ព្រឹកនេះ ប្រធានាធិបតីវៀតណាម ចូលក្រាបបង្គំគាល់សម្ដេចព្រះសង្ឃរាជទាំងពីរគណៈ

នៅព្រឹកថ្ងៃទី២២ ខែធ្នូ ឆ្នាំ២០២១នេះ គឺជាថ្ងៃទីពីរនៃដំណើរទស្សនកិច្ចរបស់លោក ង្វៀន សួនហ៊្វុក (Nguyen Xuan Phuc) ប្រធានរដ្ឋ និងជាប្រធានាធិបតីវៀតណាម នៅប្រទេសកម្ពុជា។ បើតាមកម្មវិធីដែលបានគ្រោងទុក គឺនៅព្រឹកថ្ងៃពុធនេះ លោកប្រធានាធិបតី Nguyen Xuan Phuc ទទួលទានអាហារពេលព្រឹក ដែលរៀបចំដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅសណ្ឋាគារសូហ្វីតែលភ្នំពេញភូគីត្រា ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់មក លោក Nguyen Xuan Phuc នឹងអញ្ជើញចូលក្រាបបង្គំគាល់សម្ដេចព្រះអគ្គមហាសង្ឃរាជាធិបតី ទេព វង្ស សម្ដេចព្រះមហាសង្ឃរាជនៃព្រះរាជាណាចក្រកម្ពុជានៅវត្តឧណ្ណាលោម ។ ក្រោយមក លោកនឹងអញ្ជើញចូលក្រាបបង្គំគាល់សម្ដេចព្រះអភិសិរីសុគន្ធាមហាសង្ឃរាជាធិបតីកិត្តិឧទ្ទេសបណ្ឌិត ប៊ូ គ្រី ព្រះមហាសង្ឃរាជគណៈធម្មយុត្តិកនិកាយនៃព្រះរាជាណាចក្រកម្ពុជា នៅវត្តស្វាយពពែ ហើយនៅវេលាម៉ោងជាង២ រសៀល លោកនឹងធ្វើដំណើរចេញពីស្ថានទូតវៀតណាមប្រចាំកម្ពុជា ដើម្បីធ្វើមាតុភូមិនិវត្តន៍ទៅកាន់ប្រទេសវៀតណាមវិញ។

លោក ង្វៀន សួនហ៊្វុក (NGUYEN XUAN PHUC) ប្រធានរដ្ឋវៀតណាម បានអញ្ជើញមកបំពេញទស្សនកិច្ចរយៈពេល២ ថ្ងៃនៅកម្ពុជា ដោយចាប់ពី២១ ដល់២២ ខែធ្នូ ឆ្នាំ២០២១។  នៅក្នុងដំណើរទស្សនកិច្ចថ្ងៃទី១ បន្ទាប់ពីមកដល់កម្ពុជា លោកបានអញ្ជើញចូលគាល់ព្រះមហាក្សត្រ នៅព្រះបរមរាជវាំង និងអញ្ជើញចូលរួមប្រជុំកំពូលជាមួយសម្ដេចអគ្គមហាសេនាបតីតេជោ ហ៊ុន សែន និងទទួលទានអាហាររួមគ្នានៅវិមានសន្តិភាព។ នៅក្នុងកិច្ចប្រជុំ ជាមួយសម្តេចតេជោ ហ៊ុន សែន មានឯកសារចំនួន៧ ត្រូវបានចុះហត្ថលេខា។

ក្រសួងការបរទេសកម្ពុជា បានបញ្ជាក់ថា ដំណើរទស្សនកិច្ចផ្លូវរដ្ឋរបស់លោក ង្វៀន សួនហ៊្វុក មកកាន់ព្រះរាជាណាចក្រកម្ពុជានេះ នឹងបន្តពង្រឹង និងធ្វើឱ្យកាន់តែឲ្យស៊ីជម្រៅបន្ថែមទៀតនូវទំនាក់ទំនងទ្វេភាគី ក្នុងស្មារតីជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងសន្តិភាព-ស្ថិរភាពយូរអង្វែងរវាងប្រទេសទាំងពីរ ដើម្បីជាប្រយោជន៍ទៅវិញទៅមកសម្រាប់ប្រជាជននៃប្រទេសទាំងពីរ៕

អត្ថបទ ៖ កោះកែវ