ចេតិយបុរាណ វត្តជេត្តពន មានអាយុជាង ៣០០ ឆ្នាំ

ចេតិយបុរាណដែលស្ថិតនៅក្នុងវត្ត ជេត្តពន ឬហៅ វត្តត្រី ភូមិល្វាក្រោម ឃុំស្ដៅ ស្រុកកងមាស ខេត្តកំពង់ចាម មានអាយុជាង ៣០០ ឆ្នាំ នៅតែជាទីសក្ការៈបូជារបស់មនុស្សជំនាន់ក្រោយ។

លោក ម៉ុល មុនី អតីតព្រះសង្ឃធ្លាប់បួសរៀននៅវត្តនេះ ៣ វស្សា បានរៀបរាប់ថា លោកបានដឹងពីប្រវត្តិវត្តនេះខ្លះៗ អំពីអ្នកធ្លាប់មានគុណចំពោះជាតិ និងកូនចៅជំនាន់ក្រោយ ក៏ដូចជាបានជួយកសាង ហេដ្ឋារចនាសម្ព័ន្ធនានាក្នុងទីវត្ត សម្រាប់បន្តដល់កូនចៅជំនាន់ក្រោយឱ្យបានសិក្សារៀនសូត្រ មានតួនាទីខ្ពស់ក្នុងសង្គម។

លោកបានបញ្ជាក់ថា ចេតិយបុរាណបាន ដោយព្រះចៅអធិការ អង្គ ភឿ និងព្រះគ្រូធម្មវាចា ម៉ៅ ហៀង ដែលបានត្រួសត្រាយផ្លូវសម្រាប់ក្មេងជំនាន់ក្រោយ បានសិក្សារៀនសូត្រ និងមានតួនាទីខ្ពស់ក្នុងសង្គមរហូតមក។

ដើម្បីរំលឹកការដឹងគុណ ប្រជាជននៅភូមិបាននាំយកអដ្ឋិធាតុ របស់លោកទៅតម្កល់ទុកនៅចេតិយនេះ និងអដ្ឋិធាតុរបស់ប្រជាជនខ្មែរដែលបានស្លាប់ក្នុង ឆ្នាំ ១៩៧០ រហូតដល់ឆ្នាំ ១៩៧៥។

លោក ម៉ុល មុនី បញ្ជាក់ថា ចេតិយនេះមានអាយុកាលជាង ៣០០ ឆ្នាំមកហើយ មានភាពទ្រុឌទ្រោមខ្លាំង លោកសូមអំពាវនាវ ឱ្យមានការជួសជុល និងការជួយថែរក្សាឡើងវិញ។

អត្ថបទ​៖ រុងរឿង