បាឡែនដឹកឈើប្រណិត​ត្រូវបានអាវុធហត្ថស្រុកអូរយ៉ាដាវ​តាមប្រមាញ់​ចាប់បាន

អាវុធហត្ថស្រុកអូរយ៉ាដាវបានឱ្យដឹងថា ដោយមានការចង្អុលបង្ហាញពីលោកឧត្តមសេនីយ៍ត្រី ថាវ យ៉េន មេបញ្ជាការកងរាជអាវុធហត្ថខេត្ត នៅថ្ងៃទី២២ ខែកក្កដា កម្លាំងមូលដ្ឋានកងរាជអាវុធហត្ថស្រុកអូរយ៉ាដាវចំនួន ៦នាក់ ប្រេីប្រាស់ រថយន្ត ចំនួន ២គ្រឿង បានធ្វេីការចុះ ស្រាវជ្រាវរុករកឃេីញរថយន្តដែលប្រព្រឹត្តបទល្មើស ១គ្រឿង ម៉ាក កាមរី បាឡែន ដែលជនសង្ស័យ បានយកមកលាក់ទុក នៅចំណុច ភូមិប្លង់ ឃុំប៉ាតេ ស្រុកអូរយ៉ាដាវ ហើយបានរត់គេចខ្លួនបាត់។

របាយការណ៍បានបញ្ជាក់ថា រថយន្តខាងលេី នេះ គឺមានការជាប់ពាក់ព័ន្ធ ករណី ដឹក ជញ្ជូន ផលអនុផលព្រៃឈេី គ្មានលិខិតអនុញ្ញាត កាលពីថ្ងៃទី ២១ ខែកក្កដា ឆ្នាំ២០២១ វេលាម៉ោង៧និង៣០នាទី នៅ ចំណុច និយាមកា (749948-1513636) ស្ថិត នៅ ក្នុងភូមិ កាតែ ឃុំលំជ័រ ស្រុក អូរយ៉ាដាវ ខេត្តរតនគិរី។

បច្ចុប្បន្នសមត្ថកិច្ចបានដកហូតវត្ថុតាងរថយន្តចំនួន ១គ្រឿង និងឈើប្រណិតប្រភេទធ្នង់គីឡូចំនួន៣៨០ គីឡូក្រាម ស្មើនិង០,៣០៤ម៉ែត្រគូប។ ហើយបានប្រគល់ជូនទៅឱ្យជំនាញ រដ្ឋបាល ព្រៃឈើស្រុកបរ​កែវ​ដេីម្បីចាត់ការបន្តតាមច្បាប់ព្រៃឈើ។

ដោយឡែកជនសង្ស័យកម្លាំងជំនាញកំពុងធ្វើការស្រាវជ្រាវស្វែងរកចាប់ខ្លួនដើម្បីចាត់ការតាមនីតិវិធី៕

ដោយៈ វុទ្ធឦសាន