ពលរដ្ឋភៀសសឹកនៅតំបន់បឹងត្រកួន ចាប់ឆ្នោត​រេីសក្បាលដីដើម្បីចូលរស់នៅជម្រកបណ្ដោះ​អាសន្ន ផ្ទះអតីតយុទ្ធជន

រដ្ឋបាលខេត្តបន្ទាយមានជ័យ នៅថ្ងៃទី១៨ ខែមីនា ឆ្នាំ២០២៦ បានរៀបចំពិធីចាប់ឆ្នោតរេីសក្បាលដីឡូត៍ ជូនដល់ពលរដ្ឋភៀសសឹកចំនួនពីរភូមិ នៃតំបន់បឹងត្រកួនដើម្បីចូលរស់នៅជម្រកបណ្ដោះអាសន្ន ផ្ទះអតីតយុទ្ធជន ស្ថិតនៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ពិធីនេះធ្វើឡើងនៅមណ្ឌលភៀសសឹកវត្តកណ្តោលស្ថិតនៅក្នុងឃុំគោករមៀល ស្រុកថ្មពួក ខេត្តបន្ទាយមានជ័យ ដោយដំណាក់កាលដំបូងអោយប្រជាពលរដ្ឋពីរភូមិរួមមានភូមិសាមគ្គី និងភូមិបន្ទាយមានរិទ្ធ សរុបជាង៨០០គ្រួសារ។ ពិធីនេះមានការអញ្ជេីញចូលរួមពីសំណាក់លោក ប្លែក វ៉ារី ប្រធានក្រុមប្រឹក្សាខេត្ត លោក អ៊ុំ រាត្រី អភិបាលនៃគណៈអភិបាលខេត្ត មានការចូលរួមលោក ប្រាក់ ដាវីដ អនុប្រធាន ក្រុមការងាររាជរដ្ឋបាលភិបាលចុះមូលដ្ឋានខេត្តបន្ទាយមានជ័យ និងជាប្រធានក្រុមការងារចុះមូលដ្ឋានស្រុកថ្មពួក ព្រមទាំងមានការចូលរួមពី អាជ្ញាធរស្រុក ឃុំ។

សូមបញ្ជក់ថា លំនៅដ្ឋានបណ្តោះអាសន្ននេះ គឺរៀបចំឡើងលើផ្ទៃដី៤០០ហិកតាសម្រាប់អោយពលរដ្ឋភៀសសឹកប្រមាណ៣០០០គ្រួសារនៅខេត្តបន្ទាយមានជ័យ ដែលមិនទាន់អាចវិលត្រលបទៅលំនៅឋានវិញបាន ដោយសារយោធាថៃបានដាក់ទូកុងតឺន័រ និងរាយបន្លាលួសហ៊ុំព័ទ្ធគ្រប់គ្រងដោយខុសច្បាប់ ក្នុងដែនអធិបតេយ្យកម្ពុជា និងទទួលបានការរស់នៅលើលំនៅដ្ឋានមួយខ្នងលើផ្ទៃដីទំហំ ២០គុណ ​៣០ម៉ែត្រ ជំនួសការរស់នៅក្នុងតង់នៃមណ្ឌលភៀស​សឹក៕

អត្ថបទ៖ អេម ពៅ