ក្រសួងប្រៃសណីយ៍ ប្រកាសជ្រើសរើស អ្នកជំនាញបច្ចេកវិទ្យា ១២៥ នាក់

ក្រសួងប្រៃសណីយ៍ និងទូរគមនាគមន៍ បានប្រកាសជ្រើសរើសអ្នកជំនាញបច្ចេកវិទ្យាចំនួន ១២៥ នាក់ដើម្បីពង្រឹង និងពង្រីកការប្រើប្រាស់បច្ចេកវិទ្យាក្នុងការផ្តល់សេវាសាធារណៈជួនសាធារណជនឱ្យកាន់តែល្អប្រសើរ។

យោងតាមសេចក្តីជូនដំណឹងរបស់ក្រសួងប្រៃសណីយ៍ និងទូរគមនាគមន៍ ចុះថ្ងៃទី ៩ ខែមករានេះបានឱ្យដឹងថា ការជ្រើសរើសអ្នកជំនាញចំនួន ១២៥ នាក់ សម្រាប់បម្រើការងារនៅទីស្ដីការក្រសួងនេះ គឺដើម្បីពង្រឹង និងពង្រីកការប្រើប្រាស់បច្ចេកវិទ្យាក្នុងការផ្តល់សេវាសាធារណៈឱ្យកាន់តែល្អប្រសើរ ក្នុងទិសដៅជំរុញការអភិវឌ្ឍសេដ្ឋកិច្ច និងសង្គម ជាពិសេសដើម្បីធានាឱ្យបានភាពជោគជ័យនៃការអនុវត្តគោលនយោបាយរដ្ឋាភិបាលឌីជីថលនៅកម្ពុជា។

បើតាមក្រសួង អ្នកជំនាញចំនួន ១២៥ នាក់នោះរួមមាន៖

– អ្នកជំនាញបច្ចេកវិទ្យាក្លោដ (Cloud Technology) ចំនួន ១៥នាក់

– អ្នកជំនាញមជ្ឈមណ្ឌលទិន្នន័យ (Data Center) ចំនួន ១៥នាក់

– អ្នកជំនាញបច្ចេកវិទ្យាបញ្ញាសិប្បនិម្មិត (Artificial Intelligence – AI) ចំនួន ១៥នាក់

– អ្នកជំនាញអភិវឌ្ឍសុសវែ (Software Development) ចំនួន ១៥នាក់

– អ្នកជំនាញវិទ្យាសាស្ត្រទិន្នន័យ (Data Science) ចំនួន ១៥នាក់

– អ្នកជំនាញសន្តិសុខសាយប័រ (Cybersecunty) ចំនួន ១៥នាក់

– អ្នកជំនាញបច្ចេកវិទ្យាប្លុកផេន (Blockchain Technology)ចំនួន ១៥នាក់

– អ្នកជំនាញហេដ្ឋារចនាសម្ព័ន្ធទូរគមនាគមន៍(Telecommunications Infrastructure) ចំនួន ២០នាក់។

ក្រសួងបានបន្តថា ចំពោះលក្ខខណ្ឌដែលត្រូវជ្រើសរើស បេក្ខជនត្រូវមានសញ្ញាបត្រថ្នាក់បរិញ្ញាបត្រឡើងទៅ ស្របតាមជំនាញជ្រើសរើស។ មានចំណេះដឹងភាសាអង់គ្លេសអាចប្រើការបាន មានឆន្ទៈ និងក្រមសីលធម៌បំពេញការងារ មានភាពស្មោះត្រង់ និងយកចិត្តទុកដាក់ចំពោះការងារ មានភាពអត់ធ្មត់ តស៊ូ និងឧស្សាហ៍ព្យាយាម មានសមត្ថភាពបំពេញការងារដោយឯករាជ្យ និងការងារជាក្រុម មានគំនិតផ្តួចផ្តើម និងច្នៃប្រឌិត ទទួលយកការបណ្តុះបណ្តាលចំណេះដឹងបន្ថែម និងគុណវុឌ្ឍិផ្សេងទៀតតាមជំនាញនីមួយៗ ដែលភ្ជាប់មកជាមួយសេចក្តីជូនដំណឹងនេះ។

រីឯប្រាក់បៀវត្យ និងប្រាក់ឧបត្ថម្ភប្រចាំខែ ស្របតាមមុខតំណែង សមត្ថភាព បទពិសោធ ទទួលបានចំណេះដឹង និងជំនាញឯកទេសវិជ្ជាជីវៈបន្ថែមតាមរយៈការបណ្តុះបណ្តាល ការអនុវត្តការងារ និងគុណវុឌ្ឍិរបស់បេក្ខជនជាក្រុម និងការបង្ហាញភាពជាអ្នកដឹកនាំក្នុងវិស័យសាធារណៈ និងឱកាសក្លាយជាមន្ត្រីរាជការដោយផ្អែកលើសមត្ថភាព និងសមិទ្ធកម្មការងារ។

ចំណែក កាលបរិច្ឆេទទទួលពាក្យ និងនីតិវិធីនៃការ ជ្រើសរើសបេក្ខជនទាំងពីរភេទត្រូវបំពេញពាក្យស្នើសុំតាមអាសយដ្ឋាន www.mptc.gov.kh/careers ចាប់ពីថ្ងៃជូនដំណឹងនេះរហូតដល់ថ្ងៃទី ២៨ ខែមករា ឆ្នាំ ២០២២ វេលាម៉ោង ១៧:០០ នាទី។ បេក្ខជនត្រូវប្រឡងប្រជែងតាមរយៈវិញ្ញាសាសរសេរ ឬអនុវត្តកិច្ចការ ICT (ICT Assignment)។ បេក្ខជនដែលទទួលបានលទ្ធផលជាប់លើវិញ្ញាសាសរសេរ ត្រូវមកធ្វើបទបង្ហាញ ឬ មកសម្ភាសន៍ ដោយគណៈកម្មការរៀបចំការប្រឡងជ្រើសរើសអ្នកជំនាញ។

សម្រាប់ព័ត៌មានបន្ថែម សូមទាក់ទងមកនាយកដ្ឋានបុគ្គលិក និងបណ្តុះបណ្តាល នៃក្រសួងប្រៃសណីយ៍ និងទូរគមនាគមន៍ តាមរយៈលេខទូរសព្ទ ០៩៦ ៧០០ ៦៦៦៦, ០១២ ៩២៥ ៩៣៥ និង ០៩២ ៨៨៦ ២៤២៕

អត្ថបទ៖ សំអឿន