Connect with us

ព័ត៌មានជាតិ

មកស្គាល់ជីវប្រវត្តិមន្ត្រីវ័យក្មេងទីពីរ ដែលបានឡើងតំណែងជារដ្ឋមន្ត្រី នៅប្រទេសកម្ពុជា

បានផុស

នៅ

លោក កើត រិទ្ធ បាន​ក្លាយ​ជា​រដ្ឋមន្ត្រី​វ័យក្មេង​មួយរូប​ទៀត បន្ទាប់​ពី​លោក សាយ សំអាល់ ​រដ្ឋមន្ត្រីក្រសួងបរិស្ថាន។ ក្នុង​ពេល​ប្រកាស​តែងតាំង​ជា​រដ្ឋមន្រ្តី​ក្រសួង​យុត្តិធម៌​នៅឆ្នាំ ២០២០ លោក​ទើប​តែ​មាន​​វ័យ ៤១ ឆ្នាំ ប៉ុណ្ណោះ។ មន្រ្តី​រូប​នេះមានស្នាដៃ​ជាច្រើន ​រួម​ទាំង​ចំណេះដឹង​ផ្នែក​ច្បាប់​យ៉ាង​ទូលំទូលាយ ដែល​ទទួល​បានការ​បណ្តុះបណ្តាល​ពី​ប្រទេស​បារាំង​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីកន្លែង​កំណើត

លោក​កើត រិទ្ធ កើត​នៅថ្ងៃទី០២ ខែ​មករា ឆ្នាំ១៩៧៩ ដែល​មាន​ទីកន្លែង​កំណើត​នៅ​ភូមិ​ព្រៃទទឹង ស្រុក​ព្រៃឈរ ខេត្ត​កំពង់​ចាម។

ការ​អប់រំ

-ក្នុងឆ្នាំ១៩៩៩ ​ទទួល​បាន​បរិញ្ញាបត្រ​នីតិសាស្ត្រ​មហាវិទ្យាល័យ​នីតិសាស្ត្រ និង​សេដ្ឋកិច្ច។

-ឆ្នាំ​១៩៩៩ ​ទទួល​បាន​អាហារូបករណ៍​សិក្សា​ផ្នែក​ច្បាប់​នៅ​ប្រទេស​បារាំង​។

-ឆ្នាំ ២០០០ ទទួល​បាន​បរិញ្ញាបត្រ​នីតិឯកជន​ពី​សាកល​វិទ្យាល័យ​លីយ៉ុង​២​ប្រទេស​បារាំង (និស្សិត​អាហាររូបករណ៍)។

-ឆ្នាំ ២០០១ ទទួល​បាន​សញ្ញាបត្រ Maîtrise ផ្នែក​ច្បាប់​នៃ​សាកលវិទ្យាល័យ​លីយ៉ុង២ប្រទេសបារាំង (និស្សិត​អាហាររូបករណ៍)​។

-ឆ្នាំ ២០០២ ទទួល​បាន​បរិញ្ញាបត្រ​ជាន់ខ្ពស់​ផ្នែក​ច្បាប់ព្រហ្មទណ្ឌ និង​វិទ្យាសាស្ត្រ​នៃ​បទ​ឧក្រិដ្ឋ​នៅ​សាកលវិទ្យាល័យ​លីយ៉ុង៣ប្រទេសបារាំង (និស្សិត​អាហារូបករណ៍)។

វិល​ត្រឡប់​មក​មាតុប្រទេស​វិញ

បន្ទាប់​ពីវិល​ត្រឡប់​មក​ប្រទេសកម្ពុជាវិញ លោក​បាន​ធ្វើជា​សាស្ត្រាចារ្យ​ផ្នែក​ច្បាប់ នៅ​សាកលវិទ្យាល័យ​ភូមិន្ទនីតិសាស្រ្ត និង​វិទ្យា​សាស្រ្ត​សេដ្ឋកិច្ច ទាំង​ថ្នាក់​ភាសា​បារាំង និង​ភាសាខ្មែរ​ពី​ឆ្នាំ ២០០២ រហូត​ដល់​ឆ្នាំ ២០១៦ ដើម្បី​ចែករំលែក​ចំណេះដឹង​ដល់​និស្សិត​ខ្មែរ និង​មន្រ្តី​រាជការ។

