ប្រមុខរាជរដ្ឋាភិបាល ​​ដំឡើងប្រាក់បៀវត្សសោធននិវត្តន៍​ ដែលបានចូលនិវត្តន៍មុន​

សម្ដេចតេជោ ហ៊ុន សែន​ ក្នុងនាមប្រមុខរាជរដ្ឋាភិបាល ​បាន​ចេញបញ្ជាឱ្យរដ្ឋមន្រ្តីក្រសួង​សេដ្ឋកិច្ច​ រៀបចំ​ដំឡើងប្រាក់បៀវត្សសម្រាប់សោធននិវត្តន៍​ ដែលបានចូលនិវត្តន៍មុន ឬអ្នក​ចូល​និវត្តន៍មុន​ ដែលមានប្រាក់​​បៀវត្ស​ទាប ដោយសម្ដេចតេជោ លើកឡើងថា នេះ​គឺជាគោលនយោ​បាយមួយ ក្នុងចំណោមគោលនយោបាយ នៃការ​គិតគូរ​សម្រាប់អ្នកដែលមានប្រាក់បៀវត្សទាប។​​

ការចេញបញ្ជារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរា​ជា​ណាកច្រ​កម្ពុជា​​បែបនេះ​ បាន​ធ្វើឡើង​នៅ​ក្នុងពិធីសម្ពោធ​ដាក់ឱ្យប្រើប្រាស់​ស្ពាន​​អាកាស ​ផ្លូវលើដី និងផ្លូវក្រោមដី នៅចោមចៅ​​​ នាព្រឹកថ្ងៃព្រហស្បតិ៍ ទី៣១ ខែមីនា ឆ្នាំ២០២២ នេះ។

សម្ដេចតេជោ ហ៊ុន សែន​ បានមានប្រសាសន៍ថា រដ្ឋាភិបាលបានយកចិត្តទុកដាក់ ដើម្បីដំឡើងបៀវត្សស​ម្រាប់សោធននិវត្តន៍ ដែលបានចូលនិវត្តន៍មុន ពីព្រោះអ្នកចូលនិវត្តមុន និងអ្នកចូលនិវត្តន៍ក្រោយ មានប្រាក់បៀវត្សខុសគ្នា។ ហេតុដូច្នេះហើយទើប​រយៈពេលប៉ុន្មានឆ្នាំនេះ រដ្ឋាភិបាលបានឱ្យដំឡើង​អ្នកដែលមានប្រាក់ខែទា​បឱ្យបានខ្ពស់។

សម្តេចតេជោ ហ៊ុន សែន បញ្ជាក់ថា៖ “ឥឡូវខ្ញុំសូមចេញបញ្ជា ខ្ញុំទាក់ទងជាមួយឯកឧត្តម អូនព័ន្ធ មុន្នីរ័ត្ន ឱ្យពន្លឿន​នៃការលើកកម្រិតអ្នកដែលមានប្រាក់សោធននិវត្តន៍ទាប ឱ្យកើនបានខ្ពស់បន្តិច ចំនួនត្រឹមតែ ២ ឆ្នាំ ឬ ៣ ឆ្នាំ យកគោលដៅហ្នឹង”។

​សម្ដេចតេជោបន្តថា រយៈពេល២ឆ្នាំនេះ រដ្ឋាភិបាលមិនបានដំឡើងប្រាក់បៀវត្សឱ្យមន្ត្រីរាជការទេ ដោយសារតែ​មានតម្រូវការទប់ទល់ជាមួយការរីករាលដាលនូវជំងឺកូវីដ-១៩ ប៉ុន្តែ​សម្រាប់អតីតយុទ្ធជន ដែលចូលនិវត្តន៍​មុន និងមន្ត្រីរាជការស៊ីវិល ដែលចូលនិវត្តន៍មុន គប្បីត្រូវយកចិត្តទុកដាក់ជំរុញការដំឡើងប្រាក់បៀវត្សចំពោះអ្នកទាំងនោះ។

សម្ដេចតេជោ ហ៊ុន សែន លើកឡើងថា បញ្ហានេះ​គឺមិនចាំបាច់ធ្វើការកែ​តម្រូវថវិកាជាតិសម្រាប់​អ្នកទាំងពីរនោះទេ ពីព្រោះចំនួននេះ ក៏មិនច្រើនពេកដែរ ហើយត្រូវរើសយកអ្នកណា​​ដែល​​​មានប្រាក់​ខែគោលទាប ដូចជាប្រាក់​ខែគោលត្រឹម ៥០ ម៉ឺនរៀល ត្រូវឡើង ៣០ ភាគរយ ​អ្នកដែលមានប្រាក់ខែ ៦០ ​ម៉ឺនរៀល ត្រូវឡើង ២៨ ភាគរយ អ្នកមានប្រាក់ខែគោល ៧០ ម៉ឺន ត្រូវឡើង ២៥ ភាគរយជាដើម។ ត្រូវយកវិសេសធីសាស្រ្តមួយនេះ ដើម្បីជំរុញ​ឲ្យមានតុល្យភាព៕

អត្ថបទ៖ កោះកែវ