ព័ត៌មានជាតិ

មាតាបិតា និងបេក្ខជនយល់យ៉ាងណាខ្លះ ចំពោះការពន្យាពេលប្រឡងបាក់ឌុប?

បានផុស

៥ years មុន

នៅ

ថ្ងៃសុក្រ ១១ ធ្នូ ២០២០

ដោយ

ក្រសួងអប់រំយុវជន និងកីឡាបានប្រកាសពន្យាពេលប្រឡងសញ្ញាបត្រមធ្យមសិក្សាទុតិយភូមិឬបាក់ឌុប ពីថ្ងៃទី២១និង២២ ខែធ្នូ ឆ្នាំ២០២០ ទៅធ្វើនៅថ្ងៃទី១១ ខែមករា ឆ្នាំ២០២១វិញ ដោយសារព្រឹត្តិការណ៍សហគមន៍២៨វិច្ឆិកា។

ចំពោះការលើកពេលប្រឡងមួយដងជាពីរដងរបស់ក្រសួងអប់នេះ បានធ្វើឲ្យបេក្ខជនប្រឡងក៏ដូចជាអាណាព្យាបាលមួយចំនួនមានការគាំទ្រ និងខ្លះទៀតមិនឯកភាពទេ ដោយពួកគាត់គិតថា វាធ្វើឲ្យប៉ះពាល់ដល់សតិអារម្មណ៍និងទឹកចិត្តរបស់សិស្សដែលបានត្រៀមខ្លួនក្នុងការប្រឡង។

កញ្ញា សេង សុវណ្ណនីកា រៀននៅវិទ្យាល័យព្រែកដំបូកស្រុកស្រីសន្ធរ ខេត្តកំពង់ចាម បានបង្ហាញចំណាប់អារម្មណ៍ឲ្យដឹងថា «សម្រាប់ខ្ញុំ ការពន្យារពេលប្រឡងបាក់ឌុបនេះ ខ្ញុំមិនគាំទ្រទេ ព្រោះធ្វើឲ្យខ្ញុំខាតពេលវេលា ហើយចេះតែអូសបន្លាយពេលយូរទៅៗ។យ៉ាងណានេះជាការសម្រេចរបស់ក្រសួង ដោយសារក្រសួងបារម្ភពីការឆ្លងជំងឺកូវីដ១៩»។

ចំណែកកញ្ញា អ៊ីម ស្រីម៉ី រៀននៅសាលា វិទ្យាល័យហ៊ុនសែនអង្គស្នួលបានឲ្យដឹងដែរថា«ចំពោះខ្ញុំផ្ទាល់យល់ថា ការលើកថ្ងៃប្រឡងនេះក៏ជាការត្រឹមត្រូវម្យ៉ាងដែរ ព្រោះប្រទេសជាតិកំពុងជួបវិបិត្តដូចច្នេះហើយប្រជាជនក៏ដូចជាសិស្សា នុសិស្សគួរតែចូលរួមជាមួយរដ្ឋាភិបាល សហការគ្នាដើម្បីជៀសផុតពីវិបិត្ត(កូវីដ)នេះ»។

កញ្ញាបានបន្តថា«តែខ្ញុំក៏សង្ឃឹមថា នឹងគ្មានការលើកថ្ងៃប្រឡងទៀតនោះទេ ព្រោះអាចប៉ះពាល់យ៉ាងខ្លាំងដល់ទឹកចិត្តសិស្សដែលខំរៀន ក៏ដូចជាប៉ះពាល់ដល់ការសិក្សារបស់សិស្សប្អូនដែលត្រូវឡើងថ្នាក់ទី១២ថ្មីផងដែរ»។

រីឯអ្នកស្រី ចាន់ ធឿន រស់នៅភ្នំពេញដែលមានកូនប្រឡងបាក់ឌុបនៅឆ្នាំនេះដែរ បាននិយាយថា «សម្រាប់ខ្ញុំចង់ឲ្យក្រសួងរៀបចំការប្រឡងឲ្យបានឆាប់ៗដើម្បីឲ្យដឹងធ្លាក់ជាប់ ព្រោះសម័យកូវីដ១៩ខ្លាចមិនបានប្រឡង»។

អ្នកស្រីបានបន្តថា«ឥឡូវនេះក្រសួងបានកំណត់ច្បាស់លាស់ហើយប្រឡងនៅថ្ងៃទី១១ ខែមករាឆ្នាំក្រោយ តែសូមកុំឲ្យលើកពេលបន្តទៀតទៅបានហើយ»។

អ្នកស្រីតែងតែណែនាំដល់កូនឲ្យប្រឹងរៀន ទោះបីជារៀននៅផ្ទះក៏ដោយដើម្បីធ្វើយ៉ាងណាប្រឡងឲ្យជាប់ ដើម្បីឈានឆ្ពោះទៅរៀនបន្តនៅសាកលវិទ្យាល័យបន្តទៀត។

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជាបានទទួលស្គាលថា មានការប៉ះពាល់ខ្លះដល់បេក្ខជនប្រឡង ព្រោះគាត់បានខំត្រៀមរួចរាល់ហើយស្រាប់តែលើកពេលប្រឡង។

យ៉ាងណាក៏ដោយ លោកបានបន្តថា«ក្រសួងក៏មិនចង់លើកពេលដែរ តែដោយសារជំងឺកូវីដ១៩មាន ការរាតត្បាតចូលសហគមន៍ទើបមានការពន្យាពេលនោះតែក្រសួងបានដាក់កាលបរិច្ចេទច្បាស់ លាស់ហើយប្រឡងនៅថ្ងៃទី១១មករាឆ្នាំក្រោយ»។

លោក រស់ សុវាចា អ្នកនាំពាក្យក្រសួងអប់រំយុវជន និងកីឡាបានមានប្រសាសន៍ថា «ក្រសួងអប់រំ យុវជន និងកីឡាយល់ច្បាស់ពីក្តីបារម្ភនេះ។ ក្រសួងសូមស្នើសិស្សានុសិស្ស និងបេក្ខជនប្រឡង និងមាតាបិតាទាំងអស់បន្តខិតខំប្រឹងប្រែងរៀនសូត្រ ថែរក្សាសុខភាព និងគាំទ្រគ្នាទៅវិញទៅមក ខណ:ពេលដែលកម្ពុជា និងពិភពលោកកំពុងប្រឈមនឹងកូវីដ-១៩នៅឡើយ»។

លោកបានបន្តថា«ក្នុងន័យនេះ ក្រសួងនៅតែបន្តលើកកម្ពស់គុណភាពអប់រំ និងគុណភាពប្រឡងដើម្បីឆ្លើយតបនឹងតម្រូវការរៀន និងបង្រៀនក្មុងបរិបទកូវីដ-១៩»។

លោកបានបន្ថែមថា ក្នុងបរិបទកូវីដ-១៩ គោលបំណងធំ២សម្រាប់ការសិក្សាគឺ ឲ្យមានការរៀនសូត្រជាបន្ត និងចូលរួមជាមួយរាជរដ្ឋាភិបាលក្នុងការគ្រប់គ្រង ទប់ស្កាត់ និងបង្ការការរីករាលដាលនៃជំងឺកូវីដ-១៩៕

អត្ថបទដោយ ៖ សំអឿន

Related Topics:ប្រឡងបាក់ឌុប