ស្នាដៃ

លោក កើត រិទ្ធ ជា​ស្ថាបនិកក្នុងការ​បង្កើតនូវក្រមព្រហ្មទណ្ឌ និង​ក្រម​នីតិវិធី​ព្រហ្មទណ្ឌ​មួយរូប​ក្នុង​ចំណោម​ថ្នាក់​ដឹកនាំ​ផ្សេងទៀត​នៅ​ក្រសួងយុត្តិធម៌។ លោក កើត រិទ្ធ ក៏​ជា​បុគ្គល​ដែល​បាន​ចុះ​ផ្សព្វផ្សាយ​ច្បាប់​ទាក់ទង​ក្រមព្រហ្មទណ្ឌ និង​ក្រម​នីតិវិធី​ព្រហ្មទណ្ឌ​ទៅដល់​ចៅក្រម ព្រះរាជអាជ្ញា និង​មន្រ្តីអនុវត្ត​ច្បាប់​តាម​បណ្តា​ខេត្ត​ផងដែរ។

ក្រៅ​ពី​នេះ មាន​សមិទ្ធផល​មួយ​ចំនួន​ទៀត​ដែល លោក កើត រិទ្ធ​បាន​បន្សល់​ទុក​សម្រាប់​បញ្ញវន្ត​ជំនាន់​ក្រោយ។ លោក​បាន​ចូលរួម​ក្នុងការ​ធ្វើ​សៀវភៅ​ច្បាប់​ដែលមានដូចជា៖ សៀវភៅសេចក្តីផ្តើម​នៃ​ច្បាប់​កម្ពុជា បោះពុម្ពផ្សាយក្នុងឆ្នាំ២០០៣ និង២០០៥, សៀវភៅ​កំណត់​ពន្យល់​លើ​សេចក្តី​ព្រាង​ក្រម​ព្រហ្មទណ្ឌ​ទាក់ទង​លើ​វិភាគទាន​លើការសិក្សា​ច្បាប់ព្រហ្មទណ្ឌ​កម្ពុជា បោះពុម្ពឆ្នាំ២០០៥, អត្ថបទ​ស្តី​ពី​ធាតុផ្សំ​នៃ​បទល្មើសរំលោភ និង​ការវិវត្តរបស់វា​នៅក្នុងច្បាប់​ព្រហ្មទណ្ឌ​កម្ពុជា បោះពុម្ព​ឆ្នាំ២០០៦ ក្នុង​ព្រឹត្តបត្រ​នៃសាកលវិទ្យាល័យ​ភូមិន្ទនីតិសាស្ត្រ និង​វិទ្យសាស្ត្រ​សេដ្ឋកិច្ច និង​សៀវភៅ នីតិកម្ពុជា​ បោះពុម្ព​ផ្សាយ​ក្នុងឆ្នាំ​២០១៦ ដើម្បី​ឲ្យ​និស្សិត ក៏​ដូចជា​អ្នកសិក្សាផ្នែកច្បាប់ រឹត​តែ​មាន​ឯកសារ​សម្រាប់​សិក្សា​ច្រើន​ផង​ដែរ។

បទពិសោធ៍​ការងារ

ក្រៅពី​ការសិក្សា និងស្នាដៃជាច្រើន លោក​កើត រិទ្ធ ក៏​មាន​បទពិសោធន៍​ការងារ​ជាច្រើន​ផងដែរ។ ក្នុង​នោះ​ចាប់តាំង​ពីឆ្នាំ ២០០២ រហូត​ដល់ឆ្នាំ ២០១៦ ជា​សាស្រ្តាចារ្យ​ផ្នែកច្បាប់នៅសាកលវិទ្យាល័យ​ភូមិន្ទ​និតីសាស្រ្ត និង​វិទ្យាសាស្ត្រ​សេដ្ឋកិច្ច (ទាំង​ថ្នាក់​ភាសាបារាំង និងភាសាខ្មែរ)។

