សំណង់អត់ច្បាប់​ធ្វើលើចំណីដីផ្លូវសាធារណៈ​ក្នុងស្រុកស្ទោង​មន្ទីរសូរិយោដីខេត្ត​សម្រេចផ្អាកបណ្តោះអាសន្ន

សំណង់រឹងសាងសង់យ៉ាងអាណាធិបតេយ្យ នៅលើចំណីផ្លូវសាធារណៈ បានកើតមានជាហូរហែរ បើទោះ​បីជា មានការហាមឃាត់ពី មន្ទីរសូរិយោដី និងសំណង់ខេត្តក៏ដោយ ក៏ម្ចាស់ការដ្ឋាននៅតែសាងសង់ដោយមិនគោរពច្បាប់ ធ្វើឱ្យមហាជនដាក់ការសង្ស័ទៅលើថ្នាក់ដឹកនាំមូលដ្ឋានជាអ្នកគ្រប់គ្រង។

ជាក់ស្ដែងសំណង់អាគារ ២ កន្លែង នៅភូមិឈើទាល ឃុំកំពង់ចិនត្បូង ស្រុកស្ទោង ខេត្តកំពង់ធំ សាងសង់ឡើងគ្មានច្បាប់អនុញ្ញាត និងគ្មានប្លង់កម្មសិទ្ធ ដោយសារជាចំណីផ្លូវជាតិលេខ៦ ដែលកំណត់ដោយមាត្រាច្បាប់ ដោយវាស់ពីអាក់ផ្លូវម្ខាង៣០ម៉ែត្រ តែច្បាប់បានអនុឡោឲ្យអ្នកដែលរស់នៅលើផ្លូវពីមុនមក ឲ្យរស់នៅបន្តតែហាមសាងសង់បន្ថែម ដោយសារតែគ្មានការអនុញ្ញាតព្រោះជាដីចំនីផ្លូវ។

អាគារទី ១ ជា បានសាងសង់អាគារ៤ល្វែង៣ជាន់ ជាកម្មសិទ្ធរបស់អ្នកស្រី តឹង តន់ និងនាង ជិម ណារ៉ុម និងទី២ ស្ថិតនៅខាងលិចស្ទឹងស្ទោង៣០ម៉ែត្រ។

សម្រាប់ការសាងសង់សំណង់ផ្ទះល្វែង៤ល្វែង ៣ជាន់របស់លោកស្រី តឹង តន់ និងនាង ជិម ណារ៉ុម បានដំណើរ​​ការសាងសង់ជាធម្មតា បើទោះបីជាមានក្រុមការងារថ្នាក់ខេត្តចុះមកផ្អាកការសាងសង់បណ្តោះអាសន្នក៏ដោយ យោងតាមរបាយការ របស់មន្ទីរសូរិយោដីខេត្តផ្ញើរជូនអង្គភាព កម្ពុជាថ្មីនៅថ្ងៃនេះ បញ្ជាក់ថា ការចុះពិនិត្យជាក់ស្តែង ជំនាញបានធ្វើរបាយការណ៍​ជូន ឯកឧត្តម សុខ លូ អភិបាលខេត្តកំពង់ធំ គណកម្មាការរៀបចំដែនដី សម្រេចផ្អាកការសាងសង់ជាបណ្តោះ​អាសន្ននៅថ្ងៃទី ២៨ ខែមិថុនា ឆ្នាំ ២០២១។

សូមបញ្ជាក់ថា រហូតមកដល់ពេលនេះ សំណង់ផ្ទះល្វែង របស់លោកស្រី តឹង តន់ និងនាង ជិម ណារ៉ុម នៅតែដំណើរការសាងសង់ដដែល លោក អ៊ឹម សុឌីណា ប្រធានមន្ទីរសូរិយោដី និងសំណង់ខេត្តកំពង់ធំ បានឆ្លើយ​តប តាមប្រព័ន្ឋតេក្រាមថា (មន្ទីរបានចុះទៅពិនិត្យ និងផ្អាកការសាងសង់នេះជាបណ្តោះអាសន្ន និងបានរបាយការណ៏ជូនទៅឯកឧត្តមអភិបាលខេត្ត រួចរាល់ហើយ តែបើសកម្មភាពការសាងសង់នេះនៅតែបន្ត មន្ទីរនិងចាត់ក្រុមការងារដោយសហការណ៏ជាមួយរដ្ឋបាលខេត្តចុះទៅពិនិត្យថែមទៀត)។

ទោះបីជាយ៉ាងណា មហាជនបានកំពុងតែរងចាំមើលថា តើអាជ្ញាធរ និងសមត្ថកិច្ចជំនាញអាចមានលទ្ធភាពគ្រប់គ្រាន់ដែរឬទេ ក្នុងការទប់ស្កាត់ការសាងសង់សំណងទាំង២កន្លែងនេះ ព្រោះឥលូវបំរាមការសាងសង់របស់ជំនាញសាបដូចទឹកទន្លេ (ឆ្មាចេះតែដេក កណ្តុរពាំចំណី) ជាពិសេសការអនុវត្តច្បាប់របស់សមត្ថកិច្ចកាន់តែចុះខ្សោយគ្មានប្រសិទ្ធភាព៕ ដោយៈ ប៊ុន រដ្ឋា