ខេត្ត​ព្រះវិហារ រៀបចំ​សង្ក្រាន្តឆ្នាំថ្មី នៅ​ជំរំភៀសសឹក «នាំសំណើច និងក្តីសង្ឃឹម»

នាព្រឹកថ្ងៃទី ២៤ ខែមីនា ឆ្នាំ ២០២៦ នេះ អាជ្ញាធរខេត្តព្រះវិហារ បានរៀបចំកម្មវិធីអបអរសាទរសង្ក្រាន្តឆ្នាំថ្មី នៅមណ្ឌលសុវត្ថិភាពភៀសសឹក ក្នុងវត្តឧត្តគីរីទួលអណ្ដែត ទៅតាមប្រពៃណីជាតិខ្មែរ ស្ថិតនៅឃុំថ្មី ស្រុកគូលែន ដើម្បីឲ្យប្រជាពលរដ្ឋភៀសសឹកបានលេងកម្សាន្តកំដរអផ្សុក។

ពិធីនេះធ្វើឡើងក្រោមអធិបតីភាព លោក មិន ស៊ីថា អភិបាលរងខេត្ត និងជាប្រធានក្រុមការងារប្រចាំការនៅក្នុងមណ្ឌលសុវត្ថិភាពវត្តឧត្តរគីរីទួលអណ្តែត ហៅវត្តថ្នល់បែក និង លោក ប៉ែន ជឹង អភិបាលស្រុកគូលែន និងអាជ្ញាធរមូលដ្ឋាន ព្រមទាំងមានប្រជាពលរដ្ឋភៀសសឹកចូលរួមជាច្រើននាក់ផងដែរ។

លោក ប៉ែន ជឹង បានឲ្យដឹងថា កម្មវិធីខាងលើបានចាប់ផ្ដើមនៅព្រឹកនេះ ដោយមានក្រុងពាលី ពូនភ្នំខ្សាច់ បើកសង្ក្រាន្ត និងលេងល្បែងប្រជាប្រិយគ្រប់ប្រភេទដូចជា ៖ បោះអង្គញ់ , វាយក្អម , ទាញព្រ័ត្រ, លោតបាវ , បៀមទឹកដាក់ដប , ពាំពងមាន់ , រុតត្រីលើគោក ជាដើម , របាំប្រជាប្រិយប្រពៃណី­ តន្ត្រីស្គរដៃ និង ១២ : ០០ នាទី អាហារជួបជុំ(ក្នុងជំរំទាំងមូល) រហូតដល់យប់។

លោកបញ្ជាក់ថា ការរៀបចំកម្មវិធីអបអរសាទរសង្ក្រាន្តឆ្នាំថ្មី នៅមណ្ឌលសុវត្ថិភាពភៀសសឹក ក្នុងវត្តឧត្តគីរីទួលអណ្ដែត នេះ ដើម្បីឲ្យប្រជាពលរដ្ឋភៀសសឹកបានលេងកម្សាន្តកំដរអផ្សុក នៅពេលដែលចាកចេញពីលំនៅឋានមករស់នៅជំរំភៀសសឹកបានសប្បាយចិត្តខ្លះ។

គួរជម្រាបថា នៅល្ងាចថ្ងៃដដែល ក៏នឹងមានការអញ្ជើញជាអធិបតីភាពដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ព្រមទាំងអាជ្ញាធរពាក់ព័ន្ធ ចូលរួមលេងកម្សាន្តដោយក្តីរីករាយផងដែរ៕
អត្ថបទ ៖ ជុន កុសល