-ឆ្នាំ២០០៣-២០០៥ មន្រ្តី​រាជការ​ស៊ីវិល​ក្រសួង​អប់រំយុវជន និងកីឡា

-ឆ្នាំ២០០៥-២០១២ មន្រ្តី​រាជការ​ស៊ីវិល​ក្រសួង​សេដ្ឋកិច្ច និងហរិញ្ញវត្ថុ

-ឆ្នាំ២០០៧-២០១៣ អនុរដ្ឋលេខាធិការក្រសួងយុត្តិធម៌

-ឆ្នាំ២០០៨ សមាជិកគណៈ​កម្មការមូលបត្រកម្ពុជា

-ឆ្នាំ២០១២ សមាជិកឧត្តមក្រុមប្រឹក្សាសេដ្ឋកិច្ច​ជាតិ

-ឆ្នាំ២០១៤ ជាសមាជិកគណៈកម្មាធិការកំណែទម្រង់ច្បាប់ និងប្រព័ន្ធយុត្តិ​ធម៌

-ឆ្នាំ២០១៣ ដល់ ២០១៨ ជារដ្ឋលេខាធិការក្រសួងយុត្តិធម៌

-ឆ្នាំ២០១៨ ដល់ ២០២០ ជារដ្ឋលេខាធិការប្រចាំការក្រសួងយុត្តិធម៌

-នៅថ្ងៃទី ៣០ ខែមីនា ២០២០ ជារដ្ឋមន្រ្តីក្រសួង​យុត្តិធម៌

សូម​បញ្ជាក់​ថា លោក កើត រិទ្ធ ត្រូវបានសម្តេចតេជោ ហ៊ុន សែន នាយករដ្ឋមន្ត្រី​កម្ពុជា សម្រេច​ជ្រើសតាំង​ជា​រដ្ឋមន្ត្រី​ក្រសួងយុត្តិធម៌ ជំនួស​លោក អង្គ វង្សវឌ្ឍនា ដែល​កាន់​នៅ​ក្រសួង​រយៈពេល​១៦ ឆ្នាំ។ លោក កើត រិទ្ធ ត្រូវ​បាន​រដ្ឋសភា​ផ្តល់​សេចក្តី​ទុកចិត្ត​នៅថ្ងៃទី៣០ ខែ​មីនា ឆ្នាំ២០២០៕

អត្ថបទ៖ ប៊ុណ្ណារ៉ា

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ៥ ម៉ោង មុន

ពលរដ្ឋ​មក​ទទួល​វ៉ាក់សាំង​ដូ​ស​ជំរុញ​ក្នុង​ខេត្តកោះកុង មិនទាន់​សម្រេច​ដល់​គោលដៅ​ចង់បាន​

ព័ត៌មានជាតិ៦ ម៉ោង មុន

ត្រីភាគី​ដាក់​តួលេខ​ប្រាក់​ឈ្នួល​ចុងក្រោយ​ជូន​ក្រុមប្រឹក្សា​ជាតិ​ប្រាក់​ឈ្នួល​សម្រេច​នៅ​ថ្ងៃទី​២១​កញ្ញា​ខាងមុខ

វប្បធម៌ ជំនឿ៦ ម៉ោង មុន

ពណ៌ផ្ទះហុងស៊ុយ​ ស្របតាមទិសទាំង ៨ ជួយទាក់ទាញសំណាងទ្វេដង

ព័ត៌មានជាតិ៦ ម៉ោង មុន

សពលោក ប៊ូ ឡាំ អតីត​អ្នកតំណាងរាស្ត្រ​ខេត្ត​រតនគិរី​ បាន​ដឹក​ពី​ប្រទេសវៀតណាមមកដល់កម្ពុជាហើយ ដើម្បី​រៀប​ចំ​ធ្វើ​បុណ្យ​តាម​ប្រពៃណី

ព័ត៌មានជាតិ៧ ម៉ោង មុន

រដ្ឋមន្ត្រី​ក្រសួងសាធារណការ​ ត្រៀម​ប្រើម៉ាស៊ីនទំនើប​ ដែល​អាច​ជំនួសមនុស្ស​ ក្នុងការចូលលូ​ លើកដំបូង​ក្នុង​ប្រទេស​កម្ពុជា

Sokha Hotels

ព័ត៌មានពេញនិយម