លោក គីម រិទ្ធី បង្ហាញការឈឺចាប់ ចំពោះការបំផ្លាញប្រាសាទព្រះវិហារ

លោក គីម រិទ្ធី អភិបាលខេត្តព្រះវិហារ បានបង្ហោះសារលើបណ្ដាញសង្គមហ្វេសប៊ុក ដោយបង្ហាញអារម្មណ៍ឈឺចាប់ និងសោកស្តាយយ៉ាងខ្លាំង ចំពោះការខូចខាតលើ ប្រាសាទព្រះវិហារ ដែលជាមរតកវប្បធម៌ដ៏មានតម្លៃរបស់ជាតិខ្មែរ។

លោកបានលើកឡើងថា ប្រាសាទព្រះវិហារ គឺជាតំណាងនៃអរិយធម៌ដ៏ខ្ពង់ខ្ពស់របស់ខ្មែរ ដែលបង្ហាញពីសិល្បៈ វិទ្យាសាស្ត្រ ស្ថាបត្យកម្ម និងបញ្ញារបស់បុព្វបុរសខ្មែរ។ ការបំផ្លាញលើប្រាសាទនេះ មិនមែនត្រឹមតែបំផ្លាញថ្ម ឬសំណង់បុរាណប៉ុណ្ណោះទេ ប៉ុន្តែជាការបំផ្លាញមរតករបស់មនុស្សជាតិ និងប៉ះពាល់ដល់ប្រវត្តិសាស្ត្រ និងអរិយធម៌ដែលមានអាយុកាលរាប់ពាន់ឆ្នាំ។

ក្នុងនាមជាកូនខ្មែរ លោកអភិបាលខេត្ត បានបញ្ជាក់ថា លោកមានអារម្មណ៍ឈឺចាប់យ៉ាងខ្លាំង ពេលឃើញមរតកដ៏ថ្លៃថ្នូរនេះរងការខូចខាត។ ទោះបីជាថ្មអាចត្រូវបំផ្លាញបានក៏ដោយ ប៉ុន្តែប្រវត្តិសាស្ត្រ និងព្រលឹងជាតិ មិនអាចបំផ្លាញបានឡើយ។

លោកបានអំពាវនាវឱ្យមានការចូលរួមពីគ្រប់ភាគី ក្នុងការការពារ និងថែរក្សា ប្រាសាទព្រះវិហារ ដែលជាអត្តសញ្ញាណជាតិ និងជាមរតកពិភពលោក ឱ្យបានរឹងមាំ និងគង់វង្សជារៀងរហូត៕