ក្មេងប្រុសស្រី ចុះលេងទឹកស្រះ​ពីរ​នាក់បងប្អូនលង់ស្លាប់

ក្មេងប្រុសស្រីពីរនាក់បងប្អូនលេងទឹកស្រះក្រោយផ្ទះ មេឃកំពុងភ្លៀងដែលមានជម្រៅជ្រៅ  ត្រូវបានលង់ស្លាប់ ខណៈម្ដាយមិនបានដឹងនិងឪពុករវល់ចេញទៅធ្វើការងារខាងក្រៅ។         

ហេតុការណ៍នេះ បានកើតឡើង នៅវេលាម៉ោង ៥ រសៀលថ្ងៃទី ១៨ ខែកក្កដា ស្ថិតនៅត្រង់ចំណុច ភូមិអូរខ្លុង ស្ថិតក្នុងភូមិស្រែពោធិ៍សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង។

តាមសម្ដីម្តាយក្មេងរងគ្រោះទាំងពីរនាក់ បានឱ្យដឹងថា កូនទាំងពីរនាក់ ម្នាក់អាយុ ៦ ឆ្នាំ និងម្នាក់ទៀត អាយុ ៨ ឆ្នាំ រស់​នៅភូមិកើតហេតុ។

ម្ដាយក្មេងរងគ្រោះបានបន្តឱ្យដឹងទៀតថានៅមុនកើតហេតុមានភ្លៀងធ្លាក់ខ្លាំង ហើយគាត់មិនដឹងថាកូនរបស់គាត់ទាំងពីរនាក់ បានទៅលេងទឹកស្រះនោះទេ។

បន្ទាប់ពីបាត់កូន ត្រូវបានអ្នកជិតខាងប្រាប់ថា ឃើញមកលេងទឹកស្រះ រកមិនឃើញ ទើបនាំគ្នាចុះរាវរក និងយកសំ​ណាញ់​បង់ផងនោះ ទើបប្រទះឃើញកូនទាំងពីរនាក់ ទោះជាខំយកមកធ្វើចលនាសង្គ្រោះយ៉ាងណាក៏ដោយ ក៏មិនអាចជួយសង្គ្រោះបានឡើយ។         

ក្រោយកើតហេតុត្រូវបានក្រុមគ្រួសាររាយការណ៍ជូនសមត្ថកិច្ចមចុះទៅពិនិត្យនិងធ្វើកោសល្យវិច័យ ត្រូវបានពិនិត្យឃើញថាក្មេងប្រុសស្រីទាំងពីរនាក់ ស្លាប់ដោយសារលង់ទឹកពិតប្រាកដមែន និងបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ ដោយៈ ងិនលីម