សម្ដេចតេជោ ហ៊ុន សែន គ្រោងជួបសិស្សប្រឡងជាប់និទ្ទេស A នាថ្ងៃទី ២៨ កុម្ភៈ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសអំពីគ្រោងជួបសំណេះសំណាលជា​​មួ​យ​សិស្សប្រឡងជាប់និទ្ទេស A នាចុងខែកុម្ភៈ ឆ្នាំ ២០២២នេះ។ សម្ដេចតេជោ ហ៊ុន សែន បានប្រកាសយ៉ាងដូច្នេះ បានធ្វើឡើងក្នុងពិធីសម្ពោធដាក់ ឲ្យប្រើប្រាស់ជាផ្លូវការកំណាត់ផ្លូវជាតិលេខ ៧ នាព្រឹកថ្ងៃទី ៧ ខែកុម្ភៈ ឆ្នាំ ២០២២នេះ។

សម្ដេចតេជោនាយករដ្ឋមន្ត្រី មានប្រសាសន៍ថា នៅថ្ងៃទី ២៨ ខែកុម្ភៈ ឆ្នាំ ២០២២ខាងមុខនេះ សម្ដេចនឹងជួបសំណេះ សំណាល ជាមួយសិស្សប្រឡងជាប់បាក់ឌុបនិទ្ទេស A នៅទូទាំងប្រទេសចំនួន ១,៧៥៣ នាក់ ហើយការជួបសំណេះ សំណាលនេះ គឺត្រូវធ្វើឡើងក្នុងរាជធានីភ្នំពេញ។

សម្ដេចតេជោ ហ៊ុន សែន បានថ្លែងបញ្ជាក់ថា «ខ្ញុំប្រកាសថា នឹងទទួលសិស្សនិទ្ទេស A នៅទីក្រុងភ្នំពេញ ហើយសុំប្រគល់ឲ្យអាជ្ញាធរខេត្តទាំងអស់ ចៅហ្វាយខេត្តមកទីនេះច្រើនណាស់ ខេត្តត្រូវទទួលខុសត្រូវលើការជូនកូនសិស្ស, រួមជាមួយឪពុក-ម្ដាយ ទៅទីក្រុងភ្នំពេញ ចេញថ្លៃសណ្ឋាគារអីខ្លួនឯងទៅ ព្រោះខេត្តមានលុយ»៕

អត្ថបទ៖ ឃួន សុភ័ក្រ