ព្រះមហាក្សត្រ​ និង សម្ដេចម៉ែ នឹងយាងទៅពិនិត្យព្រះរាជសុខភាពនៅប្រទេសចិននៅព្រឹកថ្ងៃស្អែក

ព្រះករុណា ព្រះបាទ សម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ នឹងស្តេចយាងទៅទីក្រុងប៉េកាំង ប្រទេសចិននៅថ្ងៃទី៤ ខែមីនា ឆ្នាំ២០២២ស្អែកនេះ ដើម្បីពិនិត្យ និងព្យាបាលព្រះរាជសុខភាព។

យោងតាមព្រះរាជសារប្រទានជូនជនរួមជាតិរបស់ព្រះករុណា ព្រះមហាក្សត្រដែលសារព័ត៌មានកម្ពុជាថ្មីទទួលបាននៅថ្ងៃនេះ ព្រះអង្គបានមានព្រះរាជបន្ទូលថា ៖ «ទូលព្រះបង្គំ ខ្ញុំព្រះករុណា ខ្ញុំ និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះអនុញ្ញាត និងអនុញ្ញាតពីសម្តេចព្រះមហាសង្ឃរាជទាំងពីរគណៈ ព្រះថេរានុត្ថេរៈគ្រប់ព្រះអង្គ ឯកឧត្តម លោកជំទាវ និងជនរួមជាតិទាំងអស់ អវត្តមានពីមាតុប្រទេសដោយចាប់ផ្តើមពីថ្ងៃទី០៤ ខែមីនា ឆ្នាំ២០២២នេះតទៅ ដើម្បីធ្វើដំណើរទៅទីក្រុងប៉េកាំង សាធារណរដ្ឋប្រជាមានិតចិន ដើម្បីពិនិត្យ និងព្យាបាលព្រះរាជសុខភាព»។

ព្រះរាជសារបានបញ្ជាក់បន្ថែមថា សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជានឹងទទួលជួយការងារព្រះករុណា ព្រះមហាក្សត្រ ក្នុងឋានៈជាប្រមុខរដ្ឋស្តីទី។ គួររម្លឹកជូនថា ព្រះករុណាព្រះមហាក្សត្រ និងសម្តេចម៉ែ តែងតែយាងទៅពិនិត្យ និងព្យាបាលព្រះរាជសុខភាពនៅរដ្ឋធានីប៉េកាំង ប្រទេសចិនដែលនេះ គឺជាព្រះរាជដំណើរយាងជាទៀងទាត់រៀងរាល់៦ខែម្ដង៕

ដោយ៖ណារី