គិតត្រឹមខែឧសភា រាជរដ្ឋាភិបាលឧបត្ថម្ភ​គ្រួសារក្រីក្រ​ក្នុងវិបត្តិកូវីដអស់ជិត ៧០០​លានដុល្លារ

រយៈពេល២៣ខែ កន្លងមកនេះ ពោលគឺចាប់ពីខែ មិថុនា ឆ្នាំ ២០២០ ដល់ខែឧសភា ឆ្នាំ ២០២២នេះ រាជរដ្ឋាភិបាលកម្ពុជាចំណាយក្នុងការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះជិត ៧០ម៉ឺនគ្រួសារ ក្នុងអំឡុងពេលប្រយុទ្ធនឹងកូវីដ-១៩ អស់ប្រមាណ ២ ៧៣៤ ប៊ីលានរៀល ឬស្មើនឹង ៦៨៣ លានដុល្លារអាមេរិក។​ កម្មវិធីនេះ បានជួយដោះស្រាយជីវភាពប្រជាពលរដ្ឋក្រីក្រ និងងាយរងគ្រោះ​ដែលមានបណ្ណសមធម៌ ទាំងនៅទីប្រជុំជន និងទីជនបទ ទូទាំងប្រទេស។

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានថ្លែងនាពេលថ្មីៗនេះថា រាជរដ្ឋាភិបាល បានចំណាយថវិកាប្រមាណ ៤០លានដុល្លារ ក្នុងមួយខែ ស្មើនឹង ៤៨០លានដុល្លារ ក្នុងមួយឆ្នាំ សម្រាប់ជួយដល់ពលរដ្ឋក្រីក្រជិត ៧០ម៉ឺនគ្រួសារ សរុបប្រជាជន ៣លាននាក់ កុំឱ្យធ្លាក់ក្រោមបន្ទាត់ក្រីក្រ ដោយសារវិបត្តិកូវីដ-១៩​​។

សម្តេច បានគូសបញ្ជាក់ថា« នេះជាការចាំបាច់ ដើម្បីចំណាយ មិនទាន់គិតអំពីការចំណាយលើបញ្ហាព្យាបាលជំងឺផ្សេងៗទេ គឺយើងគិតពីរឿងចិញ្ចឹមប្រជាពលរដ្ឋជាមុនសិន នេះជាសំណាញ់សុវត្ថិភាពសង្គម នៅក្នុងដំណាក់កាលលំបាក»។

ថវិកាដែលជួយទប់ស្កាត់ការចំណាយនេះ បានមកពីការខំប្រឹងប្រែងប្រមូលពន្ធរបស់អគ្គនាយកពន្ធដារ។

សម្តេចតេជោ បានបញ្ជាក់ថា កាលពីឆ្នាំ ២០២១ ការប្រមូលពន្ធដារសម្រេចបានលើសផែនការ រហូតដល់១២៤ភាគរយ។ ចំណែកនៅត្រីមាសទី១ ឆ្នាំ២០២២នេះ ពន្ធដារ ប្រមូលចំណូលពន្ធបានចំនួន ៥.១១៥,៤២ពាន់លានរៀល ស្មើនឹង ១ ២៦៣,០៧លានដុល្លារ គិតជាភាគរយស្មើនឹង៤៤,៨០% នៃផែនការច្បាប់ហិរញ្ញវត្ថុប្រចាំឆ្នាំ២០២២៕