លោក ស៊ុន ចាន់ថុល ៖ រាជរដ្ឋាភិបាល ជំរុញការប្រើប្រាស់យានយន្តអគ្គិសនី ឲ្យបានប្រមាណ ៤០% នៅឆ្នាំ ២០៥០

ថ្លែងនៅក្នុងកម្មវិធី MPWT Live Show របស់ក្រសួងសាធារណការ និងដឹកជញ្ជូន នៅថ្ងៃទី ២៧ ខែឧសភា ឆ្នាំ២០២២ លោក ស៊ុន ចាន់ថុល លើកឡើងថា នៅឆ្នាំ ២០៥០ រាជរដ្ឋាភិបាលកម្ពុជា ជំរុញការប្រើប្រាស់យានយន្តអគ្គិសនី ឲ្យបានប្រមាណ ៤០% និងម៉ូតូ ៧០% ដើម្បីចូលរួមកាត់បន្ថយការបំពុលបរិស្ថាននៅកម្ពុជា និងនៅលើពិភពលោក។

រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានឲ្យដឹងថា ការប្រើប្រាស់រថយន្តអគ្គិសនីនៅកម្ពុជា កំពុងមានការកើនឡើង ខណៈរាជរដ្ឋាភិបាល បានដាក់ចេញគោលនយោបាយកាត់បន្ថយការបញ្ចេញឧស្ម័នកាបូន ឲ្យធ្លាក់នៅកម្រិតសូន្យ នៅឆ្នាំ ២០៥០។  

សម្រាប់វឌ្ឍនភាពនៃការបំពេញការងារ របស់ក្រសួងទាក់ទងនឹងយានយន្តអគ្គិសនីនេះ លោករដ្ឋមន្ត្រី ស៊ុន ចាន់ថុល បញ្ជាក់ថា ក្រសួងបានសហការ ជាមួយក្រុមហ៊ុនចែកចាយប្រេងឥន្ធនៈ ដើម្បីឲ្យផ្នែកឯកជន អាចដំឡើងស្ថានីយបញ្ចូលថាមពលអគ្គិសនី នៅតាមស្ថានីយប្រេងឥន្ធនៈរបស់ខ្លួន។

ឆ្លៀតក្នុងឱកាសនោះ លោករដ្ឋមន្ត្រី បានជំរុញលើកទឹកចិត្តឲ្យប្រជាពលរដ្ឋ ប្រើប្រាស់យានយន្តអគ្គិសនីឲ្យបានច្រើន ដើម្បីចូលរួមចំណែកកាត់បន្ថយការចំណាយលើប្រេងឥន្ធនៈ និងការបំពុលបរិស្ថាន។

បើតាមលោក ស៊ុន ចាន់ថុល ក្នុងរយៈពេល ៤ខែ ឆ្នាំ ២០២២នេះ មានយានយន្តអគ្គិសនីចុះបញ្ជីនៅក្រសួងសាធារណ ការ និងដឹកជញ្ជូន សរុបចំនួន ៦៦គ្រឿង បើប្រៀបធៀបនឹងរយៈពេលដូចគ្នា ក្នុងឆ្នាំ២០២១ មានការកើនឡើងប្រមាណជាង ៦០០%។ ជាមួយគ្នានេះ ក្រសួងបានដាក់ឲ្យដំណើរការទីតាំងសាកយានយន្តអគ្គិសនីចំនួន ៤ទីតាំងត្រូវបានគាំទ្រដោយអង្គការ UNDP និង ១ទីតាំង ត្រូវបានគាំទ្រដោយសភាពាណិជ្ជកម្មចិននៅកម្ពុជា៕

អត្ថបទ៖ ធឿន វ៉ាន់សុង