ព័ត៌មានជាតិ

រដ្ឋមន្ត្រីការបរទេសឡាវ សិង្ហបុរី និងហ្វីលីពីន បានដល់ភ្នំពេញហើយ ដើម្បីចូលរួមកិច្ចប្រជុំនៅកម្ពុជា

បានផុស

៤ years មុន

នៅ

ថ្ងៃអង្គារ ១៥ កុម្ភៈ ២០២២

ដោយ

តាមព័ត៌មានពីក្រសួងការបរទេសបានឲ្យដឹងថា ចាប់ពីព្រឹកថ្ងៃទី១៥ ខែកុម្ភៈ ឆ្នាំ២០២២ នេះ តាមការអញ្ជើញរបស់រដ្ឋមន្រ្តីការបរទេសកម្ពុជា លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស នៃបណ្តាប្រទេសអាស៊ានជាច្រើនបានមកដល់ភ្នំពេញហើយ ដើម្បីចូលរួមកិច្ចប្រជុំចង្អៀតរដ្ឋមន្រ្តីការបរទេសអាស៊ាន (ASEAN Foreign Ministers’ Retreat)។

បើតាមក្រសួងការបរទេស នៅព្រឹកថ្ងៃទី១៥ ខែកុម្ភៈ ឆ្នាំ២០២២ លោកបណ្ឌិត វីវៀន បាឡាគ្រីស្ហ្សណាន់ រដ្ឋមន្រ្តីការបរទេស នៃសាធារណរដ្ឋសឹង្ហបុរី បានអញ្ជើញមកដល់ព្រលានយន្តហោះអន្តរជាតិភ្នំពេញដោយសុវត្ថិភាព ដើម្បីចូលរួមកិច្ចប្រជុំចង្អៀតរដ្ឋមន្រ្តីការបរទេសអាស៊ាន (ASEAN Foreign Ministers’ Retreat) និងបំពេញទស្សនកិច្ចផ្លូវការនៅព្រះរាជាណាចក្រកម្ពុជា។

នៅព្រឹកថ្ងៃដដែលនេះលោក សាលើមសៃ គុំម៉ាស៊ីត រដ្ឋមន្រ្តីការបរទេស នៃសាធារណរដ្ឋប្រជាធិបតេយ្យប្រជាមានិតឡាវ បានអញ្ជើញមកដល់ព្រលានយន្តហោះអន្តរជាតិភ្នំពេញដោយសុវត្ថិភាព ដើម្បីបំពេញទស្សនកិច្ច ក៏ដូចជាចូលរួមកិច្ចប្រជុំខាងលើនេះ រយៈពេល៣ថ្ងៃ។

នៅរសៀលថ្ងៃទី១៥ ខែកុម្ភៈ នេះដែរ លោក ធីអូឌឺរ៉ូ ឡក់ស៊ីន ជូនែ រដ្ឋលេខាធិការក្រសួងការបរទេស នៃសាធារណរដ្ឋហ្វីលីពីន ក៏បានព្រលានយន្តហោះអន្តរជាតិភ្នំពេញផងដែរ ហើយការអញ្ញើញមកដល់របសស់ប្រមុខកាទូត នៃបណ្តាប្រទេសអាស៊ានទាំងនេះ ត្រូវបានទទួលស្វាគមន៏ដោយលោកស្រី ជា គឹមថា អនុរដ្ឋលេខាធិការក្រសួងការបរទេស និងមន្រ្តីពាក់ព័ន្ធជាច្រើន ដល់អាកាសយានដ្ឋានអន្តរជាតិភ្នំពេញ។

សូមបញ្ជាក់ថា កិច្ចប្រជុំថ្នាក់រដ្ឋមន្រ្តីអាស៊ានចង្អៀត នឹងប្រព្រឹត្តទៅជាផ្លូវការ នៅរាជធានីភ្នំពេញ ចាប់ពីម៉ោង៩ ព្រឹក ថ្ងៃទី១៦ ខែកុម្ភៈទៅ រហូតដល់ថ្ងៃទី១៧ ខែកុម្ភៈ ដែលកិច្ចប្រជុំនេះ ប្រព្រឹត្តទៅដោយផ្ទាល់ផង និងតាមប្រព័ន្ធអនឡាញផង ហើយបើតាមក្រសួងការបរទេសកម្ពុជា រដ្ឋមន្រ្តីការបរទេស នៃបណ្តាប្រទេសអាស៊ានស្ទើតែទាំងអស់ នឹងអញ្ជើញចូលរួមដោយផ្ទាល់ លើកលែងតែថៃ និងព្រុណេប៉ុណ្ណោះ ដែលចូលរួមតាមអនឡាញ។

កិច្ចប្រជុំចង្អៀតរដ្ឋមន្រ្តីការបរទេសអាស៊ាននេះ នឹងពិនិត្យមើលឡើងវិញនូវការសម្រេចនានារបស់ថ្នាក់ដឹកនាំនៅក្នុងកិច្ចប្រជុំកំពូលអាស៊ានលើកទី៣៨ និងលើកទី៣៩ ធ្វើការផ្លាស់ប្តូរទស្សនៈគ្នាលើមធ្យោបាយ ដើម្បីពង្រឹងបន្ថែមទៀតទំនាក់ទំនងខាងក្រៅជាមួយដៃគូសន្ទនានានា ខណៈពេលថែរក្សា និងលើកកម្ពស់មជ្ឈភាព សាមគ្គីភាព និងឯកភាពអាស៊ាន ព្រមទាំងពិភាក្សាគ្នាអំពីរបៀប និងវិធីសាស្រ្ត ដើម្បីកៀរគរកិច្ចខិតខំប្រឹងប្រែងរួមគ្នាក្នុងការកសាងសហគមន៍អាស៊ានមួយដែលកាន់ តែធន់រឹងមាំឡើង ប្រកបដោយថាមពល ពោរពេញដោយសន្តិភាព និងវិបុលភាព៕

អត្ថបទ៖ កោះកែវ