មន្ទីរពេទ្យផ្សេង មុនបញ្ជូនអ្នកជំងឺ​មកពេទ្យរុស្ស៊ី ត្រូវភ្ជាប់លក្ខខណ្ឌ ៤នេះ

មន្ទីរពេទ្យមិត្តភាពខ្មែរ-សូវៀត នៅថ្ងៃទី ០២ ខែកញ្ញា ឆ្នាំ២០២១ បានបញ្ជាក់ប្រាប់លក្ខខណ្ឌចំនួន ៤ ចំណុចទៅដល់ មន្ទីរពេទ្យរដ្ឋ និងឯកជនទាំងអស់ មុននឹងបញ្ជូនអ្នកជំងឺមកមន្ទីរពេទ្យរុស្ស៊ី។

យោងតាមសេចក្តីណែនាំរបស់ក្រសួងសុខាភិបាល លក្ខខណ្ឌបច្ចេកទេស ក្នុងបរិបទនៃការរីករាលដាលនៃជំងឺកូវីដ-១៩ ផ្នែកសង្រ្គោះបន្ទាន់នៃមន្ទីរពេទ្យមិត្តភាពខ្មែរ-សូវៀត ត្រូវភ្ជាប់លក្ខខណ្ឌចំនួន ៤ រួមាន៖

ទី១ មុនការបញ្ជូនអ្នកជំងឺទាំងអស់មកកាន់ផ្នែកសង្រ្គោះបន្ទាន់ ត្រូវផ្តល់ព័ត៌មានអំពីស្ថានភាពអ្នកជំងឺ និងព័ត៌មានចាំបាច់ដែលដែលទាក់ទង់និងការបញ្ជូនអ្នកជំងឺ តាមរយលេខទូរស័ព្ទ ០២៣ ២១១ ៨៧៨ និង ០៨៨ ៤៨៨៨ ១១។

ទី ២ ត្រូវភ្ជាប់មកជាមួយនូវលិខិតបញ្ជូនអ្នកជំងឺ ឯកសារពាក់ព័ន្ធ ទី ៣ ត្រូវផ្តល់លទ្ធផលតេស្ររហ័ស​កូវីដ-១៩​ មកជាមួយ បើបានធ្វើរួច និងទី៤ ត្រូវបញ្ជូនអ្នកជំងឺតាមមធ្យោបាយសមស្រប ប្រកបដោយ ប្រសិទ្ធភាព និងសុវត្ថិភាពសំរាប់អ្នកជំងឺ តាមការណែនាំរបស់ក្រសួងសុខាភិបាល។

ផេកហ្វេសប៊ុកផ្លូវការរបស់មន្ទីរពេទ្យរុស្ស៊ីបញ្ជាក់ថា ផ្នែកសង្រ្គោះបន្ទាន់សង្ឃឹមយ៉ាងម៉ុតមាំ និងអរគុណជាអនេកដល់បងប្អូនទាំងអស់ ចូលរួមសហការដើម្បីអនុវត្តទៅតាមសេចក្តីជូនដំណឹងនេះ ដើម្បីបង្ករលក្ខណៈងាយស្រួលដល់ក្រុមការងារ និងកាត់បន្ថយហានីភ័យគ្រោះថ្នាក់ផ្សេងៗចំពោះអ្នកជំងឺ៕