកមួយមេ ធ្វើឲ្យលើដងផ្លូវកកដីភក់ ប៉ះពាល់បរិស្ថាន និងអនាម័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ា សាវឿន ចៅសង្កាត់ចោមចៅទី ៣ លើកឡើងថា ក្រោយមេឃធ្លាក់ភ្លៀងមួយមេធំ ធ្វើឲ្យតំបន់មួយចំនួនទឹកលិចលើដងផ្លូវ មានកាកសំណល់ ដីភក់ជាប់នឹងដងផ្លូវ ប៉ះពាល់ដល់បរិស្ថាន អនាម័យ ជាពិសេសខ្លាចមានការរអិលបង្កឲ្យអ្នកធ្វើដំណើរតាមម៉ូតូដួលគ្រោះថ្នាក់ត្រង់ប្រការណាមួយ ទើបលោកស្នើទៅប្រធានមន្ទីរសាធារណការ និងដឹកជញ្ជូន ផ្ដល់រថយន្តបូមធូលី និងបាញ់ទឹកលាងសម្អាតផ្លូវ ១ គ្រឿង មកបាញ់លាងសម្អាតចាប់ពីស្ពានអាកាសកប់ស្រូវរហូតដល់ព្រំប្រទល់សង្កាត់កន្ទោក ខណ្ឌកំបូល។

លោក វ៉ា សាវឿន តំណាងឲ្យរដ្ឋបាលសង្កាត់ចោមចៅទី ៣ ទាំងមូល សូមថ្លែងអំណរគុណដល់ លោក ឃួង ស្រេង អភិបាលរាជធានីភ្នំពេញ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រួមទាំងក្រុមការងាររាជធានីភ្នំពេញ លោក សក់ ចន្ទ័កញ្ញារិទ្ធ អភិបាលខណ្ឌពោធិ៍សែនជ័យ ដែលបានផ្ដល់រថយន្ត ១ គ្រឿង សម្រាប់បាញ់ទឹកលាងសម្អាតផ្លូវ សម្រួលការធ្វើដំណើរដល់ប្រជាពលរដ្ឋ៕

អត្ថបទ ៖ សុខា