ក្រុមក្មេងស្ទាវ៥ទៅ១០នាក់ កាប់សម្លាប់យុវជនម្នាក់ស្លាប់នៅកន្លែង និងម្នាក់ទៀតរងរបួសធ្ងន់

ក្រុមក្មេងស្ទាវមានគ្នាប្រមាណ៥ទៅ១០នាក់ បានបើកការប្រយុទ្ធកាប់ចាក់គ្នាយ៉ាងចាស់ដៃ បណ្តាលឱ្យមានយុវជនម្នាក់ដេកស្លាប់ក្នុងថ្លុកឈាមនៅកន្លែងកើតហេតុ រីឯជនបង្កកំពុងរត់គេចខ្លួនបាត់ស្រមោលទាំងយប់។

ករណីក្មេងមានជម្លោះរហូតឈានដល់គូរបដិបក្សស្លាប់នេះ កើតឡើងកាលពីវេលាម៉ោង១០និង១០នាទីយប់ ថ្ងៃទី២២ ខែមិថុនា ឆ្នាំ២០២១ទល់មុខសាលារៀនសាមគ្គីឯកជន ក្បែរសាលាសង្កាត់ដងទង់ ក្រុងខេមរភូមិន្ទ។

បើតាមសមត្ថកិច្ចជំនាញបានឱ្យដឹងថា យុវជនដែលស្លាប់មានឈ្មោះ លីម៉ា អាយុ១៨ឆ្នាំ ជនជាតិខ្មែរ រស់នៅភូមិពាមក្រសោប ឃុំពាមក្រសោប ស្រុកមណ្ឌលសីមា មុខរបរជាកម្មករ បានរងរបួសចំកណ្តាលក្បាលចំនួនពីរកន្លែង និង​លើ​ដងខ្លួនចំនួន៤កន្លែង។ រីឯជនរងគ្រោះម្នាក់ទៀតឈ្មោះ ប៉ាក់ រ៉ាវុធ អាយុ១៩ឆ្នាំ រងរបួលធ្ងន់កំពុងសម្រាកព្យាបាលនៅមន្ទីរពេទ្យបង្អែកខេត្ត មានទីលំនៅភូមិពាមក្រសោបជាមួយអ្នកស្លាប់។

សមត្ថកិច្ចនគរបាលបញ្ជាក់ថា តាមការសាកសួរ និងពិនិត្យសកម្មភាពអំពើហិង្សាក្នុងកាមេរ៉ាសុវត្ថិភាព ជនសង្ស័យមានគ្នីគ្នា៥ទៅ១០នាក់ ក្រោយកាប់សម្លាប់រួច ពួកគេនាំគ្នារត់គេចខ្លួនបាត់អស់ភ្លាមៗតែម្ដង។

ករណីឃាតកម្មនេះ គេនៅពុំទាន់ដឹងមូលហេតុច្បាស់លាស់នៅឡើយទេ ដោយកម្លាំងសមត្ថកិច្ចជំនាញកំពុងបើកការស៊ើបអង្កេតស្រាវជ្រាវរកមុខក្រុមជនដៃដល់មកផ្តន្ទាទោសតាមច្បាប់ជាធរមាន៕

អត្តបទ ៖ សិរីវឌ្ឍនៈ